وزیراعظم محمد شہباز شریف دی وفاقی حکومت دے زیرِ انتظام نویں بݨائے ڳئے قومی سطح دے مرکزی ڈیٹا سینٹر ‘سکائی 47’ دیاں سہولتاں سارے وفاقی اداریں کوں ݙیوݨ کیتے وقتی تے موثر اقدامات دی ہدایت

اسلام آباد۔29جولائی (اے پی پی) وزیراعظم محمد شہباز شریف وفاقی حکومت دے زیرِانتظام نویں بݨائے ڳئے قومی سطح دے مرکزی ڈیٹا سینٹر ‘سکائی 47’ دیاں سہولتاں سارے وفاقی اداریں کوں ݙیوݨ کیتے وقتی تے موثر اقدامات دی ہدایت کریندیں آکھیا جو قومی مربوط ڈیجیٹل پالیسی تے موثر عملدرآمد نال عالمی شراکت داری تے عالمی فورمز تے ملک دی موثر نمائندگی یقینی بݨائی ونڄ سڳسی۔ وزیراعظم دفتر دے میڈیا ونگ توں جاری بیان موجب اے ڳالھ انہاں قومی سطح دی مربوط ڈیجیٹل پالیسی فریم ورک تے عملدرآمد متعلق جائزہ اجلاس دی صدارت کریندیں آکھی ۔ اجلاس اچ وفاقی وزیرِ منصوبہ بندی احسن اقبال، وفاقی وزیرِ اقتصادی امور احد چیمہ، وفاقی وزیرِ خزانہ محمد اورنگزیب، وفاقی وزیرِ تجارت جام کمال خان، وفاقی وزیرِ قانون اعظم نذیر تارڑ، وفاقی وزیرِ اطلاعات و نشریات عطاء اللہ تارڑ، وفاقی وزیرِ قومی صحت سید مصطفیٰ کمال، وفاقی وزیرِ انفارمیشن ٹیکنالوجی شزا فاطمہ خواجہ، وزیرِ مملکت خزانہ بلال اظہر کیانی، گورنر سٹیٹ بینک جمیل احمد تے متعلقہ سرکاری اداریں دے افسراں شرکت کیتی۔وزیراعظم ہدایت کیتی جو وفاقی حکومت دے زیرِ انتظام نویں بݨائے ڳئے قومی سطح دے مرکزی ڈیٹا سینٹر ‘سکائی 47’ دیاں سہولتاں سارے وفاقی اداریں کوں میسر کرݨ کیتے وقتی تے موثر اقدامات چاتے ونڄن، پبلک سیکٹر اچ قومی سطح تے ہک مربوط ڈیٹا سینٹر ہی سارے اداریں دے ڈیٹا کوں مرکوز جاہ ݙیسی تے مختلف اداریں دے انڄ انڄ ڈیٹا سینٹرز دے قیام کوں روکݨ نال قومی وسائل دی بچت ہوسی۔وزیراعظم آکھیا جو پاکستان ڈیجیٹل اتھارٹی حکومتی خدمات، معاشرتی نظام بالخصوص عوام کوں شہری سہولتاں ݙیوݨ کیتے فعال مستعد تے انقلابی سمت دا تعین کریندی پئی اے، عصرِ حاضر دے تقاضیں موجب قومی ڈیجیٹل وژن دا اطلاق ہک مربوط معاشرے دی تشکیل اچ کلیدی حیثیت رکھیندے، قومی تے مربوط ڈیجیٹل وژن دے تحت ڈیجیٹل معیشت، ڈیجیٹل شہری سہولتاں تے ڈیجیٹل حکومتی خدمات، ترائے بنیادی ستوناں تے جاری کم لائقِ تحسین اے۔وزیراعظم آکھیا جو قومی مربوط ڈیجیٹل پالیسی تے موثر عملدرآمد نال عالمی شراکت داری تے عالمی فورمز تے ملک دی موثر نمائندگی یقینی بݨائی ونڄ سڳسی، سارے متعلقہ اداریں تے وفاقی و صوبائی حکومت دی مشاورت نال قومی ڈیجیٹل وژن تے مکمل عملدرآمد نال اداریں دی فیصلہ سازی، کارکردگی تے شفافیت عالمی معیار نال ہم آہنگ تھی ویسی، قومی ڈیجیٹل وژن دا اطلاق پہلے ترجیحاتی شعبیں بشمول صحت، زراعت، یوٹیلیٹیز، ہاؤسنگ تے چھوٹے تے درمیانے درجے دے صنعتی و تجارتی اداریں کیتے کیتا ونڄے تاں جو عوام کوں بہتر سہولتاں وقتی پڄائیاں ونڄ سڳن۔وزیرِ اعظم آکھیا جو قومی ڈیجیٹل وژن دے مکمل اطلاق دے بعد شہریاں کوں ہک ہی ڈیجیٹل آئی ڈی دے تحت ساریاں عوامی سہولتاں بشمول دستاویزات دی حکومتی تصدیق، بینک دی سہولتاں، صحت، ٹرانسفرز تے ٻئی ساری سہولتاں ہکی جاہ مل سڳسن، نیشنل ڈیجیٹل کمیشن دا اجلاس وقتی سݙایا ونڄے تاں جو صوبیں سودھے سارے شراکت داراں کوں ایں پالیسی تے اعتماد اچ ڳھدا ونڄے۔اجلاس کوں ݙسایا ڳیا جو ڈیجیٹل نیشن پاکستان ایکٹ 2025 دے تحت بݨائے ڳئے نیشنل ڈیجیٹل کمیشن دے سربراہ وزیرِاعظم ہن تے سارے صوبائی وزرائے اعلیٰ ایں دے ممبران ہن، وزیراعظم دی ہدایت موجب قومی ڈیجیٹل وژن دا اطلاق زراعت، خوراک، صحت، انرجی، ہاؤسنگ تے (ایس ایم ایز) چھوٹے تے درمیانے درجے دے صنعتی و تجارتی اداریں دے شعبیں اچ کیتا ویندا پئے، انھاں چار شعبیں دے علاوہ ٻئے 14 ترجیحاتی سیکٹرز تے وزیراعظم دی ہدایت موجب کم جاری اے جو نہ صرف شعبہ جاتی کارکردگی کوں بہتر بݨیسن بلکہ ملکی معیشت تے صنعت تے تجارت اچ وی مثبت اثرات مرتب کریسن، ہاؤسنگ دے شعبے اچ ایں دے اطلاق دے بعد نجی تے سرکاری ساری املاک کیتے ہک مرکزی نشاندہی نمبر میسرآسڳسی۔ ڈیجیٹل نظام دے سمال اینڈ میڈیم انٹرپرائزز دے شعبے اچ اطلاق توں کاروبار دی منفرد قانونی شناخت دا ہک مربوط نظام مرتب ہوسی جیڑھا ملک دی مجموعی پیداوار اچ ودھارے دا باعث بݨسی، قومی ڈیجیٹل وژن دے مکمل اطلاق کیتے سارے قانونی، انتظامی تے ادارہ جاتی اقدامات تکھے مکمل کیتے ویندے پئن، ایں تناظراچ عالمی ماہرین تے عالمی اداریں دی صلاح تے دنیا اچ رائج بہترین طریقیں توں وی استفادہ حاصل کیتا ڳئے۔