ریلوے سسٹم کوں جدید بݨاوݨ تے مالی استحکام کیتے 10 سالہ روڈ میپ تے کم شروع کر ݙتا اے، محمد حنیف عباسی

اسلام آباد۔23جولائی (اے پی پی) حکومتِ پاکستان ریلوے دے نظام کوں جدید تقاضیں نال ہم آہنگ تے مالی طور تے مستحکم بݨاوݨ کیتے 2033 تئیں دے جامع سٹریٹجک روڈ میپ تے باقاعدہ کم شروع کر ݙتے، ایں 10 سالہ منصوبے دے تحت مین لائن 1 تے مین لائن 3 دی اپ گریڈیشن، علاقائی مواصلاتی رابطیں اچ بہتری تے ریلوے دے سارے شعبوں دی جدید ڈیجیٹلائزیشن جیویں بنیادی تے کلیدی منصوبیں تے پیش رفت تکھے جاری اے۔اے ڳاھ انہاں وفاقی وزیر ریلوے محمد حنیف عباسی اسلام آباد اچ “اُڑان پاکستان” پروگرام دے تحت پاکستان ریلوے متعلق منعقدہ خصوصی گول میز کانفرنس نال خطاب کریندیں آکھی۔ انھاں آکھیا جو مالی سال 2025-26 دے دوران پاکستان ریلوے 115 ارب روپے دی ریکارڈ آمدݨ حاصل کیتی، ادارے دی مجموعی آمدݨ اچ 24.2 فیصد ودھارا تھیا تے آپریٹنگ ریشو 96 فیصد توں گھٹ تھی تے 84 فیصد تے آڳئے۔ انھاں ݙسیا جو مال برداری توں حاصل تھیوݨ آلی آمدݨ 32 ارب روپے توں ودھ تے 41 ارب روپے تک پڄ ڳئی تے پراپرٹی و لینڈ ریونیو اچ 113 فیصد دی تاریخی پیش رفت تھئی اے۔وزیر ریلوے فورم دے انعقاد تے وزیر منصوبہ بندی پروفیسر احسن اقبال دا شکریہ ادا کریندیں آکھیا جو ریلوے دی بحالی صرف ٹرانسپورٹ دا نی بلکہ قومی معاشی ترقی دا منصوبہ اے۔ محمد حنیف عباسی آکھیا جو پاکستان ریلوے دا وݙا حصہ اپݨی معاشی تے تکنیکی عمر پوری کر چکئے کیوں جو ماضی اچ ایں تے مطلوبہ سرمایہ کاری نی کیتی ڳئی۔ انھاں ݙسیا جو تھر کول ریلوے کنیکٹیوٹی منصوبے تے 60 فیصد کم مکمل تھی چکئے جیڑھا دسمبر 2026 تئیں مکمل کر ڳھدا ویسی۔وفاقی وزیر زور ݙتا جو ڈیجیٹل ٹکٹنگ، سمارٹ سٹیشنز، ای آر پی سسٹمز تے نجی شعبے دی شمولیت دے ذریعے ریلوے کوں محفوظ تے مالی طور تے مستحکم ادارہ بݨایا ویندا پئے۔ انھاں آکھیا جو ریلوے تے خرچ تھیوݨ آلا پیسہ خرچے نی بلکہ ملک دے مستقبل اچ سرمایہ کاری اے، حکومت اِینکوں ول قومی ترسیل دی ریڑھ دی ہڈی بݨاوݨ کیتے مکمل طور تے پرعزم اے۔