جوائنٹ ایکشن کمیٹی دیاں تنداں بھارت نال ملدن، ثبوت سامنے آ ڳئن،  عطا اللہ تارڑ

اسلام آباد۔26جولائی(اے پی پی)وفاقی وزیرِ اطلاعات و نشریات عطا اللہ تارڑ آکھیے جو بھارتی خفیہ ایجنسی ’را‘ نال منسلک پاکستان مخالف سوشل میڈیا پروپیگنڈا نیٹ ورک بے نقاب تھی ڳئے، کالعدم جوائنٹ ایکشن کمیٹی دے بھارت نال روابط دے ثبوت سامݨے آئن۔ ہک ویڈیو بیان اچ وفاقی وزیر اطلاعات و نشریات عطا اللہ تارڑ دا آکھݨ ہئی جو سوشل میڈیا تے منظم انداز اچ اینڄھاں پوسٹس تے مواد کھنݙایا ڳئے جیندا مقصد عوام کوں ریاستی اداریاں دے خلاف اکساوݨ اتے ملک اچ بداعتمادی پیدا کرݨا ہئی۔ انھاں آکھیا جو کالعدم ایکشن کمیٹی نال جڑے شرپسند عناصر کوں اپݨے طرزِ عمل تے پوری قوم کوں ولدا ݙیوݨا پوسی۔ وفاقی وزیرِ اطلاعات دا آکھݨ ہئی جیکر کالعدم ایکشن کمیٹی دے رہنما واقعی کشمیر دے مفادات نال مخلص ہن تاں انھاں کوں جمہوری عمل دا حصہ ٻݨدے ہوئیں انتخابات اچ حصہ گھنݨا چاہیدے، کیوں جو اسلحے اتے ڈنڈیاں دے زور تے چلائی ونڄݨ والی کہیں وی تحریک دا کشمیر کاز نال کوئی تعلق نئیں تھی سڳدا۔ عطا اللہ تارڑ آکھیا جو سکیورٹی فورسز ہک اینڄھے شخص کوں گرفتار کر گھدے جیڑھا ڈیجیٹل مارکیٹنگ دی اݙ اچ پاکستان مخالف پروپیگنڈا مہم دا حصہ ہئی۔ انھاں دا آکھݨ ہئی جو ابتدائی تحقیقات نال پتا لڳدے جو ایکوں بھارت توں مواد ملدا پیا ہا جیںدا زیادہ تر تعلق کالعدم ایکشن کمیٹی بارے سوشل میڈیا مہم اتے مخصوص بیانیے کوں ودھاوݨ نال ہئی۔ وفاقی وزیرِ اطلاعات آکھیا جو پاکستان دے خلاف غلط معلومات اتے گمراہ کن مہم چلاوݨ والے نیٹ ورک دیاں کڑیاں بھارت نال ملدن اتے ایں پروپیگنڈے دا مقصد ریاستی اداریاں اتے عوام وچال فاصلے اتے بداعتمادی پیدا کرݨ ہئی۔ عطا تارڑ آکھیا جو قانون نافذ کرݨ والے ادارے ایں معاملے دی مختلف پہلواں نال تحقیقات کریندے پئن اتے حقائق مکمل طور تے سامݨے آوݨ دے بعد ذمہ دار عناصر دے خلاف قانون دے مطابق کارروائی کیتی ویسی۔