ملک اچ تربیت یافتہ نرسنگ افرادی قوت دی ودھدی ضرورت کوں پورا کرݨ کیتے موثر تے وقتی اقدامات یقینی بݨائے ویسن، مصطفیٰ کمال

اسلام آباد۔23جولائی (اے پی پی) وفاقی وزیر صحت سید مصطفیٰ کمال آکھیے جو ملک اچ تربیت یافتہ نرسنگ افرادی قوت دی ودھدی ضرورت کوں پورا کرݨ کیتے موثر تے وقتی اقدامات یقینی بݨائے ویسن۔ اے الھ انہاں ہک اہم اجلاس دی صدارت کریندیں آکھی ۔اجلاس اچ ایشین ڈویلپمنٹ بینک دے نمائندیں پاکستان اچ ویکسین ڈویلپمنٹ منصوبے، مقامی سطح تے ویکسین دی تیاری اچ جاری پیش رفت تے پاکستان نرسنگ اینڈ مڈوائفری کونسل دی ڈیجیٹائزیشن تے اصلاحاتی اقدامات تے تفصیلی بریفنگ ݙتی۔وفاقی وزیر صحت مصطفیٰ کمال ہدایت کیتی جو پاکستان اچ مقامی ویکسین پروڈکشن دے منصوبے تے پیش رفت کوں مزید تکھا کیتا ونڄے تاں جو ملک ویکسین دی مقامی تیاری اچ خود کفالت دے پاسے تکھے اڳوں ودھ سڳے۔ انھاں آکھیا جو ایں مقصد کیتے سارے ریگولیٹری، قانونی تے تکنیکی تقاضے وتی مکمل کیتے ونڄن۔اجلاس اچ نرسنگ دے شعبے اچ اصلاحات دا وی تفصیلی جائزہ ڳھدا ڳیا۔ وفاقی وزیر صحت آکھیا جو نرسنگ دے شعبے اچ جامع اصلاحات ویلھے دی اہم لوڑھ ہن تے پاکستان نرسنگ اینڈ مڈوائفری کونسل دے نظام کوں مکمل طور تے ڈیجیٹائز کیتا ونڄے۔ انھاں ہدایت کیتی جو نرسنگ کونسل کوں بین الاقوامی معیار موجب جدید خطوط تے استوار کیتا ونڄے تاں جو پیشہ ورانہ معیار تے خدمات اچ بہتری آنی ونڄ سڳے۔ مصطفیٰ کمال مزید آکھیا جو ملک اچ تربیت یافتہ نرسنگ افرادی قوت دی ودھدی ضرورتاں کوں پورا کرݨ کیتے موثر تے وقتی اقدامات یقینی بݨائے ونڄن۔اجلاس دے دوران ایشین ڈویلپمنٹ بینک دے نمائندیں حکومتِ پاکستان دے نال صحت دے شعبے اچ تعاون جاری رکھݨ دے عزم دا اعادہ کیتا تے یقین ݙیوائے جو بینک شعبۂ صحت دی بہتری کیتے ہر ممکن معاونت ݙیندا رہسی۔ اجلاس اچ فیڈرل سیکرٹری صحت، چیف انفارمیشن افسر (CIO) وزارتِ صحت، چیف انفارمیشن افسرڈریپ (DRAP) تے ایشین ڈویلپمنٹ بینک (ADB) دے نمائندیں شرکت کیتی۔ وفاقی وزیر صحت مصطفیٰ کمال صحت دے شعبے اچ ایشین ڈویلپمنٹ بینک دے مسلسل تعاون دی تعریف کریندے ایں شراکت داری کوں پاکستان دے صحت دے نظام دی مضبوطی کیتے اہم قرار ݙتا۔