شہریاں دی ہیپاٹائٹس دی سنگین جان لیوا قسماں توں بچݨ کیتے معیاری سکریننگ، تشخیص تے علاج دیاں سہولتاں تئیں بلاامتیاز رسائی حکومت دی اولین ترجیح اے، وزیراعظم محمد شہباز شریف

اسلام آباد۔28جولائی (اے پی پی) وزیراعظم محمد شہباز شریف شہریاں دی ہیپاٹائٹس دی سنگین جان لیوا قسماں توں بچݨ کیتے معیاری سکریننگ، تشخیص تے علاج دیاں سہولتاں تئیں بلاامتیاز رسائی کوں حکومت دی اولین ترجیح قرار ݙیندیں آکھیا جو ’’ہیپاٹائٹس سی دے خاتمے کیتے وزیراعظم قومی پروگرام‘‘ دا آغاز ہک تاریخی تے غیر معمولی اقدام اے۔ ہیپاٹائٹس دے عالمی ݙینھ ، جیڑھا اڄ منایا ویندا پئے،دی مناسبت نال اپݨے پیغام اچ وزیراعظم آکھیا جو پاکستان ہیپاٹائٹس دے عالمی ݙینھ تے دنیا دے نال رل تے ایں موذی مرض دے خاتمے کیتے اپݨے غیر متزلزل عزم دا اعادہ کریندے۔وزیراعظم دفتردے میڈیا ونگ توں جاری بیان موجب وزیراعظم آکھیا جو پاکستان ہیپاٹائٹس سی توں ساریں توں زیادہ متاثرہ ملکاں اچ شامل اے تے کئی ݙہاکیں توں صحتِ عامہ دے ایں مسئلے توں ݙوچار اے، ہیپاٹائٹس دی سنگین جان لیوا قسماں توں بچݨ کیتے شہریاں کوں معیاری سکریننگ، تشخیص تے علاج دی سہولتاں تئیں بلاامتیاز رسائی حکومت دی اولین ترجیح اے۔انھاں آکھیا جو حکومتِ پاکستان ایں قابلِ انسداد تے قابلِ علاج مرض دے سدِباب کیتے 2025ء اچ ’’وزیراعظم قومی پروگرام خاتمہِ ہیپاٹائٹس سی‘‘ دا آغاز کیتا جیڑھا ہک تاریخی تے غیر معمولی اقدام اے، ایں پروگرام دا مقصد لکھاں پاکستانیاں کوں وقتی مفت سکریننگ، تصدیقی تشخیص تے موثر علاج دیاں سہولتاں ݙیوݨ اے، ایں پروگرام دے عملی نفاذ دے تحت اسلام آباد اچ سکریننگ، تشخیص تے علاج دی خدمات دا باقاعدہ آغاز تھی چکئے تے سارے وݙے سرکاری صحت مراکزی و ہسپتال، ایں پروگرام اچ بھرپور انداز اچ شریک ہن، مزید عوام تئیں اِنھاں خدمات دی آسان رسائی کوں یقینی بݨاوݨ کیتے موبائل سکریننگ پروگرام وی شروع کیتے ڳئن، سکریننگ دے علاوہ جنھاں لوکاں کوں مزید تشخیص تے علاج دی لوڑھ اے انھاں کوں کہیں مالی ٻوجھ دے بغیر پروگرام اچ شامل کیتا ویندا پئے۔وزیراعظم آکھیا جو ہیپاٹائٹس جیھے موذی مرض روکݨ کیتے حکومت غیر معیاری سرنجز دی تیاری، ترسیل تے ول استعمال تے مکمل پابندی لاتی، ایں تناظر اچ ہسپتالاں اچ علاج معالجے تے حفظانِ صحت دے اصولاں دی پابندی تے خصوصی ہدایات جاری کیتیاں ڳئیاں تے عملدرآمد اچ کوتاہی دے مرتکب عملے دی جوابدہی کوں یقینی بݨایا ڳئے۔انھاں آکھیا جو وفاقی حکومت سارے دستیاب وسائل دے بہترین استعمال دے نال نال صوبائی حکومتاں، ترقیاتی شراکت داراں، طبی ماہرین تے نجی شعبے دے نال تعاون کوں مزید تکڑا بݨاوݨ کیتے پرعزم اے تاں جو ایں موذی مرض دے اثرات کوں زائل کیتا ونڄ سڳے۔ تے کوئی وی مستحق مریض علاج توں محروم نہ رہے۔وزیراعظم آکھیا جو موذی امراض بالخصوص ہیپاٹائٹس دے خلاف کامیابی حکومت دے علاوہ انفرادی و معاشرتی سطح تے کوششاں دی متقاضی اے۔ انھاں سارے پاکستانیاں توں اپیل کیتی جو او ہیپاٹائٹس سی دی وقتی تشخیص کیتے سکریننگ کراون، اپݨے اہلِ خانہ، دوستاں تے ساتھیاں کوں وی ٹیسٹ کراوݨ دی ترغیب ݙیوݨ تے ایجھی محفوظ طبی تے صحت بخش عادات اختیار کرن جو ایں بیماری دے کھنڈݨ کوں روکݨ اچ معاون ہوون، وقتی تشخیص تے وقتی علاج قیمتی جاناں کوں بچاوݨ دا ذریعہ اے۔انھاں آکھیا جو امراض توں بچݨ تے روک تھام دی جنگ اچ ڈاکٹرز، نرسز، لیبارٹری ماہرین تے صحتِ عامہ دا سارا عملہ جیڑھا صفِ اول اچ شریک اے، لائقِ تحسین اے۔ وزیراعظم خصوصی تاکید کیتی جو او جذبہِ خدمت تے پیشہ ورانہ فرائض اچ انتھک محنت دی روشن مثال قائم کرن، آؤ اساں سارے صحت مند پاکستان دی تعمیر دے اپݨے عہد دی تجدید کروں۔ انھاں ایں یقین دا اظہار کیتا جو مشترکہ کوششاں، سانجھے تعاون، سائنسی جدت، عوامی شمولیت تے اللہ تعالیٰ دے فضل و کرم نال اساں 2030ء تئیں ہیپاٹائٹس سی کوں صحتِ عامہ کیتے ہک وݙےخطرے دے طور تے ختم کرݨ دے اپݨے قومی عزم تے عالمی اہداف کوں ضرور حاصل کریسوں۔ انشاءاللہ