وفاقی وزیر برائے قومی غذائی تحفظ تے تحقیق دی زیرِ صدارت ویٹ بورڈ دا اعلیٰ سطحی اجلاس، کݨک دی تقسیم دی حکمتِ عملی دا جائزہ

اسلام آباد۔28جولائی (اے پی پی) وفاقی وزیر برائے قومی غذائی تحفظ تے تحقیق رانا تنویر حسین ویٹ بورڈ دے ہک اعلیٰ سطحی اجلاس دی صدارت کیتی، جئیں اچ ملک اچ کݨک دی دستیابی، تقسیم دی حکمتِ عملی تے صوبیاں دی ضروریات دا تفصیلی جائزہ گھدا ڳیا۔ اجلاس اچ وزارتِ قومی غذائی تحفظ تے تحقیق دے سیکریٹری عامر علی احمد، وزیرِاعظم دے کوآرڈینیٹر برائے زراعت، تمام صوبیاں دے زراعت تے خوراک دے سیکریٹریز، گلگت بلتستان تے آزاد جموں و کشمیر دے نمائندگان، وزارت دے سینئر حکام، پاکستان فلور ملز ایسوسی ایشن دے نمائندگان تے ٻئے متعلقہ اسٹیک ہولڈرز شرکت کیتی۔ اجلاس اچ پاسکو دے ذخائر توں صوبیاں دی کݨک دی ضروریات دا جائزہ گھدا ڳیا۔ اجلاس کوں ݙسایا ڳیا جو صوبیاں دی مجموعی طلب پاسکو دے دستیاب ذخائر توں ودھ اے۔ ایں صورتحال دے پیشِ نظر، صوبیاں توں مشاورت تے انھاں دی ضروریات کوں مدنظر رکھیندیں ہوئیں تقریباً 10 لکھ ٹن کݨک درآمد کرݨ دے عمل تے غور کیتا ویندا پئے۔ واضح کیتا ڳیا جو درآمد دی مجوزہ مقدار صوبیاں ولوں پیش کردہ ضروریات دی بنیاد تے طے کیتی ڳئی اے، جئیں دا مقصد ملک بھر اچ کݨک دی بلا تعطل فراہمی کوں یقینی بݨاوݨ اتے قومی غذائی تحفظ کوں مستحکم کرݨ اے۔ وفاقی وزیر ایں ڳالھ تے زور ݙتا جو درآمدی عمل دے دوران تمام صوبیاں کوں مکمل اعتماد اچ گھدا ویسی، خصوصاً درآمد کیتی ونڄݨ آلی کݨک دے معیار تے تکنیکی خصوصیات دے حوالے نال۔ انھاں مزید آکھیا جو درآمد کیتی ونڄݨ آلی کݨک صوبیاں اچ انھاں دی ضروریات دے مطابق تقسیم کیتی ویسی تانجو شفافیت، انصاف تے منصفانہ تقسیم کوں یقینی بݨایا ونڄ سڳے۔ رانا تنویر حسین ایں عزم دا اعادہ کیتا جو وفاقی حکومت تمام وفاقی اکائیاں دے نال قریبی تعاون دے ذریعے کݨک دی مستحکم فراہمی، صارفین دے مفادات دے تحفظ تے ملک بھر اچ بروقت دستیابی کوں یقینی بݨاوݨ کیتے پرعزم اے۔ انھاں متعلقہ حکام کوں ہدایت کیتی جو تمام ضروری انتظامات مؤثر انداز اچ تے صوبیاں دے نال مکمل رابطے دے ذریعے جلد توں جلد مکمل کیتے ونڄن۔