وفاقی وزیرریلوے محمد حنیف عباسی دا پاکستان ریلوے اچ وی آئی پی کلچرمکاوݨ دا اعلان ، وزیرتوں آئی جی تئیں اعلیٰ حکام تے ریلوے سیلونز تے وی آئی پی کمریں دے استعمال تے پابندی

اسلام آباد۔20جولائی(اے پی پی) وفاقی وزیرریلوے محمد حنیف عباسی پاکستان ریلوے اچ اعلیٰ سطح تے وی آئی پی کلچر مکاوݨ دا اعلان کریندے بطور وزیرریلوے آپݨے تے اعلیٰ افسراں دے خصوصی سیلونز تے ریسٹ ہاؤسز دے وی آئی پی رومز دے استعمال تے پابندی لاݙتی اے، کوئی وی شہری مناسب کرایہ ادا کرتے اِنھاں لگژری سفری تے رہائشی سہولتاں توں فیدہ چا سڳسی۔ قومی خبر رساں ادارے ’’اے پی پی‘‘ نال خصوصی ڳالھ مہاڑ کریندے وفاقی وزیرریلوے محمد حنیف عباسی ݙسایا جو محکمہ ریلوے کوں جدید تے عوامی امنگاں موجب ڈھالݨ کیتے انقلابی اقدامات کیتے ویندے پئن۔ انھاں آکھیا جو پاکستان دی تاریخ اچ پہلی واری ریلوے دے اندر اتے دی سطح توں وی آئی پی کلچر کوں منڈھوں مُکا ݙتا ڳئے۔ وفاقی وزیر آکھیا جو وزیر ریلوے دا سیلون، چیئرمین سیلون، چیف ایگزیکٹو سیلون تے آئی جی ریلوے دے زیرِاستعمال سیلونز سودھے وی وی آئی پی موومنٹ کیتے مخصوص سارے سیلونز تے وقتی طور تے پابندی لاݙتی اے ۔ ماضی اچ اے سیلونز صرف مخصوص شخصیات دی سفری ضرورتاں کیتے استعمال تھیندے ہن جیں توں محکمے تے اضافی ٻوجھ پوندا ہئی۔محمد حنیف عباسی واضح کیتا جو ہݨ اے لگژری سیلونز تے ملک اچ موجود ریلوے ریسٹ ہاؤسز دے وی آئی پی کمرے عام عوام کیتے مختص کرݙتے ڳئن۔ کوئی وی عام شہری ہݨ ہک مقررہ تے مناسب کرائے دی ادائیگی دے بعد اِنھاں شاندارسہولتاں کوں آپݨے سفر تے رہائش کیتے بُک کروا سڳدے۔ ایں اقدام دا بنیادی مقصد نہ صرف ریلوے دے مسافراں کوں برابری دی بنیاد تے بہترین تے پرتعیش سہولتاں ݙیوݨ اے، بلکہ ایں دے ذریعے محکمہ ریلوے کیتے اضافی آمدݨ دے ذرائع وی پیدا کرݨ اے۔ وفاقی وزیردا آکھݨ ہئی جو ریلوے ہک قومی اثاثہ اے تے ایں دے سارے وسائل تے پہلا حق پاکستان دے عام عوام دا اے۔