وزیراعظم شہباز شریف دا وزیراعظم دفتر اچ مصنوعی ذہانت تے مبنی جدید ٹریکنگ تے فیصلہ سازی نظام دا افتتاح، روایتی فائل نظام ختم، جدید نظام تے ساریاں وزارتاں عملدرآمد یقینی بݨاون، شہباز شریف دی ہدایت

اسلام آباد۔21جولائی (اے پی پی) وزیراعظم محمد شہباز شریف وزیراعظم دفتر اچ مصنوعی ذہانت تے مبنی جدید ٹریکنگ تے فیصلہ سازی نظام دا افتتاح کر ݙتے جیں دا مقصد وزیراعظم دی ہدایات تے عملدرآمد، پیشرفت تے نگرانی کوں ٹریک کرݨ اے تاں جو خودکار احتسابی نظام دے نال فیصلہ سازی دا عمل تکھا تھیوے تے وزیراعظم دی ہدایات تے حکومتی پالیسیاں دا موثر نفاذ یقینی، وقتی تے معیاری بݨایا ونڄ سڳے۔ مصنوعی ذہانت (اے آئی) تے مبنی جدید ترین ٹریکنگ تے فیصلہ سازی دے نظام دے افتتاح دی تقریب اتھاں وزیراعظم دفتر اچ تھئی۔ تقریب توں خطاب کریندیں وزیراعظم مصنوعی ذہانت تے مبنی جدید ٹریکنگ تے فیصلہ سازی دے نظام تے مکمل عملدرآمد دی ہدایت کیتی تے آکھیا جو اڄ دے بعد کوئی روایتی فائل نظام نہ ہوسی، عوامی فلاح و بہبود تے خدمت کوں یقینی بݨاوݨ کیتے ایں نظام دا مکمل نفاذ یقینی بݨایا ونڄے۔وزیراعظم ایں نظام دی تیاری تے فعالیت کیتے وفاقی وزراء احد خان چیمہ، شزا فاطمہ خواجہ تے متعلقہ حکام دی تعریف کیتی۔ انھاں ہدایت کیتی جو ساریاں وزارتاں ایں نظام کوں اختیار کریندیں ایں دے تحت امور سرانجام ݙیون۔ انھاں آکھیا جو ہݨ روایتی انداز اچ فائلاں گھن تے گھمݨ دی لوڑھ کائنی، سارے امور ایں جدید نظام دے ذریعے نبیڑئے ویسن۔ ایں موقع تے وفاقی وزیراحد خان چیمہ آکھیا جو جدید طرزِ حکمرانی کیتے مصنوعی ذہانت تے ڈیٹا تے مبنی نظام فعال کر ݙتا ڳئے۔ انھاں آکھیا جو اے جدید نظام حکومتی فیصلیں اچ شفافیت تے وقتی اقدامات دے حوالے نال ٻہوں اہم اے۔ انھاں آکھیا جو وزیراعظم دی ہدایت دی روشنی اچ فیصلہ سازی اچ جدید ٹیکنالوجی بروئے کار گھن آئی ویندی پئی اے، موثر پالیسی سازی تے ڈیٹا تے مبنی نتیجے کیتے اے نظام ٻہوں اہم اے۔انھاں آکھیا جو پراݨے نظام اچ سارے تقاضے پورے نی تھیندے تے آؤٹ پٹ توں مکمل استفادہ نہ کیتا ونڄ سڳدا ہئی، ایں کیتے اِنھاں خامیاں کوں دور کریندیں ہوئیں اے جدید نظام متعارف کرایا ڳئے، پراݨے نظام اچ کئی اقدامات تے عوامل موجود کائنی جنھاں کوں ایں نویں نظام دا حصہ بݨایا ڳئے۔ وفاقی وزیر آئی ٹی شزہ فاطمہ خواجہ وزیراعظم آفس سسٹم متعلق بریفنگ اچ ݙسایا جو وزیراعظم محمد شہباز شریف بطور وزیراعلیٰ ماضی اچ ڈیجیٹائزیشن دا آغاز کیتا ہئی جیں دے بعد ہݨ اساں ڈیجیٹل توں اے آئی دے پاسے ٹردے پیوں تے سارے شعبیں اچ جدید ٹیکنالوجی بروئے کارگھن آندے پیوں ، سماجی تحفظ دے ساریں توں وݙے پروگرام کوں وی ڈیجیٹائز کر ݙتا ڳئے۔ انھاں آکھیا جو پیپر لیس طرزِ حکمرانی دی طرف ویندے پیوں، وزیراعظم دفتر سسٹم توں کارکردگی تے خود احتسابی دا عمل بہتر تھیسی۔وزیراعظم کوں ایں جدید نظام دے بارے اچ ݙتی ڳئی بریفنگ موجب ’’وزیراعظم دفترسسٹم‘‘ (پی ایم او ایس) پاکستان دا پہلا مصنوعی ذہانت نال چلݨ آلا نظام اے، اے وزیراعظم دفتردا سرکاری ڈیجیٹل پلیٹ فارم اے جیں دا مقصد وزیراعظم دے احکامات جاری تھیوݨ توں گھن تے انھاں تے عملدرآمد، انھاں دی تکمیل تے تکمیل دے بعد نگرانی تئیں سارے امور دی انجام دہی دا خودکار نظام متعارف کراوݨ اے۔ اے نظام گورننس تے شفافیت کیتے سنگِ میل تے حکومت دی معاشی ترجیحات تے خدمات ݙیوݨ دے ضمن اچ ٻہوں کارآمد ثابت تھیسی۔ ایں نظام دے ذریعے وزیراعظم دی طرفوں انھاں دے احکامات دی ڈیڈ لائنز دی نشاندہی تے انھاں کوں اجاگر کرݨ اچ مدد ملسی تے وزارتاں دی جوابدہی تے کارکردگی کوں بہتر بݨاوݨ اچ مدد ملسی۔