وزیراعظم شہباز شریف نال کینیڈا دی وزیر خارجہ انیتا آنند دی ملاقات

اسلام آباد۔20جولائی(اے پی پی)وزیراعظم محمد شہباز شریف پاکستان اتے کینیڈا وچال تجارت، سرمایہ کاری، زراعت، ایگری فوڈز اتے ویکسین دی تیاری، قابلِ تجدید توانائی، آٹو موبائل اتے آٹو پارٹس دی صنعت سودھا مختلف شعبیاں اچ تعلقات ٻئے ودھاوݨ دا عزم دوہرائے۔ کینیڈا دی وزیر خارجہ انیتا آنند وزیر اعظم ہاؤس اچ وزیراعظم محمد شہباز شریف نال ملین۔ ایں موقع تے نائب وزیراعظم و وزیر خارجہ سینیٹر محمد اسحاق ڈار، وفاقی وزیر برائے قومی غذائی تحفظ و تحقیق رانا تنویر حسین، وزیراعظم دے مشیر ڈاکٹر سید توقیر شاہ اتے ٻئے اعلیٰ سرکاری حکام وی موجود ہن۔ وزیراعظم کینیڈین وزیر خارجہ کوں پاکستان آوݨ تے خوش آمدید آکھیا اتے عزن دوہرایا جو ݙوہیں ملکاں وچال دوستانہ تعلقات ہین ڄیکوں خاص طور تے تجارت، سرمایہ کاری، زراعت بشمول ایگری فوڈز اتے ویکسین دی تیاری، قابلِ تجدید توانائی، آٹو موبائل اتے آٹو پارٹس دی صنعت دے شعبیاں اچ ٻیا وسعت ݙیوݨ دی لوڑھ اے. وزیراعظم کینیڈا دے وزیراعظم مارک کارنی کیتے آپݨیاں نیک خواہشات پچیندے آکھیا جو انھاں نال تیکھے ملݨ چاہندن۔ انھاں اپریل اچ کینیڈین ہم منصب دے نال تھیوݨ آلی ٹیلی فونک ڳالھ مہاڑ دا ݙسایا اتے خطے اچ امن کوششاں کیتے پاکستان دی حمایت تے کینیڈا دا شکریہ ادا کیا۔ کینیڈا دی وزیر خارجہ انیتا آنند اسلام آباد اچ آپݨے اتے آپݨے وفد دے شاندار استقبال تے وزیراعظم دا شکریہ ادا کیتا۔ انھاں وزیراعظم شہباز شریف کیتے کینیڈین وزیراعظم مارک کارنی دا خیرسگالی دا سنیہا پچیندے آکھیا جو انھاں دا اے دورہ آپݨے وزیراعظم دی ہدایت تے پاکستان نال تعلقات ودھاوݨ کیتے اے۔ ݙوطرفہ تعلقات دے حوالے نال کینیڈین وزیر خارجہ زراعت، معدنیات، توانائی دے علاوہ آٹو تے آٹو پارٹس دی صنعت دے شعبیاں اچ تجارت اتے تعاون دے نویں مواقع ڳولݨ کیتے آپݨی حکومت دی سک ݙسائی اتے آکھیا جو غیر ملکی سرمایہ کاری دے ودھارے و تحفظ دا معاہدہ پاکستان اچ کینیڈا دے سرمایہ کاراں دا اعتماد ودھاوݨ اتے سرمایہ کاری تیکھی کرݨ کیتے اہم ثابت تھیسی۔ ݙوہیں رہنماؤں اتفاق کیتے جو کینیڈا اچ پاکستانی برادری ݙوہیں ملکاں وچال ہک مضبوط پل دا کردار ادا کریندی پئی اے۔ ݙوہیں رہنماواں تجارت اتے معدنیات دے شعبیاں اچ وفود دے تبادلے تے وی اتفاق کیتے تاں جو باہمی فائدے دے مواقع ڳولیے ونڄن اتے ݙوطرفہ تجارت و سرمایہ کاری دے امکانات ودھن۔ ملاقات دے بعد وزیراعظم کینیڈا توں پاکستان کوں کینولا دی درآمد سانڳے فائٹو سینیٹری ضوابط دے پروٹوکول تے دستخط دی تقریب اچ شرکت کیتی جیندے تے نائب وزیراعظم اسحاق ڈار اتے کینیڈا دی وزیر خارجہ انیتا آنند آپݨے آپݨے ملکاں ولوں دستخط کیتے۔