وزیرِخزانہ محمد اورنگزیب دی صدارت اچ جی ایم مکئی کمیٹی دا ݙوجھا اجلاس، ورکنگ گروپ بݨا ݙتا، اتفاقِ رائے تے مبنی سفارشات تیارکرݨ دی ہدایت

اسلام آباد۔28جولائی (اے پی پی) وفاقی وزیرِخزانہ و محصولات سینیٹر محمد اورنگزیب دی زیرِ صدارت جینیاتی طور تے تبدیل شدہ (جی ایم) مکئی متعلق قائم کمیٹی دا ݙوجھا اجلاس منعقد تھیا جیں اچ پاکستان اچ جی ایم مکئی دی ٹیکنالوجی کوں اپناوݨ دے حوالے نال پیشرفت دا جائزہ ڳھدا ڳیا تے آندے لائحہ عمل تے غور تھیا۔اجلاس دے آغاز اچ وزیرِ خزانہ شرکاء تے زور ݙتا جو کمیٹی سائنسی شواہد، تکنیکی مہارت تے بین الاقوامی بہترین طریقہِ کار دی بنیاد تے سارے متعلقہ فریقاں دے تحفظات کوں سامݨے رکھیندیں اتفاقِ رائے نال سفارشات مرتب کرے۔اجلاس اچ گزریل اجلاس دے فیصلیں تے تھیوݨ آلی پیشرفت دا جائزہ ڳھدا ڳیا جنھاں اچ پالیسی دستاویزات ݙیوݨ تے مختلف سٹیک ہولڈرز دی طرفوں ملݨ آلی تحریری تجویزاں شامل ہن۔ شرکاء جی ایم مکئی دی ٹیکنالوجی دے ذریعے زرعی پیداوار اچ ودھارے، غذائی تحفظ کوں تکڑا بݨاوݨ، درآمدی انحصار اچ کمی تے زرعی شعبے دی مسابقت ودھاوݨ دے امکانات تے ڳالھ مہاڑ کیتی۔ نال ہی مکئی دی مقامی ملنگ انڈسٹری، برآمدی منڈیاں تے موجودہ زرعی ویلیو چین دے تحفظ دی لوڑھ تے وی زور ݙتا ڳئے ۔اجلاس اچ جی ایم تے نان جی ایم مکئی دے ھکے ویلھے استعمال، ریگولیٹری نگرانی، بائیو سیفٹی اقدامات، ٹریس ایبلٹی، ذخیرہ کرݨ دیاں سہولتاں تے سپلائی چین مینجمنٹ متعلق سفارشات تے وی غور کیتا ڳئے۔ شرکاء ایں ڳالھ تے اتفاق کیتا جو نویں ٹیکنالوجی دے مؤثر نفاذ کیتے ہک منظم عبوری فریم ورک، مضبوط ریگولیٹری نظام تے بین الاقوامی بہترین طریقہِ کار کوں اپناوݨ ضروری اے تاں جو برآمدی مسابقت وی برقرار رہے۔وزیرِ خزانہ سینیٹر محمد اورنگزیب مختلف اسٹیک ہولڈرز دے چاتے ڳئے تحفظات کوں تسلیم کریندیں آکھیا جو جدید ٹیکنالوجی دا ودھارا تے موجودہ صنعتاں دا تحفظ نال نال اڳوں ودھݨا چاہیدے۔ انھاں آکھیا جو جی ایم تے نان جی ایم مکئی دا ھکے ویلھے وجود عملی طور تے ممکن اے تاں جو ایں کیتے مضبوط ریگولیٹری فریم ورک تے مؤثر سپلائی چین انتظامات ناگزیر ہن تاں جو پاکستان دے زرعی تے برآمدی مفادات دا مکمل تحفظ یقینی بݨایا ونڄ سڳے۔تفصیلی تکنیکی مشاورت کیتے کمیٹی متعلقہ سرکاری اداریں، صنعت، برآمد کنندگان تے ٹیکنالوجی ݙیوݨ آلے اداریں دے نمائندیں تے مشتمل ہک ورکنگ گروپ بݨاوݨ دا فیصلہ کیتا۔ اے ورکنگ گروپ ریگولیٹری فریم ورک، عبوری حکمتِ عملی، بائیو سیفٹی اقدامات تے سپلائی چین متعلق اتفاقِ رائے تے مبنی سفارشات تیار کرتے کمیٹی کوں پیش کریسی۔وزیرِ خزانہ ہدایت کیتی جو ورکنگ گروپ سارے متعلقہ فریقاں نال نیڑے مشاورت کریندیں ترجیحی بنیاداں تے اپݨی سفارشات مکمل کرے۔ انھاں ایں عزم دا اعادہ کیتا۔ جو حکومت جدید زرعی ٹیکنالوجی تے جدت دے ودھارے دے نال نال پاکستان دے زرعی شعبے، مقامی صنعت تے برآمدی مفادات دے تحفظ کوں وی یقینی بݨیسی۔اجلاس اچ وزیراعظم دے کوآرڈینیٹرزراعت و غذائی تحفظ، وفاقی سیکرٹری قومی غذائی تحفظ و تحقیق، پاکستان گرین انیشیٹو دے چیف ایگزیکٹو، متعلقہ تجارتی و برآمدی شعبیں دے نمائندیں تے زرعی و سائنسی ماہرین شرکت کیتی۔