اسلام آباد۔29جولائی(اے پی پی) نائب وزیراعظم تے وزیرِخارجہ اسحاق ڈار تے کویت دے وزیرِ خارجہ شیخ جراح جابر الاحمد الصباح وزارتِ خارجہ اچ وفد دی سطح دے مذاکرات دی مشترکہ صدارت کیتی۔دفترِ خارجہ موجب ݙوہیں فریقاں پاکستان تے کویت وچال ݙوطرفہ تعلقات دے سارے پہلوآں دا جامع جائزہ ڳھدا تے تجارت، سرمایہ کاری، توانائی، افرادی قوت، زراعت، انفارمیشن ٹیکنالوجی، صحت، کان کنی تے معدنیات، دفاع تے وسیع تر اقتصادی شراکت …
نائب وزیراعظم محمد اسحاق ڈار تے کویت دے وزیرِخارجہ شیخ جراح جابر الاحمد الصباح وچال وزارتِ خارجہ اچ وفد دی سطح دے مذاکرات
اسلام آباد۔29جولائی(اے پی پی) نائب وزیراعظم تے وزیرِخارجہ اسحاق ڈار تے کویت دے وزیرِ خارجہ شیخ جراح جابر الاحمد الصباح وزارتِ خارجہ اچ وفد دی سطح دے مذاکرات دی مشترکہ صدارت کیتی۔دفترِ خارجہ موجب ݙوہیں فریقاں پاکستان تے کویت وچال ݙوطرفہ تعلقات دے سارے پہلوآں دا جامع جائزہ ڳھدا تے تجارت، سرمایہ کاری، توانائی، افرادی قوت، زراعت، انفارمیشن ٹیکنالوجی، صحت، کان کنی تے معدنیات، دفاع تے وسیع تر اقتصادی شراکت داری سودھ مختلف شعبیں اچ تعاون مزید تکڑا بݨاوݨ دے طریقیں تے ڳالھ مہاڑ کیتی۔ ݙوہیں ملکاں ادارہ جاتی رابطے کوں مزید مستحکم بݨاوݨ تے اعلیٰ سطح دے رابطیں دے باقاعدہ تبادلے دے ذریعے ݙوطرفہ تعاون کوں مزید موثر تے منظم بݨاوݨ تے اتفاق کیتا۔ فریقین سانجھی دلچسپی دے امور تے کثیر الجہتی فورمز اچ نیڑے رابطے تے تعاون جاری رکھݨ دے اپݨے عزم دا وی اعادہ کیتا۔کویت دے وزیرِ خارجہ حکومتِ پاکستان تے پاکستانی عوام دی طرفوں کویتی وفد کیتے پرتپاک استقبال تے پرخلوص مہمان نوازی تے شکریہ ادا کیتا۔ انھاں کووڈ-19 وباء دے دوران کویت دی حمایت تے پاکستان کوں خراجِ تحسین پیش کیتا۔ نائب وزیراعظم تے وزیرِخارجہ کویت دے نال پاکستان دے پراݨے برادرانہ تعلقات کیتے پاکستان دے غیر متزلزل عزم دا اعادہ کریندیں ایں خواہش دا اظہار کیتا جو ݙوہیں ملک سانجھے مفاد تے مبنی شراکت داری کوں سارے شعبیں اچ مزید وسعت ݙیون۔ فریقین مشرقِ وسطیٰ تے فلسطین دی صورتحال سودھے سانجھی دلچسپی دے علاقائی تے بین الاقوامی امور تے وی ڳالھ مہاڑ کیتی۔ کویت دے وزیرِخارجہ خطے اچ امن تے استحکام دے ودھارے کیتے پاکستان دے تعمیری کرداردی تعریف کیتی۔
