وزیرِ خزانہ دی زیرِ صدارت دوائیں دیاں قیمتاں متعلق کابینہ کمیٹی دا اجلاس

اسلام آباد۔24جولائی (اے پی پی) وفاقی وزیرِ خزانہ و محصولات سینیٹر محمد اورنگزیب دی زیرِ صدارت وزیراعظم دی دوائیں دی قیمتاں متعلق کابینہ کمیٹی دا اٹھواں اجلاس منعقد تھیا جیں اچ ڈرگ پرائسنگ کمیٹی تے ڈرگ ریگولیٹری اتھارٹی پاکستان (ڈریپ) دے پالیسی بورڈ دی سفارشات دا جائزہ ڳھدا ڳیا۔وزارتِ خزانہ موجب اجلاس اچ وفاقی وزیر قومی صحت، ضوابط و رابطہ مصطفیٰ کمال تے وفاقی وزیردفاعی پیداوار محمد رضا حیات ہراج وی شرکت کیتی۔ اجلاس دے دوران ڈریپ دی طرفوں دوائیں دیاں قیمتاں دے تعین، ہارڈ شپ دی بنیاد تے دائر درخواستاں، دوائیں دی قیمتاں متعلق ٻئے معاملات تے ضروری دوائیں دی دستیابی دے حوالے نال تفصیلی بریفنگ ݙتی ڳئی۔ بریفنگ اچ گزریل اجلاس دے بعد تھیوݨ آلی پیش رفت دا وی ݙسایا ڳیا تے کمیٹی دے غور و خوض کیتے مختلف تجویزاں پیش کیتیاں ڳئیاں۔وزیرِخزانہ ہدایت کیتی جو دوائیں دیاں قیمتاں متعلق سارے فیصلے شفاف، شواہد تے مبنی تے مشاورتی عمل دے تحت کیتے ونڄن تے انھاں اچ عوامی مفاد کوں اولین ترجیح ݙتی ونڄے۔ انھاں آکھیا جو ضروری دوائیں تئیں مریضاں دی رسائی، دوا سازی دے شعبے اچ سپلائی دا تسلسل تے مریضاں کیتے دوائیں دی استطاعت وچال متوازن حکمتِ عملی اختیار کرݨا ناگزیر اے۔وزیرِ خزانہ ایں ڳالھ تے وی زور ݙتا جو اہم دوائیں دیاں قیمتاں متعلق فیصلیں دی وجوہات تے حکومتی موقف عوام تئیں موثر انداز اچ پڄایا ونڄے تاں جو ایں حوالے نال شفافیت تے اعتماد کوں ودھارا ݙتا ونڄ سڳے۔ اجلاس اچ وفاقی وزراء دے علاوہ سیکرٹری قومی صحت محمد اسلم غوری، چیف ایگزیکٹو افسر ڈریپ، وزارتِ تجارت تے وزارتِ خزانہ دے سینئر حکام وی شرکت کیتی