اسلام آباد۔20جولائی(اے پی پی) وفاقی وزیر قانون، انصاف و انسانی حقوق سینیٹر اعظم نذیر تارڑ نال اقوامِ متحدہ دی خواتین دی تنظیم دی ایگزیکٹو ڈائریکٹر دے چیف آف اسٹاف محمد نصیری ملاقات کیتی جیں اچ حکومتِ پاکستان تے اقوامِ متحدہ دی خواتین دی تنظیم دے وچال تریمتاں دے حقوق، صنفی مساوات، خواتین وٻالڑیاں کوں بااختیار بݨاوݨ تے جامع طرزِ حکمرانی دے ودھارے کیتے جاری شراکت داری کوں مزید تکڑا بݨاوݨ …
وفاقی وزیر قانون، انصاف وانسانی حقوق سینیٹراعظم نذیر تارڑ نال اقوامِ متحدہ دی خواتین دی تنظیم دی ایگزیکٹو ڈائریکٹر دے چیف آف اسٹاف محمد نصیری دی ملاقات
اسلام آباد۔20جولائی(اے پی پی) وفاقی وزیر قانون، انصاف و انسانی حقوق سینیٹر اعظم نذیر تارڑ نال اقوامِ متحدہ دی خواتین دی تنظیم دی ایگزیکٹو ڈائریکٹر دے چیف آف اسٹاف محمد نصیری ملاقات کیتی جیں اچ حکومتِ پاکستان تے اقوامِ متحدہ دی خواتین دی تنظیم دے وچال تریمتاں دے حقوق، صنفی مساوات، خواتین وٻالڑیاں کوں بااختیار بݨاوݨ تے جامع طرزِ حکمرانی دے ودھارے کیتے جاری شراکت داری کوں مزید تکڑا بݨاوݨ دے امور تے ڳالھ مہاڑ کیتی۔جاری پریس ریلیز موجب اقوامِ متحدہ دی خواتین دی تنظیم دے وفد اچ پاکستان اچ خواتین دے کنٹری نمائندے جمشید ایم قاضی تے ڈپٹی کنٹری نمائندہ فہمیدہ اقبال خان وی شامل ہن۔ وفد دا خیرمقدم کریندیں وفاقی وزیر پاکستان دے نال اقوامِ متحدہ دی خواتین دی تنظیم دے مسلسل تعاون دی تعریف کیتی تے خواتین دے حقوق دے تحفظ، صنفی مساوات دے ودھارے، انصاف تئیں رسائی بہتر بݨاوݨ تے موثر پالیسی سازی کیتے وزارتِ انسانی حقوق تے اقوامِ متحدہ دی خواتین دی تنظیم وچال نیڑے اشتراک تے روشنی پاتی۔ملاقات دے دوران خواتین تے ٻالڑیاں دے خلاف تشدد مکاوݨ متعلق قومی پالیسی تے تھیوݨ آلی پیش رفت دا جائزہ ڳھدا ڳیا جیں کوں اقوامِ متحدہ دی خواتین دی تنظیم دی تکنیکی معاونت توں صوبائی حکومتاں، سول سوسائٹی تے ماہرینِ تعلیم توں وسیع مشاورت دے بعد تیار کیتا ڳئے۔ وفاقی وزیر ایں جامع قومی پالیسی کوں وقتی حتمی شکل ݙیوݨ تے ایں تے موثر عمل درآمد کیتے حکومت دے عزم دا اعادہ کیتا۔ فریقین تھیوݨ آلی سارک کانفرنس تے وی ڳالھ مہاڑ کیتی تے ایں کوں جنوبی ایشیا اچ صنفی مساوات، خواتین دے حقوق تے جامع ترقی دے ودھارے کیتے علاقائی تعاون دا ہک اہم پلیٹ فارم قرار ݙتا۔ملاقات اچ شواہد تے مبنی پالیسی سازی دے ودھارے کیتے پاکستان دے جینڈر ڈیٹا سسٹم کوں مزید مضبوط بݨاوݨ، بین الاقوامی ذمہ واریاں خصوصاً خواتین دے خلاف سارے قسم دے امتیاز کوں مکاوݨ متعلق کنونشن (سی ای ڈی اے ڈبلیو) تے بیجنگ ڈیکلریشن اینڈ پلیٹ فارم فار ایکشن دے تحت رپورٹنگ کوں موثر بݨاوݨ، نیز خواتین دے معاشی بااختیار بݨاوݨ، ڈیجیٹل شمولیت تے ذمہ دارانہ مصنوعی ذہانت دے ودھارے تے وی ڳالھ تھئی۔ملاقات دے دوران محمد نصیری اقوامِ متحدہ دی خواتین دی تنظیم دی ایگزیکٹو ڈائریکٹر دی طرفوں وفاقی وزیر کوں تعریفی خط پیش کیتا جیں اچ حکومتِ پاکستان دی طرفوں نویں او آئی سی وزارتی کانفرنس برائے خواتین دے کامیاب انعقاد، آئندہ ݙو سال کیتے کانفرنس دی چیئرمین شپ سنبھالݨ تے خواتین کوں بااختیار بݨاوݨ تے صنفی مساوات دے ودھارے اچ پاکستان دے قائدانہ کردار دی تعریف کیتی ڳئی ۔ انھاں وزارتِ انسانی حقوق دے نال تعاون کوں مزید ودھارا ݙیوݨ کیتے تنظیم دے عزم دا وی اظہار کیتا۔ ملاقات اچ ݙوہیں فریقاں خواتین کوں بااختیار بݨاوݨ تے پاکستان اچ صنفی مساوات دے ودھارے کیتے سانجھے تعاون کوں مزید وسعت ݙیوݨ دے عزم دا اعادہ کیتا۔
