پاکستان تے امریکہ اچ بہتر اقتصادی تعاون تے سرمایہ کاری دے ذریعے آندے پنج سالاں اچ سانجھی تجارت کوں ودھا تے 20 ارب امریکی ڈالر تئیں گھن تے ونڄ سڳدوں، نائب وزیراعظم اسحاق ڈار

اسلام آباد۔28جولائی (اے پی پی) نائب وزیراعظم تے وزیرِخارجہ سینیٹر محمد اسحاق ڈار امریکی تجارتی اداریں کوں پاکستان اچ بہتر سرمایہ کاری دی فضا توں فیدہ چاوݨ دی دعوت ݙیندیں آکھیا جو ݙوہیں ملک بہتر اقتصادی تعاون تے سرمایہ کاری دے ذریعے آندے پنج سالاں اچ سانجھی تجارت کوں ودھا تے 20 ارب ڈالر تئیں گھن ونڄ سڳدن۔ اتھاں وزارتِ خارجہ اچ امریکی کانگریس دے ہک وفد تے اعلیٰ سطح دے امریکی تجارتی وفد نال خطاب کریندیں نائب وزیراعظم آکھیا جو پاکستان امریکہ دے نال اپݨی پراݨی تزویراتی تے اقتصادی شراکت داری کوں اہمیت ݙیندے تے تجارت، سرمایہ کاری تے ابھردے ہوئے شعبیں اچ تعاون دے ودھارے کیتے پرعزم اے۔ وفد دا خیرمقدم کریندیں اسحاق ڈار آکھیا جو ایں دورے توں ݙوہیں ملکاں وچال پراݨی دوستی تے پاک-امریکہ تعلقات اچ مثبت پیشرفت دی عکاسی تھیندی اے۔ انھاں آکھیا جو پاکستان تے امریکہ بالترتیب دنیا دی پنجویں تے تریجھی وݙی آبادیاں ہن تے او ہک ݙوجھے دی اقتصادی صلاحیتاں توں فیدہ چیندیں سانجھے مفاد تے مبنی مضبوط شراکت داری قائم کرݨ دی بے پناہ استعداد رکھیندن۔انھاں آکھیا جو امریکہ پاکستان دی برآمدات کیتے ساریں توں وݙی واحد منڈی اے، گزریل مالی سال دے دوران ݙوہیں ملکاں وچال تجارت دا حجم 9.4 ارب ڈالر تئیں پڄ ڳیا۔ انھاں یقین ظاہر کیتا جو آندے پنج سالاں اچ تجارتی حجم کوں ودھا تے 20 ارب امریکی ڈالر تئیں گھن آیا ونڄ سڳدے۔ نائب وزیراعظم آکھیا جو پاکستان ایجھی منصفانہ، متوازن تے سانجھے مفاد تے مبنی تجارت تے یقین رکھیندے جو ݙوہیں معیشتاں کیتے قدر پیدا کرے تے ݙوہیں ملکاں دے عوام دی سانجھی خوشحالی دا باعث بݨے۔انھاں آکھیا جو پاکستان امریکہ توں کپاہ تے سویابین درآمد کرݨ آلے وݙے ملکاں اچ شامل اے جیں نال امریکی کساناں کوں فیدہ پڄدے جݙاں جو پاکستان امریکی ہائیڈروکاربن مصنوعات دی ہک اہم منڈی دے طور تے وی ابھردا پئے۔ ایویں پاکستان اچ جدید مشینری، ٹیکنالوجی تے ٻئے سامان دی ودھدی طلب امریکی صنعت کاراں کیتے نمایاں موقع ݙیندی اے۔ انھاں آکھیا جو معروف امریکی کمپنیاں پاکستان اچ ٹیکنالوجی، مصنوعی ذہانت، اہم معدنیات، توانائی، دفاع تے مینوفیکچرنگ دے شعبیں اچ سرمایہ کاری دے موقع دا جائزہ گھندیاں پئن۔ انھاں آکھیا جو پاکستان اچ جاری اصلاحات تے امریکہ دی مسابقتی ٹیرف پالیسی وی ملک کوں سرمایہ کاری کیتے مزید پرکشش بݨا ݙتے۔سینیٹر محمد اسحاق ڈار سپیشل انویسٹمنٹ فسیلی ٹیشن کونسل دے کردار کوں اجاگر کریندیں آکھیا جو اے ہک ون ونڈو پلیٹ فارم اے جیڑھا سرمایہ کاراں کوں ساری ضروری منظوریاں دے عمل کوں سوکھا بݨاوݨ تے حکومتی اداریں وچال مؤثر ہم آہنگی دے ذریعے سہولت ݙیندے۔ انھاں امریکی تجارتی رہنماواں کوں ترغیب ݙتی جو او ایس آئی ایف سی دے نال اپݨا رابطہ برقرار رکھن تاں جو دستیاب موقع کوں طویل المدتی تجارتی شراکت داری اچ تبدیل کیتا ونڄ سڳے۔انھاں آکھیا جو حکومتِ پاکستان امریکی حکومت، تجارتی اداریں، سرمایہ کاراں تے تجارتی شخصیتاں دے نال تعمیری تعاون کوں مزید مضبوط بݨاوݨ کیتے پرعزم اے تاں جو چیزاں تے خدمات، بالخصوص آئی ٹی، مصنوعی ذہانت، توانائی، مینوفیکچرنگ، اہم معدنیات، زراعت تے ٻئے ابھردے ہوئے شعبیاں اچ تجارت تے سرمایہ کاری کوں ودھارا ݙتا ونڄ سڳے۔ انھاں آکھیا جو پاکستان امریکی سرمایہ کاری اچ ودھارے کیتے خصوصی اقتصادی زونز تے ٹیکنالوجی پارکس سودھے مسابقتی مراعات ݙیوݨ کیتے تیار اے۔نائب وزیراعظم ایں امید دا اظہار وی کیتا۔ جو امریکی ایکسپورٹ امپورٹ بینک، امریکی انٹرنیشنل ڈویلپمنٹ فنانس کارپوریشن تے امریکی ٹریڈ اینڈ ڈویلپمنٹ ایجنسی ݙوہیں ملکاں وچال تجارت تے سرمایہ کاری دے ودھارے اچ اپݨا تعاون جاری رکھیسن۔ انھاں امریکی سرمایہ کاراں کوں پاکستان دی اقتصادی تبدیلی دا شراکت دار بݨݨ دی دعوت ݙیندیں ہوئیں یقین ݙوایا جو وزیراعظم شہباز شریف دی قیادت اچ حکومت انھاں دی طویل المدتی کامیابی کیتے ہر ممکن سہولت ݙیندی رہسی۔ انھاں آکھیا جو واشنگٹن اچ پاکستان دا سفارتخانہ تے امریکہ بھر اچ قائم پاکستانی قونصل خانے امریکی سرمایہ کاراں کوں پاکستان دے متعلقہ اداریں نال رابطے اچ معاونت ݙیندے رہسن۔ݙوطرفہ تعلقات دے وسیع تناظر تے روشنی پیندیں محمد اسحاق ڈار آکھیا جو پاکستان تے امریکہ پائیدار امن، استحکام تے خوشحالی دے مشترکہ مقصد کیتے کم کریندے پئن۔ انھاں آکھیا جو پاکستان جھیڑیں دے حل تے علاقائی امن دے قیام کیتے ڳالھ مہاڑ تے سفارتکاری کوں ہی واحد پائیدار رستہ سمجھدے۔ نائب وزیراعظم آکھیا جو گزریل کجھ سالاں دے دوران پاکستان عالمی سفارتی سطح تے اپݨی مثبت شناخت کوں مضبوط بݨائے تے اڄ ایں کوں ہک ذمہ وار امن پسند ملک دے طور تے تسلیم کیتا ویندے جو علاقائی تے عالمی استحکام اچ مؤثر کردار ادا کریندا پئے۔ انھاں امریکی تجارتی وفد دے ارکان تے زور ݙتا جو او امریکہ اچ پاکستان دے مثبت تشخص دے سفیر دا کردار ادا کرن تے امریکی تجارتی برادری دے سامݨے پاکستان دی وسیع اقتصادی صلاحیتاں تے سرمایہ کاری دے موقع کوں اجاگر کرݨ اچ فعال کردار ادا کرن۔