پنجاب اچ ساوݨ دے مینھ دا ݙوجھا سپیل اڄ شروع تھیسی

لاہور۔18جولائی (اے پی پی) صوبائی دارالحکومت لاہور سودھے پنجاب اچ ساوݨ مینھ دا ݙوجھا سپیل اڄ 19 جولائی توں شروع تھیسی۔ترجمان پی ڈی ایم اے موجب اڄ 19 توں 24 جولائی تئیں صوبے دے ٻہوں سارے ضلعیں اچ تکھی ہوا، کھمݨ گاجاں نال مینھ وسݨ دا امکان اے ، ساوݨ مینھ دے ݙوجھے سپیل اچ گھٹ ویلھے اچ زیادہ مینھ وسݨ دا امکان اے ۔ ترجمان موجب ݙوجھے سپیل دے دوران راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ،حافظ آباد، وزیرآباد، فیصل آباد، خوشاب، سرگودھا، لاہور، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، ننکانہ صاحب تے چنیوٹ اچ زور دا مینھ وسݨ دا امکان اے ۔ ایویں نورپور تھل، بھکر، میانوالی، لیہ، بہاولپور، بہاولنگر، دیرہ غازی خان، ملتان، خانیوال، لودھراں، مظفرگڑھ، کوٹ ادو، رحیم یارخان تے راجن پور اچ وی مینھ وسݨ دا امکان اے ڄݙاں جو راولپنڈی، گوجرانوالہ، لاہور، سیالکوٹ، ملتان تے فیصل آباد اچ اربن فلڈنگ دا ݙر اے، مقامی ندی نالیں، نالہ لئی، کشمیر، مری، گلیات تے شمال مشرقی پنجاب دے برساتی نالیں اچ وی طغیانی دا خطرہ اے۔ڈی جی پی ڈی ایم اے عمر عباس میلہ صوبے دے کمشنرز تے ڈپٹی کمشنرز کوں الرٹ رہݨ دیاں ہدایات جاری کر ݙتن۔ انھاں آکھیا جو ساوݨ مینھ توں پنجاب دے دریاواں تے انھاں انہاں دے نیڑے ندی نالیں اچ پاݨی ودھݨ دا ݙر اے برساتی نالیں اچ فلیش فلڈنگ دا وی خطرہ اے۔ انھاں آکھیا جو وݙے شہراں اچ ساوݨ مینھ پاروں اربن فلڈنگ سانڳے انتظامیہ پیشگی الرٹ رہے، ایں سلسلے اچ محکمہِ صحت، آبپاشی، تعمیر و مواصلات، لوکل گورنمنٹ تے لائیو سٹاک کوں وی الرٹ جاری کر ݙتا ڳئے۔ڈی جی پی ڈی ایم اے شہریاں توں اپیل کیتی اے جو او خراب موسم دی صورتحال اچ احتیاط ورتن ، اندھاری و طوفان دی صورتحال اچ محفوظ جاہ تے رہن، غیر ضروری سفر نہ کرن، شہری آسمانی بجلی توں تحفظ کیتے محفوظ جاہ تے رہن، ٻالاں دا خاص خیال رکھن، انھاں کوں پاݨی آلے علاقیں تے بجلی دیاں تاراں و کھمبے دے نیڑے اصلوں نہ ونڄݨ ݙیون ۔ انھاں مزید آکھیا جو عوام بجلی دی کھمݨ گاج تے طوفانی صورتحال اچ کھلے آسمان تلے اصلوں نہ ونڄے تے کہیں وی ایمرجنسی صورتحال اچ پی ڈی ایم اے ہیلپ لائن 1129 تے رابطہ کرن۔