غیر ضروری اسامیاں تے عہدیاں دا خاتمہ اصلاحاتی ایجنڈے دا اہم حصہ اے، رائٹ سائزنگ کمیٹی آپݨی باقی ماندہ سفارشات ہک مہینے اچ مکمل کرے: وزیراعظم شہباز شریف

اسلام آباد۔28جولائی (اے پی پی) وزیراعظم محمد شہباز شریف جدید ٹیکنالوجی تے بہتر تربیت نال سرکاری اداریاں دی کارکردگی اچ نمایاں بہتری گھن آوݨ دی ہدایت کریندیں ہوئیں آکھیا جو غیر ضروری اسامیاں تے عہدیاں دا خاتمہ اصلاحاتی ایجنڈے دا اہم حصہ اے، رائٹ سائزنگ کمیٹی آپݨی باقی ماندہ سفارشات ہک مہینے اچ مکمل کرے۔ او منگل کوں آپݨی صدارت وفاقی حکومت دے حجم اچ ڳھٹکی (رائٹ سائزنگ) تے حکومتی استعدادِ کار ودھاوݨ نال متعلق جائزہ اجلاس نال خطاب کریندے پئے ہن۔ وزیراعظم آفس دے میڈیا ونگ ولوں جاری بیان دے مطابق وزیراعظم اجلاس نال خطاب کریندیں ہوئیں آکھیا جو رائٹ سائزنگ دے اقدامات دے تحت یوٹیلیٹی سٹورز کارپوریشن، پاک پی ڈبلیو ڈی تے پاسکو بند کیتے ڳئں جنھاں نال قومی خزانے کوں بچت تھیندی پئی اے۔ انھاں رائٹ سائزنگ دے تحت ختم کیتیاں ڳئیاں اسامیاں تے اداریاں دا تھرڈ پارٹی آڈٹ کرواوݨ دی ہدایت کریندیں ہوئیں آکھیا جو رائٹ سائزنگ کمیٹی آپݨی باقی ماندہ سفارشات ہک مہینے اچ مکمل کرے۔ انھاں حکومت دی کارکردگی اچ بہتری گھن آوݨ کیتے رائٹ سائزنگ دے حوالے نال اقدامات تے عملدرآمد تیز کرݨ دی ہدایت کیتی۔ اجلاس اچ رائٹ سائزنگ کمیٹی ولوں رائٹ سائزنگ دے حوالے نال اقدامات دی پیشرفت تے بریفنگ ݙتی ڳئی۔ اجلاس اچ ݙسایا ڳیا جو رائٹ سائزنگ اقدامات نال سول حکومت دے اخراجات دا جی ڈی پی اچ تناسب ڳھٹ تھیا۔ مختلف وزارتاں تے سرکاری محکمیاں اچ خالی اسامیاں دا خاتمہ کر ݙتا ڳیا، ایس او ایز تے خود مختار اداریاں دی رائٹ سائزنگ دے حوالے نال تجاویز مرتب کیتی ویندی پئن۔ بریفنگ دے مطابق پی آئی اے تے فرسٹ ویمن بینک لمیٹڈ دی نجکاری تھی ڳئی اے اتے متعدد سرکاری ملکیتی اداریاں دی نجکاری دے حوالے نال اقدامات کیتے ویندے پئن۔ اجلاس اچ وفاقی وزراء اعظم نذیر تارڑ، احسن اقبال، محمد اورنگزیب، ڈاکٹر مصدق مسعود ملک، مشیر برائے نجکاری محمد علی، وزیرِ مملکت برائے خزانہ بلال اظہر کیانی تے متعلقہ اداریاں دے اعلیٰ افسران شریک ہن۔