وفاقی وزیر موسمیاتی تبدیلی ڈاکٹر مصدق ملک دی ترکیہ دی نائب وزیر ماحولیات نال ملاقات، کوپ 31 دے حوالے نال سانجھے وژن تے ترجیحات تے ڳالھ مہاڑ

شاماخی، آذربائیجان۔23جولائی (اے پی پی) وفاقی وزیرموسمیاتی تبدیلی و ماحولیاتی ہم آہنگی ڈاکٹر مصدق ملک ترکیہ دی نائب وزیر ماحولیات، شہری آبادکاری و موسمیاتی تبدیلی تے آئندہ اقوامِ متحدہ دی موسمیاتی کانفرنس (کوپ 31) دی صدر فاطمہ ورنک نال ملاقات کیتی، جیں اچ کانفرنس دے حوالے نال مشترکہ وژن تے ترجیحات تے ڳالھ مہاڑ کیتی ڳئی ، جیں دی میزبانی اڄوکے سال ترکیہ کریسی۔ترجمان وزارتِ موسمیاتی تبدیلی موجب کوپ 31 ہیڈز آف ڈیلیگیشنز ریٹریٹ دے موقع تے ݙوہیں ملکاں کانفرنس توں پہلے مشترکہ پروگرامز شروع کرݨ تے اتفاق کیتا، جِنھاں اچ بالخصوص الیکٹرک گاݙیاں، بجلی دے استعمال دے ودھارے، توانائی دی کارکردگی اچ بہتری تے ری سائیکلنگ دی صنعت دے استحکام تے توجہ مرکوز کیتی ویسی۔ڈاکٹر مصدق ملک ترک وفد کوں وزارتِ موسمیاتی تبدیلی و ماحولیاتی ہم آہنگی دے زیرِ غور ݙو اہم اقدامات، گرین فیلڈ پروگرام تے گرین یونیورسٹی دے بارے بریفنگ ݙتی۔ گرین فیلڈ پروگرام دا مقصد گرین اسٹارٹ اَپت دے انقلاب کوں ودھارا ݙیوݨ تے نوجوان کاروباری لوکاں کوں موسمیاتی تبدیلی نال نبڑݨ کیتے جدید تے پائیدار حل تیار کرݨ اچ معاونت ݙیوݨ اے، جݙاں جو گرین یونیورسٹی کوں عالمی سطح تے تحقیق، طلبہ تے فیکلٹی دے تبادلے دا ہک پلیٹ فارم بݨاوݨ دی تجویز اے، جیں دے ذریعے تجارتی طور تے قابلِ عمل تحقیق تے جدت کوں ودھارا ݙتا ونڄ سڳسی۔ݙوہیں طرفوں ڳالھ تے اتفاق کیتا ڳیا جو کوپ 31 دے موقع تے انھاں اقدامات دے حوالے نال اہم اعلانات کیتے ویسن تے انھاں شعبیں اچ پاکستان تے ترکیہ وچال مزید نیڑے تعاون دے امکانات ڳولئے ویسن۔ وفاقی وزیر ڈاکٹر مصدق ملک وزیراعظم پاکستان دی طرفوں صدرِ جمہوریہ ترکیہ تے خاتونِ اول کیتے نیک خواہشات تے گرمجوش سلام وی پیش کیتا۔ انھاں موسمیاتی تبدیلی نال نبڑݨ تے موثر موسمیاتی اقدامات دے ودھارے کیتے خاتونِ اول دی خصوصی دلچسپی تے قیادت دی تعریف کیتی۔