وزیرِ اعظم دی صدارت کابینہ کمیٹی برائے توانائی دا اجلاس، پاکستان آئل ریفائننگ پالیسی 2023 اچ مجوزہ ترامیم دی منظوری

اسلام آباد۔28جولائی (اے پی پی) کابینہ کمیٹی برائے توانائی پاکستان آئل ریفائننگ پالیسی 2023 اچ مجوزہ ترامیم دی منظوری ݙے ݙتی جڈانجو وزیراعظم محمد شہباز شریف آئل ریفائنریز دی اپ گریڈیشن کوں وقت دی اہم ضرورت قرار ݙیندیں ہوئیں آکھیا جو جدید تقاضیاں نال ہم آہنگ ریفائنریز نہ صرف ملک دی توانائی ضروریات کوں بہتر انداز اچ پورا کریسن بلکہ درآمدی ایندھن تے انحصار ڳھٹ کرݨ تے ماحول دوست ایندھن دی فراہمی اچ وی معاون ثابت تھیسن۔ وزیراعظم محمد شہباز شریف دی زیرِ صدارت کابینہ کمیٹی برائے توانائی دا اجلاس منگل کوں اتھاں وزیرِ اعظم ہاؤس اچ تھیا۔ وزیراعظم آفس دے میڈیا ونگ توں جاری بیان دے مطابق اجلاس اچ وفاقی وزراء احد خان چیمہ، محمد اورنگزیب، علی پرویز ملک، احسن اقبال، متعلقہ وفاقی سیکرٹریز تے اعلیٰ سرکاری حکام شرکت کیتی۔ اجلاس اچ پاکستان آئل ریفائننگ پالیسی 2023 اچ مجوزہ ترامیم دی منظوری ݙتی ڳئی۔ اجلاس نال خطاب کریندیں ہوئیں وزیراعظم آکھیا جو آئل ریفائنریز دی اپ گریڈیشن وقت دی اہم ضرورت اے اتے اے پاکستان دے توانائی تحفظ دے جامع نظام دا ہک اہم ستون اے۔ انھاں آکھیا جو جدید تقاضیاں نال ہم آہنگ ریفائنریز نہ صرف ملک دی توانائی ضروریات کوں بہتر انداز اچ پورا کریسن بلکہ درآمدی ایندھن تے انحصار ڳھٹ کرݨ تے ماحول دوست ایندھن دی فراہمی اچ وی معاون ثابت تھیسن۔ اجلاس کوں بریفنگ اچ ݙسایا ڳیا جو موجودہ ریفائنریز دی پیداواری صلاحیت ودھاوݨ کیتے انھاں دی اپ گریڈیشن ناگزیر اے، یورو-4 تے یورو-5 معیار دے ایندھن دی پیداوار پاکستان دے بین الاقوامی ماحولیاتی وعدیاں دی تکمیل، فضائی آلودگی اچ کمی تے عوام کوں بہتر معیار دا ایندھن فراہم کرݨ کیتے ضروری اے۔ وزیراعظم ہدایت کیتی جو اوگرا دی کارکردگی بہتر بݨاوݨ تے مارکیٹ دی ضروریات پوریاں کرݨ کیتے اصلاحات متعارف کروائیاں ونڄن تانجو شعبہِ توانائی اچ مسابقت، شفافیت تے سرمایہ کاری کوں فروغ ملے۔ وزیراعظم زور ݙتا جو نویں پالیسی دے نفاذ دے بعد ایں تے موثر تے بروقت عملدرآمد یقینی بݨایا ونڄے تے ایں ضمن اچ کہیں وی قسم دی غفلت یا تاخیر ہرگز برداشت نہ کیتی ویسی۔ انھاں متعلقہ وزارتاں تے اداریاں کوں ہدایت کیتی جو تمام سٹیک ہولڈرز دے نال قریبی رابطہ رکھیندیں ہوئیں اصلاحاتی عمل کوں تیز کیتا ونڄے۔ وزیرِ اعظم آکھیا جو حکومت توانائی دے شعبے اچ پائیدار اصلاحات، جدید ٹیکنالوجی دے فروغ تے سرمایہ کاری کیتے سازگار ماحول دی فراہمی کیتے ہر ممکن اقدامات جاری رکھیسی۔ وزیراعظم براؤن فیلڈ ریفائنریز دے حوالے نال ترمیمی پاکستان آئل ریفائننگ پالیسی 2023 دی ترویج کیتے قطر، سعودی عرب تے ٻئے خلیجی ممالک اچ روڈ شوز منعقد کرݨ دی ہدایت کیتی۔ وزیراعظم براؤن فیلڈ ریفائنریز دے حوالے نال ریفائننگ پالیسی اچ ترمیم دے حوالے نال وزیرِ پٹرولیم تے انھاں دی ٹیم دے کام تے کارکردگی کوں سراہیا۔ وزیراعظم ملک اچ پٹرولیم مصنوعات دے سٹریٹجک ریزروز ودھاوݨ دی ہدایت وی کیتی۔ اجلاس کوں ملک اچ آئل ریفائنریز دی اپ گریڈیشن، توانائی دے شعبے اچ اصلاحات تے پالیسی تے عملدرآمد دی پیش رفت تے تفصیلی بریفنگ ݙتی ڳئی۔ اجلاس کوں ݙسایا ڳیا جو براؤن فیلڈ ریفائنریز دے حوالے نال پاکستان آئل ریفائننگ پالیسی 2023 اچ کیتیاں ڳئیاں ترامیم دا مقصد ماحول دوست یورو-V دی مطابقت رکھݨ آلے پٹرول تے ڈیزل دی پیداوار کوں یقینی بݨاوݨا، فرنس آئل تے گھٹ معیار دی پٹرولیم مصنوعات اچ کمی گھن آوݨ اے۔