پاکستان تے کینیڈا دا تجارت، سرمایہ کاری، سکیورٹی تے ترقیاتی شعبیں اچ تعاون مزید ودھاوݨ تے اتفاق، نائب وزیراعظم اسحاق ڈار دی کینیڈا دی وزیرخارجہ انیتا آنند دے رلے سانجھی پریس کانفرنس

اسلام آباد۔20جولائی(اے پی پی) پاکستان تے کینیڈا تجارت، سرمایہ کاری، سکیورٹی تے ترقیاتی شعبیں اچ تعاون مزید ودھاوݨ تے اتفاق کیتے۔ ݙوہیں ملکاں ݙو پاسے رابطے کوں ادارہ جاتی بنیاداں تے مزید تکڑا بݨاوݨ دے عزم دا اعادہ کیتا ڄݙاں جو کینیڈا پاکستان اچ سکیورٹی تے ترقیاتی منصوبیں کیتے 4 کروڑ 70 لکھ کینیڈین ڈالر توں ودھ دی معاونت دا اعلان کیتے۔وزارت خارجہ اچ کینیڈا دی وزیر خارجہ انیتا آنند دے رلے سانجھی پریس کانفرنس کریندیں نائب وزیراعظم و وزیر خارجہ سینیٹر محمد اسحاق ڈار آکھیا جو پاکستان تے کینیڈا وچال پراݨے تے ہمہ جہت تعلقات موجود ہن جنھاں دی بنیاد تاریخی رابطے، عوامی سطح تے تکڑےتعلقات تے کینیڈا اچ رہݨ آلی متحرک پاکستانی کمیونٹی اے۔ انھاں آکھیا جو ݙوہیں ملکاں ایں دورے توں پیدا تھیوݨ آلی مثبت پیش رفت کوں برقرار رکھݨ، ادارہ جاتی تعاون ودھاوݨ ، باقاعدہ ݙو پاسے مشاورت تے متعلقہ وزارتاں و اداریں وچال رابطے کوں مزید تکڑا بݨاوݨ تے اتفاق کیتا۔ محمداسحاق ڈار آکھیا جو معاشی تعاون ݙوطرفہ تعلقات دا بنیادی ستون اے۔ ایں ضمن اچ تجارت تے سرمایہ کاری اچ ودھارے، کاروباری اداریں وچال رابطے کوں ودھارا ݙیوݨ تے سانجھی دلچسپی دے شعبیں اچ تعاون ودھاوݨ تے تفصیلی ڳالھ مہاڑ تھئی ۔ انھاں کینیڈین کمپنیاں کوں پاکستان دے ترجیحی شعبیں جنھاںاچ تعلیم، توانائی، کان کنی تے اہم معدنیات، زراعت، بنیادی ڈھانچہ تے انفارمیشن ٹیکنالوجی شامل ہن، اچ سرمایہ کاری دی دعوت ݙتی۔ انھاں اعلان کیتا جو وزیراعظم محمد شہباز شریف دی موجودگی اچ ݙوہیں ملک کینیڈین کینولا دی درآمد کیتے فائٹو سینیٹری شرطاں متعلق ہک نویں پروٹوکول تے دستخط کریسن جیں توں درآمدی نظام مزید شفاف تھیسی۔انھاں ݙسایا جو پاکستان دی نیشنل ایگری ٹریڈ اینڈ فوڈ سیفٹی اتھارٹی، ماحولیاتی تحفظ ایجنسی تے کینیڈین فوڈ انسپیکشن ایجنسی وی خوراک دے تحفظ، زرعی تجارت، تکنیکی تعاون تے استعداد کار اچ ودھارے کیتے رل تے کم کرݨ تے اتفاق کیتے۔ محمد اسحاق ڈار غیر ملکی سرمایہ کاری دے ودھارے تے تحفظ دے معاہدے (FIPA) تے جاری مذاکرات دا حوالہ ݙیندیں آکھیا جو ݙوہیں ملک ہݨ تئیں تھیوݨ آلی پیش رفت دا خیرمقدم کیتا تے ایں معاہدے کوں وقتی سانجھے مفاد دی بنیاد تے حتمی شکل ݙیوݨ کیتے مذاکرات جاری رکھݨ تے اتفاق کیتا۔ انھاں آکھیا جو مذاکرات اچ تعلیم، افرادی قوت دی نقل و حرکت، سائنس و ٹیکنالوجی، موسمیاتی تبدیلی، قونصلر امور تے عوامی رابطے دے ودھارے دے علاوہ افغانستان تے انسدادِ دہشت گردی اچ تعاون تے وی ڳالھ کیتی ڳئی۔ علاقائی امور تے ڳالھ کریندے نائب وزیراعظم مسئلہ جموں و کشمیر کوں اقوامِ متحدہ دی سلامتی کونسل دے ایجنڈے تے موجود ہک پراݨا حل طلب جھیڑا قرار ݙیندیں ایں دے منصفانہ حل دی لوڑھ تے زور ݙتا۔ انھاں کینیڈا توں سندھ طاس معاہدے دی بحالی دی حمایت دی وی اپیل کیتی تے آکھیا جو بین الاقوامی قانون تے معاہدیں دی پاسداری ضروری اے۔ایں موقع تے کینیڈا دی وزیرخارجہ انیتا آنند آکھیا جو انھاں دا اے دورہ ایں لحاظ نال خصوصی اہمیت رکھیندے جو تقریباً 20 سال بعد کہیں کینیڈین وزیرِ خارجہ پاکستان دا دورہ کیتے، حالانکہ ݙوہیں ملکاں وچال سفارتی تعلقات کوں اٹھ ݙہاکے گزر چکئن۔ انھاں آکھیا جو پاکستان کینیڈا دی عالمی تجارتی تنوع دی حکمتِ عملی اچ اہم مقام رکھیندے ڄݙاں جو کینیڈا اچ رہݨ آلے ترائے لکھ توں ودھ پاکستانی نژاد شہری ݙوہیں ملکاں دے تعلقات کوں مزید تکڑا بݨیندے پئن ۔ انیتا آنند مشرقِ وسطیٰ اچ کشیدگی گھٹ کرݨ کیتے پاکستان دی سفارتی کوششاں دی تعریف کیتی تے آکھیا جو کینیڈا خطے اچ ودھدے جھیڑے، شہری تنصیبات تے حملیں تے سمندری سلامتی کوں لاحق خطرات تے تشویش رکھیندے۔ انھاں سارے فریقاں تے زور ݙتا جو تحمل دا مظاہرہ کرن تے سفارتی ذرائع توں مسئلے دے حل کوں ترجیح ݙیون۔ انھاں آکھیا جو ݙوہیں حکومتاں FIPA کوں وقتی مکمل کرݨ تے اتفاق کیتے تاں جو ݙوہیں ملکاں دے سرمایہ کاراں کوں زیادہ اعتماد تے تحفظ ملے ۔ زرعی تعاون دے حوالے توں انھاں ݙسایا جو گزریل فصلی سال دے دوران پاکستان کینیڈا توں 4 لکھ 70 ہزار ٹن توں ودھ کینولا درآمد کیتا۔ انھاں پاکستانی حکام دا شکریہ ادا کیتا جو انھاں کینیڈین کینولا کوں پاکستانی منڈی تئیں رسائی ݙیوݨ اچ تعاون کیتا ڄݙاں جو کینیڈا مستقبل اچ پاکستان توں چاول، ٹیکسٹائل تے کھیݙاں دا سامان درآمد ودھاوݨ چاہندے۔انھاں آکھیا جو کینیڈین کمپنیاں پاکستان اچ قابلِ تجدید توانائی تے کان کنی دے شعبیں اچ وی تعاون ودھیندیاں پئن ۔انھاں جے سی ایم پاور تے کراچی الیکٹرک دے سانجھ نال دھابیجی اچ 240 میگاواٹ دے ہائبرڈ ونڈ تے سولر منصوبے تے بیرک دی ریکوڈک منصوبے اچ سرمایہ کاری دا وی ذکر کیتا۔ انیتا آنند اعلان کیتا جو کینیڈا سرحدی نظم و نسق، انسدادِ دہشت گردی، مالی جرائم دی تحقیقات تے قانون نافذ کرݨ آلے اداریں دی تربیت کیتے 22 لکھ کینیڈین ڈالر توں ودھ ݙیسی ۔ اے منصوبے انٹرپول، اقوامِ متحدہ دے دفترانسدادِ منشیات و جرائم (یو این او ڈی سی) تے رائل کینیڈین ماؤنٹڈ پولیس دے تعاون نال مکمل کیتے ویسن۔ انھاں مزید اعلان کیتا جو کینیڈا پاکستان اچ موسمیاتی تبدیلی نال نبڑݨ، ٻالڑیاں دی تعلیم، تولیدی صحت، خاندانی منصوبہ بندی تے چھل توں بحالی دے منصوبیں کیتے 4 کروڑ 50 لکھ کینیڈین ڈالر دی نویں ترقیاتی امداد ݙیسی۔ اے امداد آغا خان فاؤنڈیشن کینیڈا، اقوامِ متحدہ دے ترقیاتی پروگرام (یو این ڈی پی) تے اقوامِ متحدہ دے پاپولیشن فنڈ (یو این ایف پی اے) دی سانجھ توں خرچ کیتی ویسی۔ کینیڈا دی وزیرخارجہ آکھیا جو اے سارے اقدامات ݙوہیں ملکاں دے ایں سانجھے عزم کوں ظاہر کریندے جو او طویل المدتی خوشحالی، استحکام تے پائیدار چنڳائی کیتے مختلف شعبیں اچ تعاون کوں مزید وسعت ݙیسن۔