ڈیجیٹل ٹیکنالوجی دا موثر استعمال جدید تے عوام دوست عدالتی نظام کیتے ناگزیراے، چیف جسٹس یحییٰ آفریدی

اسلام آباد۔27جولائی (اے پی پی) چیف جسٹس پاکستان جسٹس یحییٰ آفریدی آکھیا جو عدالتی نظام کوں خودکار، موثر تے عوامی ضروریات نال ہم آہنگ بݨاوݨ کیتے انصاف دے شعبے نال وابستہ سارے فریقاں دی ڈیجیٹل مہارت ناگزیر اے جݙاں جو جدید ٹیکنالوجی دا موثر استعمال انصاف دی وقتی ، شفاف تے موثر فراہمی اچ کلیدی کردار ادا کریسی۔انھاں اے ڳالھ سپریم کورٹ آف پاکستان اچ پنجاب بار کونسل دے وفد نال ملاقات اچ آکھی ۔چیف جسٹس وفد کوں وفاقی جوڈیشل اکیڈمی دے ذریعے جاری استعدادِ کار ودھاوݨ دے مختلف پروگراماں دا وی ݙسایا تے وکلا برادری تے زور ݙتا جو او تربیت تے پیشہ ورانہ ترقی دے دستیاب موقع توں بھرپور فیدہ چاون۔پنجاب بار کونسل دے وائس چیئرمین خواجہ قیصر بٹ دی قیادت اچ ملاقات کرݨ آلے وفد اچ ایگزیکٹو کمیٹی دے چیئرمین فخر حیات اعوان، پبلیکیشن کمیٹی دے چیئرمین ملک غلام عباس نسوانہ، سردار عبدالباسط خان بلوچ، ملک مقصود کھوکھر، رانا سربلند خان، چوہدری عمرمحمود، سیکرٹری پنجاب بار کونسل رفاقت علی سہال، سیکشن افسر آفتاب احمد تے غلام رضا شامل ہن۔وفد ملک اچ عدالتی شعبے اچ جاری اصلاحات دی تعریف کریندے عدالتی کمپلیکسز اچ ای لائبریریاں دے قیام، سولرائزیشن تے تریمت سہولت مراکز دے قیام کوں انصاف تئیں رسائی تے عوامی خدمت کیتے اہم اقدامات قرار ݙتا۔ وفد چیف جسٹس پاکستان دا شکریہ ادا کریندیں پاکستان لاء ویب سائٹ تئیں رسائی کیتے لاگ ان معلومات وی پیش کیتیاں تاں جو عدالتی نظام نال وابستہ لوکاں ڈیجیٹل قانونی وسائل توں بہتر انداز اچ فیدہ چا سڳن۔ملاقات دے اختتام تے پیشہ ورانہ تے ادارہ جاتی امور تے ڳالھ مہاڑ کیتی ڳئی تے ایں عزم دا اعادہ کیتا ڳیا جو بنچ تے بار سانجھے تعاون نال پیشہ ورانہ استعداد اچ ودھارے ،ٹیکنالوجی تے مبنی عدالتی اصلاحات دے ودھارے تے عوام دوست عدالتی نظام دے قیام کیتے سانجھیاں کوششاں جاری رکھیسن۔