وزیر اعظم محمد شہباز شریف دی اڳواݨی اچ آئی ٹی شعبے دے سٹرٹیجک روڈ میپ تے اڳونہی سانڳے جائزہ اجلاس

اسلام آباد۔23جولائی(اے پی پی)وزیر اعظم محمد شہباز شریف سالانہ آئی ٹی برآمدات 21 فیصد ودھ تے 4.6 ارب امریکی ڈالر تئیں پڄݨ تے وفاقی وزیر انفارمیشن ٹیکنالوجی اتے انہاں دی ٹیم دی تعریف کریندے آکھیے جو آئی ٹی برآمدات ودھݨ حکومت دے ڈیجیٹل معیشت دی ترقی کیتے اقدامات و پالیسیاں دا پھل اے۔ انہاں اے ڳالھ اسلام آباد اچ آئی ٹی شعبے دے سٹرٹیجک روڈ میپ بارے جائزہ اجلاس دی اڳواݨی کریندے آکھی۔ انہاں آکھیے جو ملک اچ آئی ٹی دے شعبے دا فروغ اتے آئی ٹی برآمدات ودھݨ حکومت دی اولین ترجیحات دا حصہ اے، آئی ٹی دے شعبے اچ تربیتی کورسز دی معتبر تھرڈ پارٹی ویلیڈیشن کرائی ویسی، آئی ٹی دے شعبے اچ تربیت دے معیار تے کوئی سمجھوتہ نا کیتا ویسی۔ وزیراعظم پورے ملک اچ ڈیجیٹل انفراسٹرکچر ٻیا چنڳاں کرݨ دی ہدایت وی کیتی۔ اجلاس اچ وزارت انفارمیشن ٹیکنالوجی و ٹیلی کام دی کارکردگی اتے’’کنیکٹ پاکستان وژن 2030‘‘ دے اجراء دیاں تیاریاں تے وی بریفنگ ݙتی گئی۔ اجلاس اچ وفاقی وزیر قانون و انصاف اعظم نذیر تارڑ ، وفاقی وزیر اقتصادی امور احد خان چیمہ ، وفاقی وزیر انفارمیشن ٹیکنالوجی و ٹیلی کام شزافاطمہ خواجہ، وزیر تعلیم و پیشہ ورانہ تربیت خالد مقبول صدیقی، وزیر مملکت برائے خزانہ بلال اظہر کیانی، گورنر سٹیٹ بینک آف پاکستان جمیل احمد اتے متعلقہ اعلیٰ سرکاری افسران شرکت کیتی۔