وفاقی وزیر تجارت نال میٹا دے وفد دی ملاقات

اسلام آباد۔23جولائی (اے پی پی) وفاقی وزیر تجارت جام کمال خان نال میٹا دے وفد ملاقات کیتی۔ وزارت توں جاری بیان موجب ملاقات اچ ڈیجیٹل معیشت، مصنوعی ذہانت تے ای کامرس دے شعبیں اچ تعاون تے ڳالھ مہاڑ کیتی ڳئی۔وفاقی وزیر تجارت جام کمال خان میٹا کوں پاکستان دی ڈیجیٹل معیشت تے مصنوعی ذہانت دے شعبے اچ شراکت داری دی دعوت ݙتی۔ وفاقی وزیر ہک ہزار پاکستانی ایس ایم ایز کوں اے آئی تے ڈیجیٹل بزنس ٹریننگ ݙیوݨ دے میٹا پروگرام دا خیرمقدم کیتا۔ انھاں آکھیا جو حکومتِ پاکستان ای کامرس تے مصنوعی ذہانت دی جامع پالیسیاں کوں حتمی شکل ݙیندی پئی اے، پاکستانی کاروباراں کوں عالمی منڈیاں تئیں رسائی کیتے مصنوعی ذہانت تے ڈیجیٹل پلیٹ فارمز توں بھرپور فیدہ چاوݨا پوسی۔جام کمال خان آکھیا جو وزارتِ تجارت میٹا کوں چیمبرز آف کامرس، تجارتی تنظیماں تے کاروباری ایسوسی ایشنز نال رابطے اچ ہر ممکن تعاون کریسی۔ میٹا پاکستان اچ ہک ہزار ایس ایم ایز کوں مصنوعی ذہانت، ڈیجیٹل مارکیٹنگ تے آن لائن کاروباری مہارتاں دی مفت تربیت ݙیسی۔ جام کمال آکھیا جو محفوظ ڈیجیٹل ادائیگیاں دا نظام ای کامرس دے ودھارے تے صارفین دے اعتماد کیتے ناگزیر اے، پاکستان دی نوجوان آبادی تے تکھے ودھدی ڈیجیٹل معیشت عالمی ٹیکنالوجی کمپنیاں کیتے بہترین موقع ݙیندی اے۔ انھاں آکھیا جو میٹا دا ایس ایم ای ٹریننگ پروگرام اگست توں نومبر تئیں جاری رہسی، جیں اچ خواتین کاروباری لوکاں تے چھوٹے شہراں دے کاروباراں کوں وی خصوصی طور تے شامل کیتا ویسی۔