پاکستان تے کینیڈا دا ݙوپاسے رابطے اچ نویں پیش رفت دا خیرمقدم، تجارت، سرمایہ کاری تے عوامی رابطے ودھاوݨ دے ذریعے تعلقات کوں مزید تکڑا بݨاوݨ دے عزم دا اظہار

اسلام آباد۔21جولائی (اے پی پی) پاکستان تے کینیڈا ݙو پاسے رابطے اچ نویں پیش رفت دا خیرمقدم کریندیں تجارت، سرمایہ کاری تے عوامی رابطے ودھاوݨ دے ذریعے تعلقات کوں مزید تکڑا بݨاوݨ دے عزم دا اظہار کیتے۔ وزارتِ خارجہ توں جاری سانجھے اعلامیہ اچ ݙوہیں ملکاں اقتصادی، تعلیمی تے ادارہ جاتی رابطے ودھاوݨ تے زور ݙتا۔ سانجھے اعلامیہ موجب نائب وزیراعظم تے وزیر خارجہ سینیٹر محمد اسحاق ڈار دی دعوت تے کینیڈا دی وزیر خارجہ انیتا آنند 20 جولائی 2026 کوں پاکستان دا سرکاری دورہ کیتا۔ وزیر خارجہ دا عہدہ سنبھالݨ دے بعد اے انھاں دا پاکستان دا پہلا دورہ ہئی۔نائب وزیراعظم و وزیر خارجہ سینیٹر محمد اسحاق ڈار وزارتِ خارجہ اچ کینیڈین وزیر خارجہ انیتا آنند دا خیرمقدم کیتا۔ ݙوہیں رہنماواں وچال ون آن ون ملاقات تے وفد دی سطح تے تفصیلی مذاکرات تھئے، جنھاں اچ پاکستان تے کینیڈا دے ݙوطرفہ تعلقات تے سانجھی دلچسپی دے امور تے ڳالھ کیتی ۔ ݙوہیں فریقاں ݙوطرفہ رابطے اچ نویں پیش رفت دا خیرمقدم کریندیں تجارت، سرمایہ کاری تے عوامی رابطے دے ودھارے دے ذریعے تعلقات کوں مزید تکڑا بݨاوݨ دے عزم دا اظہار کیتا۔نائب وزیراعظم تے وزیر خارجہ کینیڈین وزیر خارجہ کوں خطے اچ جاری جھیڑے دے حوالے نال پاکستان دی ثالثی دی کوششاں دا وی ݙسایا۔ وزیر خارجہ انیتا آنند پاکستان دے ایں کردار دی تعریف کیتی جیں دے نتیجے اچ اسلام آباد مفاہمتی یادداشت طے پاتی۔ ݙوہیں وزراء پائیدار جنگ بندی دی لوڑھ تے اسلام آباد مفاہمتی یادداشت دے تحت کیتے ڳئے وعدیں تے عملدرآمد دی اہمیت تے زور ݙتا۔ انھاں عالمی چیلنجز نال نبڑݨ، امن و خوشحالی دے ودھارے کیتے تعاون جاری رکھݨ دے عزم دا وی اعادہ کیتا۔ݙوہیں رہنماواں فروری 2026 اچ منعقد تھیوݨ آلے ݙوطرفہ مشاورتی اجلاس دے چھیویں دور کوں کامیاب قرار ݙیندیں ایں پلیٹ فارم دی اہمیت دا اعادہ کیتا، تاں جو مشترکہ ترجیحات کوں اڳوں ودھایا ونڄ سڳے تے تزویراتی تعاون دے نویں موقع تلاش کیتے ونڄ سڳن۔ ݙوہیں رہنماواں اقتصادی، تعلیمی تے ادارہ جاتی رابطے دے ودھارے تے زور ݙتا۔ فریقین کینیڈا اچ رہݨ آلے ترئے لکھ توں ودھ پاکستانی نژاد لوکاں تے 9 ہزار توں ودھ پاکستانی طلبہ دی خدمات دی تعریف کریندے عوامی رابطے، ثقافتی تبادلیں، سیاحت تے ݙوہیں ملکاں وچال آونڄ کوں مزید بہتر بݨاوݨ دی لوڑھ تے زور ݙتا۔ انھاں پارلیمانی رابطے دی اہمیت کوں وی تسلیم کیتا تے ݙوہیں ملکاں دی مقننہ وچال تعاون ودھاوݨ تے اتفاق کیتا۔نائب وزیراعظم و وزیر خارجہ محمد اسحاق ڈار تے وزیر خارجہ انیتا آنند تجارت تے سرمایہ کاری کوں سانجھی خوشحالی تے اقتصادی استحکام دا اہم ذریعہ قرار ݙتا۔ ݙوہیں پاکستان۔کینیڈا غیر ملکی سرمایہ کاری دے تحفظ و ودھارے دے معاہدے (FIPA) تے تھیوݨ آلی پیش رفت دا خیرمقدم کیتا تے مذاکرات وقتی مکمل کرݨ کیتے باقاعدہ رابطے جاری رکھݨ تے زور ݙتا۔ ݙوہیں رہنماواں پاکستان۔کینیڈا مشترکہ ورکنگ گروپ تجارت و سرمایہ کاری کوں ول فعال کرݨ تے وی اتفاق کیتا ڄݙاں جو پاکستان اچ کینیڈین سرمایہ کاری دا جائزہ ڳھدا تے صاف توانائی، کان کنی، اہم معدنیات، بنیادی ڈھانچے، زراعت، ابھردی ہوئی ٹیکنالوجیز، ماحولیاتی تحفظ تے پائیداری سودھے ترجیحی شعبیں اچ کاروباری تعاون دے ودھارے تے ڳالھ مہاڑ کیتی۔ انھاں مزید کاروباری وفد دے تبادلیں دا وی خیرمقدم کیتا۔توانائی دے تحفظ تے توانائی دے ذرائع اچ تنوع دی اہمیت کوں تسلیم کریندیں ݙوہیں وزراء شمسی، ہوا تے بیٹری اسٹوریج ٹیکنالوجیز سودھے قابلِ تجدید توانائی دے شعبے اچ سرمایہ کاری دی حوصلہ افزائی تے اتفاق کیتا۔ انھاں ایں امر دا خیرمقدم کیتا جو کینیڈین کمپنی JCM Power دی 240 میگاواٹ دھابیجی ہائبرڈ ونڈ سولر منصوبے کیتے کامیاب ٻولی، جیڑھی کے الیکٹرک دے اشتراک نال اے، کوں سارے ضروری ریگولیٹری منظوری حاصل تھی چکی اے۔ اے اہم سرمایہ کاری پاکستان اچ قابلِ تجدید توانائی ݙیوݨ کردار ادا کریسی۔ݙوہیں وزراء غذائی تحفظ تے خوراک ݙیوݨ کیتے مستحکم منڈی تئیں رسائی دی اہمیت تے اتفاق کیتا۔ انھاں ایں شعبے اچ جاری تعاون دا خیرمقدم کریندیں کینولا، تیل دار بِج، دالاں، سویابین، اناج، چاول، مصالحے تے پھلاں سودھے زرعی تجارت اچ ݙوطرفہ ودھارے دی حوصلہ افزائی کیتی۔ ایں دے علاوہ زرعی خوراک دی ویلیو چین، زرعی ٹیکنالوجی، غذائی تحفظ، حفظانِ صحت تے نباتاتی صحت دے معیارات و ضوابط تے تعاون ودھاوݨ تے زور ݙتا۔ ایں تناظر اچ ݙوہیں رہنماواں کینیڈین کینولا دی درآمد کیتے پیش گوئی دے قابل نباتاتی صحت دی شرطاں تے مبنی نویں پروٹوکول تے دستخط کیتے۔ پاکستان دی نیشنل ایگری ٹریڈ اینڈ فوڈ سیفٹی اتھارٹی، ماحولیاتی تحفظ ایجنسی تے کینیڈین فوڈ انسپیکشن ایجنسی وی تکنیکی تعاون تے استعداد کار ودھاوݨ دے موقع تلاش کریسن۔فریقین عالمی سپلائی چینز اچ اہم معدنیات دی تزویراتی اہمیت تے زور ݙتا۔ پاکستان دے معدنی وسائل تے ذمہ دارانہ کان کنی اچ کینیڈا دی مہارت کوں سامݨے رکھیندیں ݙوہیں ملکاں کان کنی دی پوری ویلیو چین، بشمول معدنی تلاش تے متعلقہ خدمات اچ تجارت و سرمایہ کاری کوں ودھارا ݙیوݨ تے اتفاق کیتا۔ وزیر خارجہ انیتا آنند نائب وزیراعظم و وزیر خارجہ محمد اسحاق ڈار کوں 2027 اچ کینیڈا اچ منعقد تھیوݨ آلی PDAC کانفرنس اچ شرکت دی دعوت وی ݙتی۔ ݙوہیں ملکاں اقوامِ متحدہ سودھے کثیرالجہتی فورمز تے پاکستان تے کینیڈا وچال نیڑے تعاون تے اطمینان دا اظہار کیتا تے ایں کوں مزید اڳوں بڑھاوݨ تے اتفاق کیتا۔ݙوہیں رہنماواں علاقائی امن و سلامتی، شہری آبادی تے معیشت تے ایں دے اثرات، افغانستان دی صورتحال تے دہشت گردی دے جاری خطرے تے وی ڳالھ مہاڑ کیتی ڄݙاں جو فریقین انسدادِ دہشت گردی تے بین الاقوامی منظم جرائم دے خلاف تعاون کوں مزید تکڑا بݨاوݨ تے اتفاق کیتا۔ وزیر خارجہ انیتا آنند اعلان کیتا جو کینیڈا اقوامِ متحدہ، انٹرپول تے ٻئے اداریں دے ذریعے مختلف منصوبیں دے تحت پاکستان دی انسدادِ دہشت گردی دی کوششاں دی حمایت جاری رکھیسی۔موسمیاتی تبدیلی تے غربت جیھے عالمی چیلنجز کوں سامݨےرکھیندیں وزیرخارجہ انیتا آنند تعلیم، موسمیاتی تبدیلی تے صحت دے شعبیں اچ ترقیاتی معاونت دے نویں منصوبیں دا اعلان کیتا۔ ݙوہیں رہنماواں ایں ڳالھ تے اتفاق کیتا جو پاکستان تے کینیڈا دے تعلقات ہک نویں دور اچ داخل تھی چکن، جتھاں ݙوہیں ملک دے مختلف شعبیں وچال تعاون کوں مزید ودھارا ݙیندے سانجھے مفادات کوں ودھارا ݙتا ویسی۔ ݙوہیں فریقاں اعلیٰ سطح دے رابطے کوں مستقل بنیاداں تے جاری رکھݨ تے پیش رفت دا سالانہ جائزہ گھنݨ تے اتفاق کیتا۔