وزارتِ مذہبی امور آندے چار سال کیتے حج پالیسی دا اعلان کر ݙتا، عازمین اندازاً اخراجات دا 10 فیصد جمع کروا تے آپݨے پسند دے سال کیتے رجسٹر تھی سڳسن

اسلام آباد۔29جولائی (اے پی پی) وزارتِ مذہبی امور آندے چار سال کیتے حج پالیسی دا اعلان کر ݙتے۔ حج 2027ء کیتے درخواستاں دی وصولی 10 توں 15 ݙینہاں اچ شروع کیتی ویسی، سرکاری سکیم دا کوٹہ 60 فیصد جڈانجو پرائیویٹ سکیم دا کوٹہ 40 فیصد ہوسی تاہم وفاقی کابینہ کوں ایں اچ رد و بدل دا اختیار ہوسی۔ بدھ کوں وفاقی وزیرِ مذہبی امور سردار محمد یوسف سیکریٹری مذہبی امور ابرار احمد مرزا دے نال پریس کانفرنس اچ حج پالیسی دا اعلان کیتا۔ سردار محمد یوسف آکھیا جو پاکستان دی تاریخ دی پہلی چار سالہ حج پالیسی 2027ء تا 2030ء قوم دے سامݨے پیش کریندے پئیوں۔ اے صرف ہک پالیسی نئی بلکہ حج انتظامات اچ ہک بنیادی تے دیرپا اصلاحات دا آغاز اے، جئیں دا مقصد عازمینِ حج کوں ودھ توں ودھ سہولت، شفافیت، اعتماد تے معیاری خدمات فراہم کرݨ اے۔ اے پالیسی وزیراعظم محمد شہباز شریف دی دور اندیش قیادت، خصوصی رہنمائی تے ذاتی دلچسپی دا عملی مظہر اے۔ وزیراعظم دی واضح ہدایات ہن جو حج دے پورے نظام کوں جدید تقاضیاں نال ہم آہنگ کیتا ونڄے، ٹیکنالوجی توں بھرپور استفادہ کیتا ونڄے، شفافیت کوں یقینی بݨایا ونڄے اتے ہر مرحلے تے عازمین دی سہولت کوں اولین ترجیح ݙتی ونڄے۔ انھاں آکھیا جو ایں وژن کوں ہک جامع، قابلِ عمل تے مستقبل تے مبنی پالیسی دی صورت اچ قوم دے سامݨے پیش کریندے پئیوں۔ انھاں وزارتِ انفارمیشن ٹیکنالوجی تے نیشنل آئی ٹی بورڈ دی پوری ٹیم کوں وی خراجِ تحسین پیش کیتا جنھاں وزارتِ مذہبی امور دے نال قریبی تعاون کریندیں ہوئیں حج دے نظام کوں جدید ڈیجیٹل بنیاداں تے استوار کرݨ اچ غیر معمولی کردار ادا کیا۔ رجسٹریشن توں گھن تے مانیٹرنگ، شکایات دے ازالے تے بعد از حج جائزے تک ڈیجیٹل نظام دی تشکیل حکومت دے ایں عزم دا مظہر اے جو عوام کوں تیز، شفاف تے آسان خدمات فراہم کیتیاں ونڄن۔ اساں کوں یقین اے جو اے چار سالہ پالیسی نہ صرف آئندہ کئی ورہیاں کیتے بہتر منصوبہ بندی کوں ممکن بݨیسی بلکہ پاکستان دے حج انتظامات کوں عالمی معیار نال ہم آہنگ کریندیں ہوئیں لکھاں عازمین دے اعتماد کوں مزید مضبوط کریسی۔سال 2027ء توں 2030ء تک سرکاری تے نجی حج اسکیم دا کوٹہ بالترتیب 60 تے 40 فیصد برقرار رکھیا ویسی جڈاں تئیں وفاقی کابینہ ایں اچ کوئی تبدیلی نہ کرے۔ حکومت بتدریج براہِ راست حج انتظامات کرݨ دی بجائے نگرانی، ریگولیشن تے معیار کوں یقینی بݨاوݨ دا کردار ادا کریسی جڈانجو نجی شعبے دی شمولیت اچ اضافہ ہوسی۔ عازمینِ حج رجسٹریشن دے وقت اندازاً حج اخراجات دا 10 فیصد جمع کروا تے آپݨی پسند دے سال کیتے رجسٹر تھی سڳسن۔ حج کیتے انتخاب مکمل طور تے شفاف ڈیجیٹل ویٹنگ لسٹ دے ذریعے “پہلے آؤ، پہلے پاؤ” دی بنیاد تے کیتا ویسی۔سرکاری حج سکیم دے تحت مختلف دورانیے دے متعدد حج پیکیج متعارف کروائے ویسن، تاکہ عازمین آپݨی ضرورت تے سہولت دے مطابق انتخاب کر سڳن۔ تمام خریداری تے معاہدے پاکستان تے سعودی عرب اچ سرکاری خریداری دے قواعد دے مطابق شفاف طریقے نال کیتے ویسن۔ حج آپریشن مکمل تھیوݨ دے بعد اگر جمع شدہ حج واجبات اچوں کڄھ رقم بچسی تاں او عازمینِ حج کوں واپس کر ݙتی ویسی۔سرکاری تے نجی ݙوہائیں حج انتظامات دا آزادانہ تھرڈ پارٹی دے ذریعے غیر جانبدارانہ جائزہ گھدا ویسی تانجو خدمات دے معیار کوں مزید بہتر بݨایا ونڄ سڳے۔ نجی حج کمپنیاں دی رجسٹریشن تے نگرانی، انھاں دی کارکردگی تے سہولتاں دے مقررہ معیار تے عمل درآمد دی بنیاد تے ہوسی، صرف کوٹہ دی بنیاد تے نھیں— تمام نجی حج کمپنیاں کیتے پرائیویٹ حج مینجمنٹ پورٹل دا استعمال لازمی ہوسی، جئیں دے ذریعے بکنگ، ادائیگیاں، نگرانی تے آڈٹ مکمل طور تے ڈیجیٹل انداز اچ ہوسی۔حج دی تمام ادائیگیاں صرف حکومت دے مقرر کردہ بینکاری ذرائع توں کیتیاں ویسن، جئیں نال شفافیت تے مالی تحفظ یقینی ہوسی۔ عازمین دی شکایات دے فوری ازالے کیتے جدید ڈیجیٹل شکایت نظام، مؤثر نگرانی تے اپیل دا باقاعدہ نظام متعارف کروایا ویندا پئے۔ معاونینِ حج دے انتخاب کیتے کابینہ کمیٹی ولوں مکمل طور تے میرٹ تے مبنی جامع معیار وضع کیتا ویسی تاکہ بہترین افراد دا انتخاب ممکن تھی سڳے۔نویں حج پالیسی کوں سعودی ویژن 2030 تے بین الاقوامی معیاری طریقہِ کار نال ہم آہنگ ٻݨایا ڳئے۔ہک سوال دے جواب اچ وزیرِ مذہبی امور دا آکھݨ ہئی جو ابتدائی طور تے حج اخراجات دا تخمینہ 12 توں 13 لکھ لاتا ڳئے ایں اچ رد و بدل وی تھی سڳدے۔ ہک سوال دے جواب اچ سیکرٹری مذہبی امور ابرار احمد مرزا آکھیا جو پرائیویٹ ٹور اپریٹر دے حج کوٹے دی تعداد گھٹ توں گھٹ ݙو ہزار ہوسی تے زیادہ توں زیادہ ترائے ہزار ہوسی، پرائیویٹ سکیم دا کوئی وی حاجی براہِ راست ٹور آپریٹر کوں ادائیگی نہ کر سڳسی بلکہ او ادائیگی وی آن لائن پورٹل دے ذریعے کیتی ویسی۔ انھاں آکھیا جو آئندہ 10 توں 15 ݙینہاں اچ حج درخواستاں دی وصولی شروع تھیسی اتے رقم ݙو قسطاں اچ وصول کیتی ویسی۔وزارتِ مذہبی امور حاجیاں کیتے سیونگ سکیم دا وی جلد اعلان کریسی۔ ہک سوال دے جواب اچ وزیرِ مذہبی امور سردار محمد یوسف دا آکھݨ ہئی جو اڄاں تئیں پاکستان دا حج کوٹہ 1 لکھ 79 ہزار 210 اے۔ آئندہ چار سالاں کیتے رجسٹریشن کرواوݨ آلا کوئی وی فرد آپݨی مرضی دے مطابق 2027ء توں 2030ء تئیں کہیں وی سال کیتے درخواست ݙیوݨ دا اہل ہوسی۔