بلوچستان اچ پائیدارامن تے خوشحالی کوں یقینی بݨاوݨ کیتے قومی یکجہتی ودھاوݨ ، نینگراں کوں بااختیار بݨاوݨ دی لوڑھ اے ،چیئرمین سینیٹ سید یوسف رضا گیلانی

اسلام آباد۔24جولائی (اے پی پی) چیئرمین سینیٹ سید یوسف رضا گیلانی قومی یکجہتی دے ودھارے اچ اچ نوجوان نسل دے کردار کوں اہم قرار ݙیندیں آکھیا جو قوم دہشت گردی دے خلاف جنگ اچ افواجِ پاکستان دے رلے کھڑی اے۔اے ڳالھ انہاں اتھاں ایوانِ صدر اچ نیشنل ورکشاپ بلوچستان دے شرکاء نال خطاب کریندیں آکھی۔ انھاں آکھیا جو صدرِ مملکت، وزیراعظم تے فیلڈ مارشل دا دہشت گردی دے خلاف واضح موقف اے۔ فتنۃ الہندوستان تے فتنۃ الخوارج بلوچستان کوں غیر مستحکم کرݨ دے درپے ہن تے انھاں کوں بھارت دی پشت پناہی حاصل اے۔چیئرمین سینیٹ آکھیا جو سکیورٹی فورسز دہشت گرداں نال نمٹݨ کیتے آپریشن شعبان شروع کیتے، دشمن اساں کوں تقسیم کرݨ چاہندے لیکن اساں کوں متحد رہݨا ہوسی۔ چیئرمین سینیٹ آکھیا جو اڄ ایوانِ صدر اچ تساں ساریں دا خیرمقدم کریندیں میکوں خوشی تھیندی پئی اے۔ انھاں شرکاء کوں مخاطب کریندیں آکھیا جو میں صدرِ مملکت دی نمائندگی کریندا پیاں جو ایں ویلھے شہر توں ٻاہر ہن۔چیئرمین سینیٹ آکھیا جو 2016ء توں اے پلیٹ فارم ملک توں ارکانِ پارلیمنٹ، بیوروکریٹس، سول سوسائٹی دے نمائندیں، نینگراں، ماہرینِ تعلیم تے میڈیا دے لوکاں کوں ہک جگہ جمع کریندا آندا پئے۔ انھاں آکھیا جو میکوں فیلڈ دوریں، پارلیمانی قیادت تے پالیسی سازاں دے نال آپ دی ملاقاتاں دے بارے اچ آگاہی اے۔ اے ورکشاپ محض ہک تربیتی پروگرام نی بلکہ ہک پل اے، اے صوبیں وچال ، مختلف نقطۂ نظر دے درمیان تے انھاں چیلنجز تے انھاں دے حل دے درمیان ہک مضبوط ربط قائم کریندی اے جِنھاں دا اساں کوں رل تے سامݨا کرݨا اے۔سید یوسف رضا گیلانی آکھیا جو میں کئی ݙہاکیں توں عوامی زندگی نال وابستہ ہاں، میں ہک ڳالھ سکھیا ہاں جو بطورِ قوم اساں سارے کٹھے ترقی کریندوں تے کٹھے اوکھ دا سامݨا کریندوں ۔انھاں آکھیا جو بلوچستان اساݙی قومی شناخت دا مرکزی حصہ اے، ایں دا ساحل بحیرۂ عرب دے نال کھنڈیا ہویا اے، ایں دے پہاڑ خطے دے کجھ انتہائی قیمتی معدنی ذخیرے نال مالامال ہن تے ایں دا محلِ وقوع جنوبی ایشیا کوں وسطی ایشیا تے مشرقِ وسطیٰ نال جوڑیندے۔ انھاں آکھیا جو ایہا حقیقت بلوچستان کوں پاکستان دے معاشی مستقبل تے قومی سلامتی دا ہک بنیادی ستون بݨیندی اے تاں جو اساں کوں سکیورٹی، سماجی و معاشی تے انسانی ترقی دے شعبیں اچ درپیش چیلنجز دا دیانت داری نال اعتراف وی کرݨا ہوسی۔چیئرمین سینیٹ آکھیا جو اڄوکے دہشت گرد حملیں دے پسِ پردہ دشمن دا ہک واضح ناں اے جو فتنۃ الہندوستان تے فتنۃ الخوارج اے۔ اے بھارت دی سرپرستی اچ کم کرݨ آلے عناصر ہن جِنھاں کوں پاکستان کوں غیر مستحکم کرݨ کیتے اساݙی سرحداں دے پار توں بھیجیا ویندے۔ انھاں آکھیا جو اے عناصر ہݨ فوجی اہداف دے بجائے نہتے شہریاں کوں نشانہ بݨیندے پئن۔ اے بزدلی دی علامت اے تے ہک ناکام تھیندی ہوئی سوچ دی بے وسی کوں ظاہر کریندی اے۔سید یوسف رضا گیلانی آکھیا جو اساݙی سکیورٹی فورسز ایں چیلنج دا بھرپور مقابلہ کیتے۔ پاک فوج، فرنٹیئر کور بلوچستان تے پولیس آپریشن شعبان شروع کیتے جݙاں جو انٹیلی جنس دی بنیاد تے کارروائیاں دے ذریعے دشوار گزار علاقیں اچ دہشت گرداں دی پناہ گاہواں کوں نشانہ بݨایا ویندا پئے۔ انھاں آکھیا جو فیلڈ مارشل سید عاصم منیر واضح کر چکئن جو سرحد پار توں آوݨ آلی دہشت گردی کوں ریاست اپݨی طاقت نال نال کچل ݙیسی۔ صدر آصف علی زرداری تے وزیراعظم محمد شہباز شریف اساݙی سکیورٹی فورسز دی پیشہ ورانہ صلاحیت تے عزم دی تعریف کیتی تے میں وی انھاں دی تحسین اچ اپݨی آواز شامل کرینداں۔انھاں آکھیا جو پوری قوم اپݨی مسلح افواج دے رلے کھڑی اے۔ اساں ہر اوں فوجی، پولیس اہلکار تے افسر کوں سلام پیش کریندوں جیں پاکستان کیتے اپݨی جان دا نذرانہ پیش کیتا۔ اساں انھاں دی قربانی کوں خراجِ عقیدت پیش کریندوں تے ایں مقصد نال اپݨی وابستگی دا اعادہ کریندوں جیں کیتے انھاں بے لوث خدمت انجام ݙتی۔چیئرمین سینیٹ آکھیا جو بلوچ نوجواناں دی وفاقی محکمیں، سول سروس تے مسلح افواج اچ نمائندگی ودھاوݨ کیتے خصوصی کوٹے مقرر کیتے ڳئن، ایویں مقامی قیادت دے نال مذاکرات تے سیاسی مفاہمت دی پالیسی اپنائی ڳئی تاں جو استحکام، آئینی حقوق تے جامع ترقی کوں فروغ ݙتا ونڄ سڳے، اے عزم اڄ بھی برقرار اے۔ انھاں آکھیا جو اساݙا آئینی تقاضا اے جو صوبائی حقوق دا تحفظ کیتا ونڄے، وفاقی ڈھانچے کوں تکڑا بݨایا ونڄے تے ترقی دے ثمرات پاکستان دے ہر خطے تک پڄائے ونڄن۔ایندے توں پہلے 20ویں نیشنل ورکشاپ بلوچستان دے کوآرڈینیٹر بریگیڈئیر خاقان سرور اپݨے خطاب اچ ورکشاپ دے اغراض و مقاصد بیان کریندیں آکھیا جو اے بلوچستان حکومت دا اقدام اے جیں دا آغاز 2017ء اچ کیتا ڳیا۔ انھاں آکھیا جو اے ورکشاپ حکومتِ بلوچستان دا ہک قابلِ تحسین اقدام اے جیں دا مقصد قومی ہم آہنگی تے صوبہ تے ایں دے عوام نال متعلقہ امور تے تعمیری مکالمے کوں ودھارا ݙیوݨ اے۔ انھاں آکھیا جو ورکشاپ اچ اراکینِ اسمبلی، صحافیاں، پالیسی سازاں، ماہرینِ تعلیم تے نوجوان قیادت کوں ہک پلیٹ فارم تے گھن آوݨ نال قومی یکجہتی کوں ودھارا ملدے۔20 ویں نینشل ورکشاپ برائے بلوچستان اچ میڈیا سودھے مختلف اداریں توں 100 لوک شریک تھئے جِنھاں دا تعلق بلوچستان سودھے ملک دے مختلف صوبیں توں اے۔ انھاں آکھیا جو شرکاء اچوں 70 فیصد دا تعلق بلوچستان جݙاں جو ٻئے30 فیصد دا تعلق ملک دے ٻئے علاقیں توں اے۔ انھاں آکھیا جو شرکاء دی ہݨ تئیں وزیراعظم، چیف آف ڈیفنس فورسز، گورنر خیبرپختونخوا، وزیراعلیٰ بلوچستان تے ٻئیاں اہم شخصیات نال ملاقاتاں تھئن۔ چیئرمین سینیٹ ایں موقع تے بلوچستان دے حوالے نال شرکاء دے مختلف سوالات دے جواب وی ݙتے۔ تقریب اچ صدرِ مملکت دے ترجمان مرتضیٰ سولنگی سودھے ٻئی اہم شخصیات وی شرکت کیتی