سکیورٹی فورسز دی خیبر پختونخوا تے بلوچستان دے مختلف علاقیں اچ کارروائیاں، فتنہ الخوارج تے فتنہ الہندوستان نال تعلق رکھݨ آلے 32 دہشت گرد ہلاک

اسلام آباد۔29جولائی (اے پی پی) سکیورٹی فورسز خیبر پختونخوا تے بلوچستان دے مختلف علاقیں اچ کارروائیاں دے دوران فتنہ الخوارج تے فتنہ الہندوستان نال تعلق رکھݨ آلے 32 دہشت گرداں کوں ہلاک کرݙتے۔پاک فوج دے شعبہ تعلقاتِ عامہ (آئی ایس پی آر) توں جاری بیان موجب بھارتی سرپرستی اچ سرگرم فتنہ الخوارج تے فتنہ الہندوستان دے دہشت گرد نیٹ ورک دے خلاف سکیورٹی فورسز دی کارروائیاں دے تسلسل اچ خیبر پختونخوا تے بلوچستان دے مختلف علاقیں اچ جامع مشترکہ آپریشنز جاری ہن جنھاں دا مقصد دہشت گرداں تے انھاں دے سہولت کاراں دا مکمل خاتمہ اے۔پچھلے 24 گھنٹے دے دوران سکیورٹی فورسز بھارتی حمایت یافتہ انھاں دہشت گرد گروپاں دے 32 دہشت گرداں کوں ہلاک کر ݙتا 28 تے 29 جولائی دی وچلی رات خیبر پختونخوا دے ضلع خیبر اچ خفیہ اطلاعات دی بنیاد تے متعدد کلیئرنس تے ٹارگٹڈ آپریشنز کیتے ڳئے۔ انھاں کارروائیاں دے دوران سکیورٹی فورسز دہشت گرداں دے مختلف ٹھکاݨیں کوں موثر انداز اچ نشانہ بݨایا جیں دے نتیجے اچ فتنہ الخوارج نال تعلق رکھݨ آلے 24 دہشت گرد ہلاک تھی ڳئن۔ایں دوران بلوچستان دے ضلع نوشکی اچ وی خفیہ اطلاعات دی بنیاد تے ٻہوں سارے آپریشنز کیتے ڳئن جتھاں زور دی جھڑپ دے بعد فتنہ الہندوستان نال تعلق رکھݨ آلے 8 دہشت گرداں کوں جہنم واصل کر ݙتا ڳئے۔انھاں کارروائیاں دے دوران دہشت گرداں دے زیرِ استعمال اسلحہ، گولہ بارود تے دیسی ساختہ دھماکہ خیز مواد وی برآمد کرتے تباہ کر ݙتا ڳئے۔ علاقے اچ موجود کہیں وی ݙوجھے بھارتی سرپرستی اچ سرگرم دہشت گرد دے خاتمے کیتے کلیئرنس آپریشنزجاری ہن۔وفاقی ایپکس کمیٹی قومی ایکشن پلان دی منظوری نال شروع کیتے ڳئے وژن عزمِ استحکام دے تحت پاکستان دی سکیورٹی فورسز تے قانون نافذ کرݨ آلے اداریں دی بلا امتیاز انسدادِ دہشت گردی مہم پوری شدت دے نال جاری رہسی تاں جو ملک توں ٻاہرلی سرپرستی تے حمایت یافتہ دہشت گردی دے ناسور دا مکمل خاتمہ یقینی بݨایا ونڄ سڳے۔