وفاقی وزیرخزانہ محمد اورنگزیب دی واشنگٹن ڈی سی اچ آئی ایم ایف دے اعلیٰ حکام، پاکستان کیتے مشن چیف نال انڄ انڄ ملاقاتاں

واشنگٹن ڈی سی۔23جولائی (اے پی پی)وفاقی وزیر خزانہ و محصولات محمد اورنگزیب واشنگٹن ڈی سی اچ آئی ایم ایف دے فرسٹ ڈپٹی منیجنگ ڈائریکٹر ڈین کٹز، ڈپٹی منیجنگ ڈائریکٹر نائجل کلارک، آئی ایم ایف دے مشرقِ وسطیٰ تے وسطی ایشیا دے شعبے دے ڈائریکٹر جہاد ازور تے پاکستان کیتے مشن چیف ایوا پیٹرووا نال انڄ انڄ ملاقاتاں کیتیاں، ملاقاتاں اچ پاکستان دی میکرواکنامک صورتحال، ایکسٹینڈڈ فنڈ فیسلٹی (ای ایف ایف)، ریزیلیئنس اینڈ سسٹین ایبلٹی فیسلٹی (آر ایس ایف) تے فنڈ دے تحت جاری پروگرام دی پیش رفت تے تفصیلی ڳالھ کیتی ڳئی۔وزارتِ خزانہ ولوں جاری پریس ریلیز موجب وزیر خزانہ پاکستان دی بہتر مالی صورتحال، ٻاہرلے معاملات اچ توازن، محصولات دے اہداف دے حصول، مضبوط زرمبادلہ دے ذخیرے، ریکارڈ ترسیلات تے کرنٹ اکاؤنٹ دی بہتر صورتحال کوں خصوصی طور تے اجاگر کیتا۔ ڳالھ مہاڑ اچ ٹیکس تے توانائی دی اصلاحات، نجکاری، ٹیرف ریشنلائزیشن، قرضیں دے انتظام، مالیاتی ذرائع اچ تنوع تے بین الاقوامی کیپٹل مارکیٹاں اچ پاکستان دی واپسی دا احاطہ کیتا ڳیا۔فریقاں ہیومن کیپٹل ڈویلپمنٹ، تریمتاں دی معاشی شراکت داری، آبادی متعلق چیلنجز، ٹیکنالوجی تے مبنی گروتھ تے نجی شعبے دی قیادت اچ ایکسپورٹ تے مبنی ترقی تے اظہارِ خیال کیتا۔وزیر خزانہ محمد اورنگزیب عالمی مالیاتی فنڈ ولوں پاکستان اچ اصلاحاتی ایجنڈے کوں یکسوئی نال جاری رکھݨ تے فنڈ نال اتفاق شدہ پروگرام تے عمل پیرا ہووݨ دا اعتراف کرݨ تے انتظامیہ دا شکریہ ادا کیتا۔ وزیر خزانہ حکومت ولوں مالیاتی نظم و ضبط، پالیسی دی ساکھ کوں یقینی بݨاوݨ، سٹرکچرل اصلاحات تے طویل المدتی اقتصادی تبدیلی دے حوالے نال حکومت دے عزم دا اعادہ کیتا