ملک اچ تیز ترین انٹرنیٹ ݙیوݨ کیتے فائیو جی انٹرنیٹ سروس ݙیندے پیوں ،آئی ٹی برآمدات اچ تکھے ودھارا تھیندا پئے، شزہ فاطمہ خواجہ

اسلام آباد۔28جولائی (اے پی پی): وفاقی وزیر انفارمیشن ٹیکنالوجی و ٹیلی کمیونیکیشن شزہ فاطمہ خواجہ آکھیا جو ملک اچ تیز ترین انٹرنیٹ ݙیوݨ کیتے فائیو جی انٹرنیٹ سروس ݙیندے پیوں ، آئی ٹی برآمدات اچ تکھے ودھارا تھیندا پئے۔ اے ڳالھ انہاں جی ایس ایم اے ڈیجیٹل نیشن پاکستان دی تقریب نال خطاب کریندیں آکھی ۔ وفاقی وزیر آکھیا جو آئی ٹی سیکٹر ملکی معیشت اچ اہم کردار ادا کریندا پئے، آئی ٹی برآمدات اچ تکھے ودھارا تھیندا پئے۔ انھاں آکھیا جو ملک اچ تیز ترین انٹرنیٹ ݙیوݨ کیتے فائیو جی انٹرنیٹ سروس ݙیندے پیوں، ملک اچ کنکٹیویٹی کوں ودھارا ݙتا ویندا پئے۔شزہ فاطمہ خواجہ آکھیا جو ملک اچ انٹرنیٹ صارفین دی تعداد اچ ودھارا تھیندا پئے، گزریل پنج سالاں اچ ملکی انٹرنیٹ دے استعمال اچ ودھارا تھئے 2024 اچ 20 لکھ صارفین صرف انٹرنیٹ فائبریزیشن استعمال کریندے پئن، ہݨ ایں اچ تکھے ودھارا تھئے ۔ انھاں آکھیا جو وزیراعظم دا عزم ملک اچ بہترین انٹرنیٹ دی ݙیوݨ تے ڈیجیٹل پاکستان اے، صوبے ایں حوالے نال رل تے بہترین کم کریندے پئن۔ایں موقع تے ٹیلی کام نیٹ ورک دی ساریں توں وݙی بین الاقوامی تنظیم جی ایس ایم اپݨی رپورٹ جاری کر ݙتی۔ ڈیجیٹل پاکستان 2030، جی ایس ایم اے دی رپورٹ جولیئن گورمن، ہیڈ آف ایشیا پیسفک، جی ایس ایم اے پیش کیتی۔ جولئین گورمن آکھیا جو پائیدار سرمایہ کاری، اعتماد تے جامع ترقی کیتے پیشرفت کوں مزید تکھا کرݨا ناگزیر اے۔ انھاں آکھیا جو تریمتاں کیتے ڈیجیٹل خدمات تئیں رسائی اچ معاشرتی عوامل تے خرچے اہم رکاوٹ ہن، 28 فیصد تریمتاں اپݨا انٹرنیٹ فون نہ ہووݨ پاروں ݙوجھیں دے موبائل تے انحصار کریندن، خواتین دی ڈیجیٹل شمولیت تے موبائل انٹرنیٹ دے استعمال اچ نمایاں ودھارا تھئے۔ انھاں آکھیا جو رپورٹ اچ ڈیجیٹل ترقی کیتے پنج اہم ترجیحات دا تعین وی کیتا ڳئے، سپیکٹرم پالیسی اصلاحات نال سرمایہ کاری دا ماحول مزید بہتر تھیا۔رپورٹ موجب ڈیجیٹل پاکستان وژن 2030 دے تحت پائیدار سرمایہ کاری تے جامع معاشی ترقی دی لوڑھ اے، پاکستان ڈیجیٹل تبدیلی دیاں مضبوط بنیاداں قائم کر ڳھدن، ڈیجیٹل گورننس اچ بہتری، قومی مسابقت اچ ٹیکنالوجی دا کردار مضبوط تھیا۔ رپورٹ اچ اے وی آکھیا ڳئے جو 2030 تئیں قابلِ اعتماد ڈیجیٹل انفراسٹرکچر تے سرمایہ کاری دے ودھارے دا ہدف ہووݨا چاہیدے، حکومت، صنعت تے ترقیاتی شراکت داراں دے سانجھے تعاون کوں ودھایا ونڄے، 2024 توں 2025 دے دوران تریمتاں اچ موبائل انٹرنیٹ دا استعمال 45 توں ودھ تے 53 فیصد تھیا، موبائل انٹرنیٹ دے استعمال اچ صنفی فرق 25 فیصد توں گھٹ تھئی تے 8 فیصد رہ ڳیا، موبائل شعبے 2025 اچ 278 ارب روپے ٹیکس تے فیساں دی مد اچ ادا کیتے، موبائل سیکٹر دیاں ٹیکس ادائیگیاں شعبے دی مجموعی آمدݨ دا تقریباً 40 فیصد رہیاں، فائیو جی نیٹ ورک توسیع کیتے سرمایہ کاری دی گنجائش برقرار رکھݨ ناگزیر اے۔ پائیدار سرمایہ کاری، ڈیجیٹل اعتماد تے جامع ترقی ہی ڈیجیٹل پاکستان 2030 دی بنیاد ہن۔