جیڑھیاں قوماں تعلیم، سائنسی تحقیق تے انسانی وسائل اچ سرمایہ کاری کریندن، مستقبل دی قیادت وی اوکریندن، اعظم نذیر تارڑ

اسلام آباد۔22جولائی (اے پی پی) وفاقی وزیر قانون و انصاف تے انسانی حقوق سینیٹر اعظم نذیر تارڑ آکھیے جو جیڑھیاں قوماں تعلیم، سائنسی تحقیق تے انسانی وسائل اچ سرمایہ کاری کریندن، مستقبل دی قیادت وی اوہے کریندن، مسلم دنیا کوں ترقی، خود انحصاری، پائیدار مستقبل تے سانجھی خوشحالی کیتے علم، تحقیق، جدت تے ٹیکنالوجی تے مبنی  سانجھی حکمتِ عملی اختیار کرݨی ہوسی، ڄݙاں جو معیاری تعلیم ہربندے دا بنیادی انسانی حق اے تے ایہو پائیدار ترقی، تکڑے اداریں تے بااختیار معاشرے دی بنیاد اے۔انھاں اے ڳالھ اسلام آباد اچ او آئی سی دی وزارتی قائمہ کمیٹی سائنسی و تکنیکی تعاون (کامسٹیک) دے زیرِاہتمام منعقدہ بین الاسلامی فورم تعلیم، سائنسی تحقیق تے جدت توں بطورِ مہمانِ خصوصی خطاب کریندیں آکھی۔ فورم اچ او آئی سی دے اداریں دے نمائندگان، مختلف اسلامی ملکاں دے سفیر، کینیا دے منڈیرا کاؤنٹی دے گورنر محمد عدن خلیف، ملائیشیا دے سینیٹر توان جزیری الکاف، کامسٹیک دے اعزازی مشیر پروفیسر ڈاکٹر شاہد محمود، بحریہ یونیورسٹی دے ریکٹر وائس ایڈمرل (ر) عابد حمید، مختلف جامعات دے وائس چانسلرز، ممتاز سائنسداناں، محققین، ماہرینِ تعلیم، اسکالرز تے او آئی سی دے رکن ملکاں دے وفود شرکت کیتی۔تقریب دے شروع اچ کامسٹیک دے کوآرڈینیٹر جنرل پروفیسر ڈاکٹر محمد اقبال چوہدری وفاقی وزیر دا خیرمقدم کریندیں پاکستان کوں نویں او آئی سی وزارتی کانفرنس تریمت دی کامیاب میزبانی تے آندے ݙو اسلاں کیتے ایں دی چیئرمین شپ سنبھالݨ تے مبارخ ݙتی۔ آپݨے خطاب اچ وفاقی وزیرسینیٹر اعظم نذیر تارڑ آکھیا جو تعلیم صرف ترقی دا ذریعہ نئی بلکہ بنیادی انسانی حق وی اے۔ تعلیم خصوصاً تریمتاں تے نینگراں کوں بااختیار بݨیندی، برابر دے موقع ݙیندی، اداریں کوں تکڑی کریندی اے تے مستقبل دے سائنسداناں، موجد، کاروباری رہنماواں تے قائدین دی تیاری اچ بنیادی کردار ادا کریندی اے۔ انھاں آکھیا جو پاکستان دا آئین انسانی وقار، مساوات تے تعلیم دے ودھارے دی ضمانت ݙیندے، ایں کیتے معیاری تعلیم تئیں رسائی آئینی ذمہ واری دے نال نال انسانی حقوق دا وی تقاضا اے۔ انھاں آکھیا جو مسلم دنیا کوں موجودہ عالمی چیلنجز دا مقابلہ کرݨ کیتے سانجھے تعاون، سائنسی تحقیق، اختراع، جدید ٹیکنالوجی، تعلیمی تبادلیں تے انسانی وسائل دی ترقی تے خصوصی توجہ ݙیوݨی ہوسی۔ انھاں دا آکھݨ ہئی جو جیڑھے ملک تعلیم، تحقیق تے انسانی سرمایہ اچ سرمایہ کاری کریندن، اوہے مستقبل اچ عالمی قیادت دے منصب تے فائز تھیندن۔