بالائی علاقیاں اچ متوقع بارشاں پاروں دریاواں تے ملحقہ ندی نالیاں اچ پاݨی دے بہاؤ اچ اضافے دا خدشہ اے: ترجمان پی ڈی ایم اے

لاہور۔29جولائی (اے پی پی) پنجاب دے زیادہ تر دریاواں اچ گزشتہ چووی گھنٹیاں دے دوران پاݨی دا بہاؤ نارمل رہیا جڈانجو بالائی علاقیاں اچ متوقع بارشاں دی وجہ توں دریاواں تے ملحقہ ندی نالیاں اچ پاݨی دے بہاؤ اچ اضافے دا خدشہ اے۔ ترجمان پی ڈی ایم اے دے مطابق دریائے سندھ اچ کالا باغ تے تونسہ دے مقام تے نچلے درجے دی سیلابی صورتحال اے۔ کالا باغ اچ پاݨی دی آمد 2 لکھ 62 ہزار تے اخراج 2 لکھ 53 ہزار کیوسک اے۔ تونسہ اچ پاݨی دی آمد 3 لکھ 10 ہزار تے اخراج 2 لکھ 90 ہزار کیوسک اے۔ دریائے سندھ اچ تربیلا تے چشمہ دے مقام تے وی پاݨی دا بہاؤ نارمل سطح تے اے۔ دریائے چناب اچ مرالہ، تریموں، پنجند تے قادر آباد دے مقاماں تے پاݨی دا بہاؤ نارمل اے۔ دریائے راوی اچ جسڑ، شاہدرہ، ہیڈ سدھنائی تے بلوکی اچ وی پاݨی دا بہاؤ نارمل اے۔ دریائے ستلج اچ گنڈا سنگھ والا، سلیمانکی تے ہیڈ اسلام اچ پاݨی دا بہاؤ نارمل اے۔ ڈیرہ غازی خان رود کوہیاں اچ وی پاݨی دا بہاؤ نارمل اے۔ ترجمان پی ڈی ایم اے دے مطابق حالیہ بارشاں دے سپیل دی وجہ توں لاہور، راولپنڈی، گوجرانوالہ، گجرات، سیالکوٹ، فیصل آباد تے ملتان اچ اربن فلڈنگ دا امکان اے جڈانجو مری، گلیات تے پہاڑی علاقیاں اچ لینڈ سلائیڈنگ دا خدشہ اے۔ ڈی جی پی ڈی ایم اے عمر عباس میلہ آکھیا جو بالائی کیچمنٹس اچ متوقع بارشاں پاروں مشرقی دریاواں تے انھاں نال ملحقہ نالیاں دے بہاؤ اچ اضافے دا خدشہ اے اتے برساتی نالیاں اچ وی فلیش فلڈنگ دا خطرہ اے۔ ڈی جی پی ڈی ایم اے آکھیا جو دریاواں دے پاٹ اچ موجود شہری فوری محفوظ مقاماں تے منتقل تھی ونڄن۔ حکومتِ پنجاب ولوں سیلاب توں متاثرہ علاقیاں اچ فلڈ ریلیف کیمپس قائم کر ݙتے ڳئن۔ فلڈ ریلیف کیمپس اچ تمام بنیادی سہولتاں تے ادویات فراہم کیتیاں ویسن۔ ڈی جی عمر میلہ شہریاں توں اپیل کیتی جو موسم تے سیلاب دی صورتحال دے پیشِ نظر احتیاطی تدابیر اختیار کرن۔ دریاواں، نہراں تے ندی نالیاں دے اطراف سیر و تفریح توں گریز کرن۔ ٻالاں دا خاص خیال رکھن اتے انھاں کوں دریاواں، ندی نالیاں اچ ہرگز نہ دھاوݨ ݙیون۔