اسلام آباد۔23جولائی (اے پی پی) وزیراعظم محمد شہباز شریف سعودی عرب دے ولی عہد شہزادہ محمد بن سلمان کوں یقین ݙوائے جو پاکستان امن، سلامتی، استحکام تے بحیرۂ احمر، آبنائے ہرمز تے وسیع تر خطے اچ قانونی سمندری تجارت دی بلاتعطل روانی کیتے سعودی عرب تے عالمی برادری نال نیڑے تعاون جاری رکھیسی۔وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف سعودی عرب دے ولی عہد …
وزیراعظم دی سعودی ولی عہد نال ٹیلی فونک ڳالھ مہاڑ، قانونی سمندری تجارت دی بلاتعطل روانی کیتے مملکت تے عالمی برادری نال نیڑے تعاون جاری رکھݨ دے عزم دا اعادہ
اسلام آباد۔23جولائی (اے پی پی) وزیراعظم محمد شہباز شریف سعودی عرب دے ولی عہد شہزادہ محمد بن سلمان کوں یقین ݙوائے جو پاکستان امن، سلامتی، استحکام تے بحیرۂ احمر، آبنائے ہرمز تے وسیع تر خطے اچ قانونی سمندری تجارت دی بلاتعطل روانی کیتے سعودی عرب تے عالمی برادری نال نیڑے تعاون جاری رکھیسی۔وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف سعودی عرب دے ولی عہد تے وزیراعظم شہزادہ محمد بن سلمان بن عبدالعزیز آل سعود نال فون تے ڳالھ مہاڑ کیتی۔ انتہائی خوشگوار ماحول اچ تھئی ایں ڳالھ مہاڑ دے دوران وزیراعظم بحیرۂ احمر اچ سعودی آئل ٹینکرز تے حوثی ملیشیا دے بزدلانہ حملیں دی شدید ترین الفاظ اچ مذمت کیتی۔ انھاں آکھیا جو ایجھے اقدامات قطعی طور تے ناقابلِ قبول تے بین الاقوامی قانون دی صریح خلاف ورزی ہن۔وزیراعظم آکھیا جو اے اقدامات جہاز رانی تے تجارتی نقل و حمل دی آزادی کیتے خطرہ تے علاقائی امن، سلامتی تے استحکام کوں ضیان پُڄیندن۔ انھاں بھرا ملک سعودی عرب دے نال پاکستان دی مکمل یکجہتی دا اعادہ کریندیں آکھیا جو او خود، فیلڈ مارشل سید عاصم منیر تے پوری پاکستانی قوم ایں نازک ویلھے اچ سعودی قیادت تے مملکت دے بھرا عوام دے نال مضبوطی تے عزم دے نال کھڑن ۔ انھاں مملکت سعودی عرب دی سلامتی، خودمختاری، علاقائی سالمیت تے خوشحالی کیتے پاکستان دی غیر متزلزل حمایت دا اعادہ کیتا۔وزیراعظم ولی عہد شہزادہ محمد بن سلمان کوں یقین ݙوایا جو پاکستان امن، سلامتی، استحکام، بحیرہ احمر، آبنائے ہرمز تے وسیع تر خطے اچ قانونی سمندری تجارت دی بلاتعطل روانی کیتے مملکت تے عالمی برادری نال نیڑے تعاون جاری رکھیسی۔ انھاں خادم الحرمین الشریفین شاہ سلمان بن عبدالعزیز آل سعود کیتے وی نیک خواہشات تے خیر سگالی دے جذبات دا اظہار کیتا۔ ولی عہد شہزادہ محمد بن سلمان پاکستان دی مستقل حمایت تے ݙوہیں ملکاں وچال نیڑے برادرانہ تعلقات دی تعریف کیتی۔
