ریلویزدے ترقیاتی منصوبیں کوں اعلیٰ معیار تے مقررہ مدت دے اندر مکمل کیتا ونڄے، وزیراعظم شہباز شریف دی پاکستان ریلویز ٹرانسفارمیشن پلان تے پیش رفت دے جائزہ اجلاس اچ ہدایت

اسلام آباد۔20جولائی(اے پی پی) وزیراعظم محمد شہباز شریف ریلویز دے ترقیاتی منصوبیں کوں اعلیٰ معیار تے مقررہ مدت دے اندر مکمل کرݨ، ایم ایل ون دے روہڑی-ملتان سیکشن دی اپ گریڈیشن دے حوالے نال تجویزاں پیش کرݨ دی ہدایت کریندیں آکھیے جو جدید تے موثر ریلوے نظام ملکی معیشت، تجارت تے علاقائی رابطے دے ودھارے اچ کلیدی کردارادا کریسی۔ وزیراعظم محمد شہباز شریف دی زیرِ صدارت پاکستان ریلویز ٹرانسفارمیشن پلان تے پیش رفت دا جائزہ اجلاس تھیا۔وزیراعظم دفتر دے میڈیا ونگ توں جاری بیان موجب اجلاس اچ وفاقی وزیر منصوبہ بندی و ترقی احسن اقبال، وفاقی وزیر اقتصادی امور احد خان چیمہ، وفاقی وزیر ریلوے حنیف عباسی، وفاقی وزیر انفارمیشن ٹیکنالوجی و ٹیلی کام شزا فاطمہ، مشیر وزیراعظم نجکاری محمد علی، وزیر مملکت خزانہ و ریلوے بلال اظہر کیانی تے متعلقہ اعلیٰ سرکاری افسراں شرکت کیتی۔ وزیراعظم اجلاس توں خطاب کریندیں آکھیا جو پاکستان ریلویز مسافراں تے مال برداری کیتے ساریں توں گھٹ لاڳت تے موثر ذریعہ نقل و حمل اے۔ انھاں آکھیا جو جدید تے موثر ریلوے نظام ملکی معیشت، تجارت تے علاقائی رابطے دے ودھارے اچ کلیدی کردار ادا کریسی۔ انھاں آکھیا جو پاکستان ریلویز دے بنیادی ڈھانچے کوں جدید دور دے تقاضیں نال ہم آہنگ کرݨ نال پاکستان دے علاقائی تجارت تے لاجسٹکس ہب دے طور تے ابھرݨ اچ کلیدی کردار ہوسی۔وزیراعظم ریلوے دے ترقیاتی منصوبیں کوں اعلیٰ معیار تے مقررہ مدت دے اندر مکمل کرݨ تے مین ریلوے لائن ون دے روہڑی-ملتان سیکشن دی اپ گریڈیشن دے حوالے نال تجویزاں پیش کرݨ دی ہدایت کیتی۔ اجلاس کوں ایم ایل-1 تے ایم ایل-3 اپ گریڈیشن، تھرکول ریلوے کنکٹیوٹی تے ٻئے منصوبیں تے پیشرفت تے بریفنگ ݙتی ڳئی جیں اچ ݙسایا ڳیا جو ایم ایل-1 دی کراچی-روہڑی سیکشن کیتے تفصیلی انجینئرنگ ڈیزائن مکمل کر ڳھدی ڳئی اے، ایم ایل 3 روہڑی-نوکنڈی دی اپ گریڈیشن پی ایس ڈی پی تے برج فنانسنگ تحت کیتی ویسی۔ اجلاس کوں ݙسایا ڳیا جو تھرکول ریل کنکٹیوٹی منصوبے دا 112 کلومیٹر طویل ریلوے ٹریک تھرکول تا چھور ریلوے اسٹیشن تے 60 فیصد کم تھی چکئے تے اے منصوبہ دسمبر 2026ء تک مکمل کرڳھداویسی۔ وزیراعظم دی ہدایت تے ریلوے دی اصلاحات کیتے بین الاقوامی کنسلٹنٹ دی خدمات حاصل کرگھدیاں ڳئن۔ بریفنگ اچ ݙسایا ڳیا جو ریلوے دے ماتحت اسکول تے ہسپتالاں دی سروسز کوں آؤٹ سورس کیتا ڳئے ڄݙاں جو چھی وݙے ریلوے اسٹیشناں دی کمرشلائزیشن تے کم دا آغاز کیتا ویندا پئے۔