پاکستان سودھے 8 اسلامی ملکاں دے وزرائے خارجہ دی مسجدِ اقصیٰ اچ اسرائیل دی اشتعال انگیز کارروائیاں دی مذمت

اسلام آباد۔24جولائی (اے پی پی) پاکستان، مصر، ترکیہ، انڈونیشیا، اردن، قطر، سعودی عرب تے متحدہ عرب امارات دے وزرائے خارجہ مسجدِاقصیٰ/الحرم الشریف اچ اسرائیل دی اڄوکی اشتعال انگیز کارروائیاں بالخصوص اسرائیلی انتہا پسند وزراء دی قیادت اچ آبادکاراں دے مسلسل وݙے پیمانے تے مسجدِ اقصیٰ/الحرم الشریف اچ اسرائیلی افواج دے تحفظ اچ داخل تھیوݨ، ایں دے صحن اچ اسرائیلی پرچم لہراوݨ، اسرائیلی پولیس دی طرفوں ݙو خیمے نصب کرݨ تے ٻئے سارے اشتعال انگیز اقدامات دی شدید مذمت کیتی اے۔دفترِ خارجہ موجب اپݨے مشترکہ بیان اچ وزرائے خارجہ آکھیا جواے اشتعال انگیز تے ناقابلِ قبول اقدامات بین الاقوامی قانون، اقوامِ متحدہ دی متعلقہ قرارداداں تے مقبوضہ مشرقی بیت المقدس دے مقدس مقامات دی تاریخی تے قانونی حیثیت دی صریح خلاف ورزی ہن۔ اٹھ مسلم ملکاں دے وزرائے خارجہ اسرائیلی انتہا پسند وزراء تے گروپاں دی طرفوں اشتعال انگیزی، مسجدِ اقصیٰ اچ دراندازی کیتے اکساوݨ، تے تشدد تے مبنی غیر قانونی تے انتہا پسندانہ اقدامات دی وی شدید الفاظ اچ مذمت کیتی۔ انھاں خبردار کیتا جو اے اشتعال انگیز اقدامات نفرت تے انتہا پسندی کوں ہوا ݙیندن تے ݙو ریاستی حل دی بنیاد تے منصفانہ تے دیرپا امن دے قیام دی کوششاں اچ رکاوٹ بݨدن۔مقبوضہ بیت المقدس دے قدیم شہر تے اتھاں واقع عبادت گاہواں تئیں رسائی تے عائد پابندیاں نیزقدیم شہر دی ٻئی عبادت گاہواں تئیں امتیازی تے من منیے انداز اچ رسائی محدود کرݨ، بین الاقوامی قانون، بشمول بین الاقوامی انسانی قانون دی صریح خلاف ورزی تے تاریخی و قانونی حیثیت کوں تبدیل کرݨ دی غیر قانونی کوشش اے۔ وزرائے خارجہ ایں ڳالھ تے زور ݙتا جو اسرائیل کوں مقبوضہ بیت المقدس یا اتھاں دے اسلامی تے مسیحی مقدس جہیں تے کہیں قسم دی خودمختاری حاصل کائںی۔وزرائے خارجہ قابض اسرائیل دی طرفوں مقبوضہ مشرقی بیت المقدس دے تاریخی، قانونی تے آبادیاتی تشخص کوں تبدیل کرݨ تے اتھاں دے اسلامی تے مسیحی مقدس جاہواں دے تقدس تے حیثیت کوں ضیان پڄاوݨ کیتے جاری منظم تے مسلسل خلاف ورزیاں تے اقدامات دی سخت مذمت کیتی۔ وزرائے خارجہ ایں امر دا اعادہ کیتا جو مسجدِ اقصیٰ/الحرم الشریف دا پورا 144 دونم تے مشتمل احاطہ صرف مسلماناں دی عبادت کیتے مخصوص اے تے اے جیڑھا اردن دی وزارتِ اوقاف تے اسلامی امور دے ماتحت محکمہ اوقافِ مقبوضہ بیت المقدس تے امورِ مسجدِ اقصیٰ ہی او واحد قانونی ادارہ اے جیں کوں مسجدِ اقصیٰ/الحرم الشریف دے انتظام و انصرام تے ایں اچ داخلے کوں منظم کرݨ دا خصوصی اختیار حاصل اے۔ وزرائے خارجہ قابض طاقت دی حیثیت نال اسرائیل توں مطالبہ کیتا جو او وقتی مقبوضہ بیت المقدس دے قدیم شہر تئیں رسائی تے لڳیاں پابندیاں مکاوے تے نمازیاں کوں مسجدِ اقصیٰ تئیں پڄݨ توں روکݨ توں باز رہے۔ انھاں عالمی برادری تے وی زور ݙتا جو او ہک مضبوط تے مؤثر موقف اختیار کرے جو اسرائیل کوں مقبوضہ بیت المقدس دے اسلامی تے مسیحی مقدس جہیں دے خلاف جاری خلاف ورزیاں تے غیر قانونی اقدامات نیز انھاں مقدس جہیں دے تقدس دی پامالی توں باز رکھݨ تے مجبور کرے