وفاقی وزیرریلوے نال ایران دے وزیر داخلہ دی اعلیٰ سطح دے وفد دے رلے اہم ملاقات

اسلام آباد۔22جولائی (اے پی پی) وفاقی وزیرریلوے محمد حنیف عباسی نال ایران دے وزیر داخلہ اسکندر مومنی اعلیٰ سطح دے وفد دے رلے اہم ملاقات کیتی، جیں اچ پاکستان اچ ایران دے سفیر ڈاکٹر رضا امیری مقدم وی موجود ہن، ملاقات اچ ݙوہیں ملکاں وچال ریلوے تعاون، سرحد پار رابطیں تے سانجھی تجارت دے ودھارے تے تفصیلی ڳالھ مہاڑ کیتی ڳئی ۔ ایں موقع تے اسلام آباد-تہران-استنبول (آئی ٹی آئی) فریٹ ٹرین سروس دی بحالی تے ڳالھ سودھے 1959 دے ݙوطرفہ ریلوے معاہدے تے 2025 دے فریم ورک آف کوآپریشن دے تحت تکنیکی و تجارتی رابطے مزید ودھاوݨ دے عزم دا اعادہ کیتا ڳیا۔ایں موقع تے وفاقی وزیر ریلوے حنیف عباسی آکھیا جو مین لائن-3، پاکستان تے ایران وچال ریلوے رابطے دا بنیادی کوریڈور اے۔ ایں اہم لائن دی اپ گریڈیشن دا کم ایں مالی سال اچ شروع تھیوݨ دی توقع اے جیڑھا دسمبر 2029 تئیں مکمل ہوسی، جیں توں علاقائی تجارت کوں ودھارا ملسی۔ انھاں ݙسایا جو ایرانی ریلوے دی درخواست تے تفتان ریلوے اسٹیشن کوں ‘کسٹمز کلیئرنس اسٹیشن’ دا درجہ ݙے ݙتا ڳئے تاں جو سرحد پار مال برداری اچ سوکھ تھیوے۔ حنیف عباسی زاہدان-تفتان سیکشن دی بحالی تے ایرانی اقدامات دی تعریف کیتی تے اڄوکے بحران دے دوران ایرانی قوم، سپریم لیڈر تے قیادت دی استقامت کوں خراجِ تحسین پیش کریندیں شہداء کوں عقیدت پیش کیتی۔ایرانی وزیر داخلہ اسکندر مومنی گرمجوش میزبانی تے شکریہ ادا کریندیں آکھیا جو پاک ایران تعلقات تاریخی تے گھاٹے ہن، جیڑھے گزریل سالاں اچ مثالی سطح تئیں پُڄن۔ انھاں اڄوکی کشیدگی دے دوران پاکستان دی غیر متزلزل حمایت، بالخصوص وزیراعظم شہباز شریف تے فیلڈ مارشل سید عاصم منیر دی مؤثر سفارتی کوششاں تے مخلصانہ کوششاں کوں شاندار الفاظ اچ خراجِ تحسین پیش کیتا۔ ایرانی وزیر داخلہ دا آکھݨ ہئی جو اوکھے ویلھے پاکستان دے ایں برادرانہ تے مخلصانہ کردار کوں ایرانی قوم ہمیشہ قدر دی نگاہ نال ݙیکھسی تے یاد رکھیسی