وفاقی وزیر قومی غذائی تحفظ و تحقیق رانا تنویر حسین نال ڈبلیو ایف پی دی نمائندہ تے کنٹری ڈائریکٹر انیتا ہرش دی ملاقات

اسلام آباد۔28جولائی (اے پی پی) وفاقی وزیر قومی غذائی تحفظ و تحقیق رانا تنویر حسین نال اقوامِ متحدہ دے ورلڈ فوڈ پروگرام (ڈبلیو ایف پی) دی نمائندہ تے کنٹری ڈائریکٹر انیتا ہرش ملاقات کیتی جیں اچ غذائی تحفظ، غذائیت، موسمیاتی تبدیلی نال مطابقت تے پائیدار زراعت دے شعبیں اچ تعاون دے ودھارے تے ڳالھ مہاڑ کیتی ڳئی۔وفاقی وزیر وفد دا خیرمقدم کریندیں پاکستان دے نال ورلڈ فوڈ پروگرام دی طویل شراکت داری دی تعریف کیتی تے غذائی تحفظ، غذائیت تے انسانی ہمدردی تے مبنی اقدامات اچ ادارے دے اہم کردار دی تعریف کیتی۔ رانا تنویر حسین وفد کوں ݙسایا جو حکومت قومی غذائی تحفظ پالیسی دی تیاری دا آغاز کر ݙتے جیڑھا فوڈ سسٹمز اپروچ تے مبنی ہوسی۔ انھاں پالیسی اچ غذائیت، ڈیجیٹل ٹیکنالوجی تے بین الاقوامی بہترین تجربیں کوں شامل کرݨ کیتے ڈبلیو ایف پی توں تکنیکی معاونت دی درخواست کیتی۔انیتا ہرش حکومتی اقدام دا خیرمقدم کریندیں قومی غذائی تحفظ پالیسی دی تیاری اچ مکمل تکنیکی تعاون دا یقین ݙیوایا ۔ انھاں غلہ ذخیرہ کرݨ، پوسٹ ہارویسٹ مینجمنٹ، سپلائی چین، غذائی اجزاء دی افزائش (فوڈ فورٹیفیکیشن) تے غذائیت دے شعبے اچ ڈبلیو ایف پی دی مہارت دا وی ݙسایا۔وفاقی وزیر بینظیر نشوونما پروگرام، قدرتی آفتاں توں متاثرہ علاقیں اچ امدادی سرگرمیاں تے غذائی تحفظ دے شعبے اچ ڈبلیو ایف پی دے کردار دی تعریف کریندے آکھیا جو پاکستان ایں پراݨی شراکت داری کوں مزید تکڑا بݨاوݨ چاہندے ۔ملاقات اچ پوسٹ ہارویسٹ مینجمنٹ، غلہ ذخیرہ کرݨ، غذائیت تے مبنی زراعت، فوڈ فورٹیفیکیشن، ڈیجیٹل حل تے پائیدار فوڈ سسٹمز دے ودھارے کیتے تعاون ودھاوݨ تے اتفاق کیتا ڳیا۔ ایں دے علاوہ قومی غذائی تحفظ پالیسی دی تیاری تے غذائی نظام دی بہتری کیتے ڈبلیو ایف پی، ایف اے او، آئی ایف اے ڈی تے ٻئے شراکت دار اداریں وچال نیڑے رابطہ ودھاوݨ تے وی اتفاق تھیا۔وفاقی وزیر ایں عزم دا اعادہ کیتا۔ جو حکومتِ پاکستان قومی غذائی تحفظ، بہتر غذائیت تے پائیدار زرعی ترقی دے اہداف دے حصول کیتے ڈبلیو ایف پی دے نال نیڑے تعاون جاری رکھیسی۔