جدید تے موثر لاجسٹکس نظام ہی برآمدات اچ ودھارے تے معاشی ترقی دی ضمانت اے، وفاقی وزیراحسن اقبال

اسلام آباد۔28جولائی (اے پی پی) قومی لاجسٹکس بورڈ (نیشنل لاجسٹکس بورڈ) دا 68واں اجلاس وفاقی وزیر منصوبہ بندی، ترقی و خصوصی اقدامات تے چیئرمین قومی لاجسٹکس بورڈ احسن اقبال دی زیرِ صدارت تھیا۔ اجلاس اچ بورڈ دے ٻئے ارکان وی شرکت کیتی۔اجلاس دے دوران کوارٹر ماسٹر جنرل پاکستان آرمی/افسر انچارج این ایل سی تے ڈائریکٹر جنرل این ایل سی ادارے دی انتظامی، آپریشنل تے مالیاتی کارکردگی تے بورڈ کوں تفصیلی بریفنگ ݙتی۔ بورڈ کوں ݙسایا ڳیا جو این ایل سی علاقائی رابطہ کاری دے ودھارے پاکستانی مصنوعات کیتے برآمدی موقع اچ تنوع پیدا کرݨ تے بین الاقوامی تجارتی راہداریاں دے قیام دے حوالے نال نمایاں کامیابیاں ڳھدن ۔ایں سلسلے اچ ترکمانستان دے شہر سرحت آباد، ازبکستان دے شہر ترمذ تے چین دے شہر کاشغر اچ فارورڈ ٹرانزٹ ٹریڈ مراکز دے قیام نال خطے اچ تجارتی رابطے کوں مزید مستحکم بݨاوݨ اچ مدد ملسی۔شرکاء کوں این ایل سی دی طرفوں لاجسٹکس انفراسٹرکچر دی بہتری، زرعی مصنوعات دی ویلیو ایڈیشن تے برآمدات دے ودھارے کیتے شروع کیتے ڳئے نویں منصوبیں دا وی ݙسایا ڳیا ۔قومی لاجسٹکس کارپوریشن (این ایل سی) دے 68ویں بورڈ اجلاس نال خطاب کریندیں وفاقی وزیر منصوبہ بندی، ترقی و خصوصی اقدامات تے چیئرمین بورڈ احسن اقبال این ایل سی کوں ہدایت کیتی جو او سوست ڈرائی پورٹ تے خنجراب بارڈر ٹرمینل کوں پاکستان دی برآمدات دے ودھارے تے علاقائی تجارتی رابطے دے استحکام کیتے ہک سٹریٹجک مرکز دے طور تے مزید وسعت ݙیوݨ تے خصوصی توجہ ݙیوے۔ انھاں بین الاقوامی معیار موجب جدید ڈرائیونگ اکیڈمی دے قیام دی لوڑھ وی زور ݙتا تاں ایجھے ہنر مند ڈرائیور تیار کیتے ونڄ سڳن جو عالمی منڈی دی ضرورتاں پوریاں کرݨ دی صلاحیت رکھیندے ہوون۔انھاں ایں ڳالھ تے وی زور ݙتا جو تربیت حاصل کرݨ آلیں کوں غیر ملکی زباناں دی تعلیم وی ݙتی ونڄے تاں جو او خصوصاً چین پاکستان اقتصادی راہداری (سی پیک) دے تحت سرحد پار تجارت تے لاجسٹکس دے شعبے اچ بین الاقوامی شراکت داراں نال موثر انداز اچ رابطہ تے ہم آہنگی قائم کر سڳن۔ انھاں آکھیا جو “اُڑان پاکستان” دے اہداف خصوصاً برآمدات تے مبنی معاشی نمو، صنعتی مسابقت تے علاقائی رابطے دے ودھارے کیتے ہک موثر، مربوط تے جدید ٹیکنالوجی نال آراستہ لاجسٹکس نظام ناگزیر اے۔وفاقی وزیر آکھیا جو اڄ دا اجلاس اساکوں اپݨی پیش رفت دا جائزہ گھنݨ، درپیش رکاوٹاں کوں مکاوݨ تے اجتماعی کوششاں کوں ایں مقصد کیتے ہم آہنگ کرݨ دا موقع ݙیندے جو ایجھا لاجسٹکس نظام تشکیل ݙتا ونڄے جیڑھا برآمدات اچ ودھارے، سرمایہ کاری دے ودھارے، علاقائی تجارت دے استحکام تے پاکستان کوں جنوبی ایشیا، وسطی ایشیا، چین تے مشرقِ وسطیٰ وچال ہک موثر علاقائی رابطہ مرکز دے طور تے مستحکم کرݨ اچ کلیدی کردار نبھاوے۔