چیئرمین سینیٹ سید یوسف رضا گیلانی دا پارلیمانی سفارتکاری، تجارت تے عوامی رابطے دے ذریعے پاکستان۔کینیڈا تعلقات کوں مزید مستحکم بݨاوݨ تے زور

اسلام آباد۔21جولائی (اے پی پی) چیئرمین سینیٹ سید یوسف رضا گیلانی ایں عزم دا اعادہ کیا جو پاکستان، پارلیمانی سفارتکاری، تجارت دے ودھارے تے عوامی رابطے کوں مزید وسعت ݙے تے کینیڈا دے نال آپݨی پراݨی دوستی اُتے گھن ونجݨ کیتے پرعزم اے۔ کینیڈا دی وزیرِ خارجہ انیتا آنند دے اعزاز اچ منعقدہ استقبالیہ تقریب توں بطورِ مہمانِ خصوصی خطاب کریندیں چیئرمین سینیٹ انیتا آنند کوں پاکستان دے پہلے سرکاری دورے تے خوش آمدید آکھدیں سینیٹ، پارلیمنٹ تے عوامِ پاکستان دی ولوں نیک تمناؤں دا اظہار کیتا۔ انھاں آکھیا جو پاکستان تے کینیڈا وچال تقریباً اٹھ ݙہاکیں تے محیط دوستانہ تعلقات سانجھے احترام، مشترکہ مفادات، تعمیری سیاسی مکالمے، ودھدے اقتصادی تعاون، تعلیمی تبادلیں تے کینیڈا اچ رہݨ آلی متحرک پاکستانی کمیونٹی دی خدمات تے استوار ہن۔انھاں آکھیا جو ݙوطرفہ تجارت پاکستان تے کینیڈا دے تعلقات دا بنیادی ستون اے تے کینیڈا پاکستان دے قابلِ اعتماد اقتصادی شراکت داراں اچ شامل اے۔ انھاں نشاندہی کیتی جو کینیڈا توں درآمد کیتی ونڄݨ آلی زرعی اجناس، خصوصاً کینولا، سویابین تے چݨے، پاکستان دی غذائی سلامتی، زرعی شعبے تے صنعتی ترقی اچ اہم کردار ادا کریندیاں پئن۔ چیئرمین سینیٹ نائب وزیراعظم و وزیر خارجہ سینیٹر محمد اسحاق ڈار تے وزیر خارجہ انیتا آنند دے اوٹاوا اچ تھیوݨ آلے مذاکرات دے مثبت نتائج دی تعریف کریندے آکھیا جو انھاں نال ݙوہیں ملکاں وچال تجارتی تعاون کوں مزید تقویت ملی اے۔ انھاں 12 جنوری 2026 کوں کراچی بندرگاہ تے کینیڈین کینولا دی پہلی کھیپ دی آمد کوں اقتصادی تعاون دے ودھارے دی ہک اہم علامت قرارݙتا۔انھاں آکھیا جو موجودہ عالمی حالات اچ پارلیمانی سفارتکاری دی اہمیت پہلے توں کتھائیں ودھ چکی اے تے پارلیماناں مکالمے، سانجھے اعتماد، امن تے پائیدار ترقی دے ودھارے اچ کلیدی کردار ادا کرسڳدئن۔ بین الپارلیمانی اسپیکرز کانفرنس (آئی ایس سی) دے بانی چیئرمین دی حیثیت نال انھاں کینیڈا کوں ایں فورم اچ فعال شرکت دی دعوت ݙیندیں آکھیا جو پارلیمانی رابطے دا ودھارا ݙوہیں ملکاں دے تعلقات کوں مزید تکڑا بݨاوݨ تے مشترکہ عالمی چیلنجز نال نبڑݨ اچ معاون ثابت ہوسی۔ چیئرمین سینیٹ توانائی، صاف ٹیکنالوجی، کان کنی، انفارمیشن ٹیکنالوجی، ٹیکسٹائل، سرمایہ کاری تے اختراع جیھے شعبیں اچ تعاون دے وسیع امکانات دی نشاندہی کریندیں آکھیا جو کینیڈا دی جدید تکنیکی مہارت تے پاکستان دی نوجوان افرادی قوت، ایں دا اسٹریٹجک محلِ وقوع تے وسیع صارفین دی منڈی ݙوہیں ملکاں کیتے سانجھے مفاد تے مبنی شراکت داری دے بے شمار موقع ݙیندی اے۔ انھاں ایں امید دا اظہار کیتا جو وزیر خارجہ انیتا آنند دا اے دورہ پاکستان تے کینیڈا  وچال پراݨی دوستی کوں مزید مستحکم کریسی تے مختلف شعبیں اچ تعاون دے نویں رستے ہموار کریسی۔آپݨے خطاب دے چھیکڑ اچ چیئرمین سینیٹ کینیڈا دے سابق وزیراعظم تے نوبیل امن انعام یافتہ لیسٹر بی پیئرسن دا قول نقل کریندیں آکھیا جو ’’پائیدار امن صرف اقوام وچال بہتر باہمی فہم و ادراک توں ہی ممکن اے۔‘‘ انھاں آکھیا جو اے پیغام اڄ وی اتنا ہی مؤثر اے، کیوں جو مضبوط بین الاقوامی شراکت داریاں صرف معاہدیں توں نئی بلکہ اعتماد، مکالمے تے مضبوط انسانی رابطے توں قائم تھیندن۔ انھاں پاکستان دے ایں عزم دا اعادہ کیتا جو کینیڈا دے نال تعلقات کوں مزید وسعت ݙتی ویسی تے ݙوہیں ملکاں دی شراکت داری آوݨ آلے سالاں اچ مزید مستحکم تھیسی۔بعد اچ چیئرمین سینیٹ سید یوسف رضا گیلانی اسلام آباد اچ کینیڈا دی وزیر خارجہ محترمہ انیتا آنند تے انھاں دے وفد نال ملاقات کیتی۔ ایں موقع تے انھاں پارلیمنٹ تے عوامِ پاکستان دی ولوں وزیر خارجہ دا خیرمقدم کریندیں ایں امید دا اظہار کیا جو انھاں دا دورہ ݙوہیں ملکاں وچال ݙوطرفہ تعاون تے پارلیمانی رابطے کوں مزید ودھارا ݙیوݨ دا باعث بݨسی۔