ایں سال مون سون بارشاں تے ممکنہ سیلابی صورتحال نال نٻڑݨ کیتے حکومت دا ردعمل موثر رہیا، ارلی وارننگ سسٹم دے باعث جانی تے مالی نقصان اچ نمایاں ڳھٹکی آئی: وفاقی وزیرِ اطلاعات عطاء اللہ تارڑ

اسلام آباد۔28جولائی (اے پی پی) وفاقی وزیر برائے اطلاعات تے نشریات عطاء اللہ تارڑ آکھیا جو ایں سال مون سون بارشاں تے ممکنہ سیلابی صورتحال نال نبڑݨ کیتے حکومت دا ردعمل موثر رہیا، این ڈی ایم اے دے بروقت اقدامات، جدید ٹیکنالوجی تے ارلی وارننگ سسٹم دے باعث جانی تے مالی نقصان اچ نمایاں کمی آئی، نیشنل ایمرجنسی آپریشن سینٹر حکومت دے تمام اداریاں دی مربوط حکمتِ عملی، پیشگی انتباہ تے بروقت فیصلیاں کیتے اہم قومی اثاثہ ثابت تھیے۔ اے ڳالھیں انھاں نیشنل ڈیزاسٹر مینجمنٹ اتھارٹی (این ڈی ایم اے) دے دورے دے موقع تے کیتا۔ وفاقی وزراء احسن اقبال، رانا تنویر حسین، مصدق ملک، میاں محمد معین وٹو تے سینیٹر اورنگزیب وی انھاں دے نال موجود ہن۔

وفاقی وزیرِ اطلاعات آکھیا جو ایں سال مون سون بارشاں دے حوالے نال حکومتی ردعمل انتہائی موثر رہیا، گزشتہ سال دی صورتحال توں ٻہوں کڄھ سکھیا ڳیا اتے ایں تجربے دی روشنی اچ بہتر حکمتِ عملی اختیار کیتی ڳئی۔ انھاں چیئرمین این ڈی ایم اے لیفٹیننٹ جنرل انعام حیدر کوں خراجِ تحسین پیش کریندیں ہوئیں آکھیا جو این ڈی ایم اے مون سون بارشاں تے ممکنہ سیلابی صورتحال نال نبڑݨ کیتے موثر اقدامات کیتے۔ وفاقی وزیر آکھیا جو وزیراعظم شہباز شریف مون سون تے سیلابی صورتحال دے حوالے نال بروقت اجلاس منعقد کیتے جنھاں اچ این ڈی ایم اے دے حکام، وفاقی کابینہ دے ارکان، متعلقہ صوبائی حکومتاں، گلگت بلتستان تے آزاد کشمیر دے نمائندیاں شرکت کیتی۔ عطاء اللہ تارڑ آکھیا جو این ڈی ایم اے تمام متعلقہ محکمیاں تے صوبائی حکومتاں دے تعاون نال ارلی وارننگ سسٹم تے کم کیتا اتے عوام کوں ممکنہ خطرات توں بروقت آگاہی فراہم کیتی۔ انھاں آکھیا جو نیشنل ایمرجنسی آپریشن سینٹر (این ای او سی) دنیا اچ آپݨی نوعیت دا منفرد مرکز اے، حکومت دے تمام اداریاں دی مربوط حکمتِ عملی دے موثر نفاذ تے بروقت پیشگی انتباہ دے نظام کوں مضبوط بݨاوݨ کیتے اے ہک اہم اثاثہ ثابت تھیے۔ وفاقی وزیر آکھیا جو ارلی وارننگ سسٹم ہک ایجھا نظام اے جئیں دا جائزہ گھنݨ کیتے دنیا بھر توں لوک اتھاں آندے ہن۔ عطاء اللہ تارڑ آکھیا جو قدرتی آفات نال نبڑݨ ہر شہری تے پوری کمیونٹی دی مشترکہ ذمہ داری اے، جہاں نقصان تھیوے، کلاؤڈ برسٹ یا ندی نالیاں اچ طغیانی دا خدشہ ہووے اتھاں سب کوں امدادی سرگرمیاں اچ ودھ چڑھ تے آپݨا کردار ادا کرݨا چاہیدے۔ وفاقی وزیر موسمیاتی چیلنجز، ارلی وارننگ سسٹم تے آفات نال نمٹݨ کیتے تیاریاں دے حوالے نال نیوز بلیٹن، ٹاک شوز تے سوشل میڈیا پلیٹ فارمز دے ذریعے عوامی آگاہی مہمات اچ تعاون تے پاکستانی میڈیا دے کردار کوں سراہیا۔ انھاں آکھیا جو ایں چیلنج نال نبڑݨ کیتے حکومت آپݨا کردار جاری رکھیسی۔ آوݨ آلے ݙینہاں اچ ٻیا موثر ردعمل تھیسی تے تمام متعلقہ ادارے متاثرہ افراد دی مدد کیتے آپسی تعاون نال کم جاری رکھیسن۔