دہشت گردی دے بنیادی ڈھانچے جتھاں وی موجود ہین انھاں کوں مکایا ویسی: فیلڈ مارشل

راولپنڈی۔23 جولائی (اے پی پی)پاک فوج دے شعبہ تعلقات عامہ آئی ایس پی آر دے مطابق فیلڈ مارشل سید عاصم منیر بلوچستان اچ امن کیتے دہشت گردی مکاوݨ کوں ٻہوں ضروری قرار ݙیندے آکھیے دہشت گردی دے بنیادی ڈھانچے جتھاں وی موجود ہین انھاں کوں مکایا ویسی، پاکستان توں دہشت گردی اتے ایںدے سہولت کاراں دے مکمل خاتمے تئیں کارروائیاں جاری رہسن۔ ݙسایا ڳئے جو چیف آف آرمی سٹاف، چیف آف ڈیفنس فورسز فیلڈ مارشل سید عاصم منیر نال 20 ویں نیشنل ورکشاپ بلوچستان دے شرکاء ملین۔ فیلڈ مارشل دہشت گردی دے بنیادی ڈھانچے کوں ختم کرݨ دا پاکستان دا عزم دوہریندے آکھیا جو فتنہ الخوارج اتے فتنہ الہندوستان دے خلاف ٹارگٹڈ آپریشنز پورے عزم نال جاری رہسن، سکیورٹی فورسز اتے قانون نافذ کرݨ والے اداریاں دیاں مسلسل کوششاں، عوام دی غیر متزلزل حمایت نال، بلوچستان اچ دیرپا امن یقینی ٻݨایا ویسی۔ انھاں آکھیا جو فتنہ الخوارج اتے فتنہ الہندوستان دے خلاف کارروائیاں پوری قوت نال جاری رہسن اتے ملک اتے عوام کیتے خطرہ ٻݨݨ والے دہشت گرداں دے بنیادی ڈھانچے جتھاں وی ہوسن انہاں کوں مکایا ویسی۔ فیلڈ مارشل آکھیا جو بیرونی سرپرستی اچ کم کرݨ والے پراکسی عناصر مسلسل بلوچستان اچ تشدد کوں ہوا ݙیندے پئن، اے عناصر استحکام کوں نقصان پچاوݨ اتے امن خراب کرݨ دی کوشش کریندے رہین۔ سید عاصم منیر آکھیا جو پاکستان دی مسلح افواج عوام دے اتحاد، حوصلے اتے بھرپور تعاون نال انھاں دے مذموم عزائم کوں ناکام ٻݨا ݙیسن۔

فیلڈ مارشل آکھیا جو بلوچستان پاکستان دا ماݨ اے، اے صوبہ بے پناہ قدرتی وسائل نال مالامال اے، اتھاں دے باہمت، محبِ وطن اتے ثابت قدم عوام ایںدی سب توں وݙی طاقت ہن۔ انھاں آکھیا جو وفاقی اتے صوبائی حکومتاں بلوچستان دی سماجی تے معاشی ترقی کیتے مختلف ترقیاتی منصوبیاں تے کم کریندیاں پئن، قومی یکجہتی ودھاوݨ اتے بلوچستان اچ پائیدار امن و خوشحالی کیتے سول سوسائٹی، تعلیمی اداریاں، میڈیا اتے نوجواناں دا مثبت کردار قابلِ تعریف اے۔ انھاں آکھیا جو ملک دے روشن مستقبل کیتے قومی اتحاد، ثابت قدمی اتے مشترکہ کوششاں دی لوڑھ اے۔