وزیراعظم شہباز شریف دی مختلف شعبیں اچ ٹیکس دی استعداد دے تخمینے کیتے جامع تے سائنٹیفک طریقہِ کار وضع کرݨ دی ہدایت

اسلام آباد۔29جولائی (اے پی پی) وزیراعظم محمد شہباز شریف مختلف شعبیں اچ ٹیکس دی استعداد دے تخمینے کیتے جامع تے سائنٹیفک طریقہِ کار وضع کرݨ دی ہدایت کریندیں آکھیا جو حکومت برآمدی تے مقامی شعبے کوں جیں قدر ممکن تھیا سہولت ݙیندی رہسی۔وزیرِاعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت ایف بی آر اصلاحات تے ہفتہ وار جائزہ اجلاس اتھاں منعقد تھیا جیں اچ محصولات اچ ودھارے تے ادارہ جاتی اصلاحات تے پیش رفت دا تفصیلی جائزہ ڳھدا ڳیا۔وزیراعظم اجلاس نال خطاب کریندیں ہدایت کیتی جو مختلف شعبیں اچ ٹیکس دی استعداد دے تخمینے کیتے ہک جامع تے سائنٹیفک طریقہِ کار وضع کرتے پیش کیتا ونڄے۔ انھاں پاور سیکٹر دے تعاون نال غیر رسمی معاشی سرگرمیاں تے ٹیکس چوری اچ ملوث لوکاں تے کاروباراں دا تعین کرتے انہاں دے خلاف قانونی کارروائی دی وی ہدایت کیتی۔وزیرِاعظم آکھیا جو پاکستان دی تاریخ اچ پہلی واری چینی دے پیداواری شعبے تے ایف بی آر دے اعداد و شمار اچ ہم آہنگی ایں ڳالھ دا واضح ثبوت اے جو ایف بی آر دی طرفوں نصب شدہ ٹریکنگ نظام فعال تے بہتر کارکردگی ݙکھیندا پئے۔ ایں ضمن اچ چیئرمین ایف بی آر تے انھاں دی ٹیم دیاں کوششاں لائقِ تحسین ہن۔وزیراعظم ٹیکس نظام اچ رہندیں سارے ضابطیں دی پابندی کرݨ تے ٹیکس جمع کراوݨ آلے لوکاں تے کاروبار دی تعریف کریندے آکھیے جو او ملک تے قوم دا قیمتی سرمایہ ہن ۔ انھاں آکھیا جو حکومت ٹیکس دے حوالے نال برآمدی تے مقامی شعبے کوں جیں قدر ممکن تھیا سہولت ݙتی تے اڳوں کیتے وی کریندی رہسی۔وزیراعظم ہدایت کیتی جو چیئرمین ایف بی آر تے سینئر افسر ہر مہینے دے پہلے ہفتے کراچی اچ موجود ہووݨ تاں جو کاروباری برادری دے مسئلے وقتی سݨے تے حل کیتے ونڄ سڳن۔ انھاں ٹیکسٹائل، مشروبات، سٹیل، پولٹری، خوردنی تیل تے گھیو تے ٹائرز دے شعبیں اچ پیداوار دی ڈیجیٹل نگرانی دا نظام دسمبر تئیں فعال بݨاوݨ دی وی ہدایت کیتی۔وزیرِاعظم آکھیا جو ایف بی آر اچ تقرریاں تے تبادلے صرف میرٹ دی بنیاد تے کیتے ویسن۔ انھاں ایف بی آر اچ افسراں دی جانچ دے نظام کوں لائقِ تحسین قرار ݙتا تے آکھیا جو میرٹ تے شفافیت اولین ترجیح رہسی۔ انھاں ہدایت کیتی جو چنڳی کارکردگی ݙکھاوݨ آلے افسراں دی فہرست مرتب کیتی ونڄے تاں جو یومِ آزادی تے انھاں کوں ایوارڈز ݙتا ونڄ سڳے۔وزیراعظم کسٹمز بانڈڈ ویئر ہائوسز اچ کہیں وی بے ضابطگی دی نشاندہی تے تدارک کیتے وقتی تھرڈ پارٹی آڈٹ تے ویلیڈیشن کراوݨ دا وی حکم ݙتا۔وزیراعظم کوں ایف بی آر دی طرفوں پیداواری شعبے کیتے ٹریکنگ نظام دی تنصیب، ایف بی آر اچ افرادی قوت دے حوالے نال نافذ کیتی ڳئی اصلاحات تے آپریشنل استعدادِ کار ودھاوݨ دے حوالے نال بریفنگ ݙتی ڳئی۔ اجلاس کوں ݙسایا ڳیا جو کھنڈ، سیمٹ، تمباخوں، ٹائلز تے کھاد دے شعبے اچ ٹریکنگ سسٹم مکمل طور تے فعال جݙاں جو مزید 5 شعبیں اچ نفاذ حتمی مرحلے اچ اے جیں دی ٹیکس استعداد 7 سو ارب روپے توں ودھ اے۔اجلاس کوں ݙسایا ڳیا جو 9 پیداواری شعبیں اچ ٹریکنگ نظام وضع کرݨ تے ایں دے نفاذ کیتے شعبیں دے نال رل تے کم جاری اے جیں پاروں 560 ارب روپے دے ٹیکس دی استعدادِ کار توں فیدہ چاتا ونڄ سڳسی۔ وزیراعظم ہدایت کیتی جو پیداواری شعبے اچ بالواسطہ ٹیکس کٹھا کرݨ کیتے ٹریکنگ نظام دے نفاذ کوں اڄوکے سال دے چھیکڑ تئیں یقینی بݨایا ونڄے۔افرادی قوت دے حوالے نال اصلاحات تے بریفنگ ݙیندیں ݙسایا ڳیا جو افسراں دی بھرتی ویلھے انہاں دی ٹریننگ ملک دی مایہ ناز یونیورسٹی توں کروائی ویندی پی اے جیں اچ میرٹ تے چنڳی کارکردگی دے اصولاں تے عملدرآمد یقینی بݨایا ویندا پئے، ایں دے نال نال حاضر افسراں دی ٹریننگ وی کروائی ویندی پئی اے، ٹریننگ ماڈیولز بین الاقوامی معیار تے پاکستان دے ٹیکس نظام دی ضرورتاں نال ہم آہنگ ہن۔اجلاس کوں ݙسایا ڳیا جو پیئر ریویو تے جانچ دے نظام دے نفاذ دے بعد کسٹمز تے ان لینڈ ریونیو اچ اہم پوسٹاں تے چنڳی شہرت رکھݨ آلے لوکاں دی تعیناتی یقینی بݨائی ویندی پی اے۔ ایف بی آر اچ ایجھے افسر تے اہلکار جنھاں دی کارکردگی بہتر اے، انھاں دی پذیرائی تے خراب کارکردگی آلے افسراں تے اہلکاراں دی سزا دا نظام وی متعارف کروایا ڳئے، شفافیت کوں یقینی بݨاوݨ کیتے 957 تھرڈ پارٹی آڈیٹرز دی تعیناتی تھی چکی اے جݙاں جو کسٹمز دے فیس-لیس نظام دے تحت 280 گڈز ایویلوایٹرز دی بھرتی دا عمل جاری اے جیں اچ میرٹ تے شفافیت کوں اولین ترجیح ݙتی ویندی پی اے۔ فیس لیس نظام دے ذریعے نہ صرف سامان دی ترسیل تے آوݨ کیتے درکار ویلھے اچ گھٹکی بلکہ ریکوری اچ وی ودھارا تھئے۔اجلاس کوں مزید ݙسایا ڳیا جو ٹیکس مقدمیں اچ غیر ضروری قانونی چارہ جوئی گھٹ کرݨ کیتے کیس سکرونٹی کمیٹی بݨائی ویندی پی اے جو ٹیکس متعلق مقدمیں دے اندراج دا فیصلہ میرٹ تے کریسی۔ ایویں متبادل تنازعاتی حل (اے ڈی سی آرز) فورم دے تحت جون 2026ء تئیں 377 درخواستاں اچوں 152 درخواستاں 90 ݙینھاں اندر نبیڑئیاں ڳئیاں جیں دے نتیجے اچ 54 ارب روپے دی ٹیکس وصولی ممکن تھئی۔اجلاس اچ وفاقی وزراء اعظم نذیر تارڑ، ڈاکٹر مصدق ملک، احد خان چیمہ، محمد اورنگزیب، عطاء اللہ تارڑ، شزہ فاطمہ خواجہ، علی پرویز ملک، وزیرِ مملکت بلال اظہر کیانی، گورنر سٹیٹ بینک جمیل احمد تے متعلقہ اعلیٰ حکام شرکت کیتی۔