ٻاہرلے ملک رہݨ آلے پاکستانی ملک دا قیمتی اثاثہ ہن، کیو آر  کوڈ دے ذریعے  انھاں دیاں شکایتاں دے اندراج دی ڈیجیٹائیزیشن دے حوالے نال آگاہی پیدا کیتی ونڄے، وزیراعظم محمد شہباز شریف

اسلام آباد۔30جولائی(اے پی پی) وزیراعظم محمد شہباز شریف ٻاہرلے ملک رہݨ آلے پاکستانیاں کوں ملک دا قیمتی اثاثہ قرار ݙیندے آکھیے انہاں کوں ہر قسم دیاں سہولتاں ݙیوݨ حکومت دی اولین ترجیح اے، کیو آر  کوڈ دے ذریعے ٻاہرلے ملک رہݨ آلے پاکستانیاں دی شکایتاں دے اندراج دی ڈیجیٹائیزیشن دے حوالے نال آگاہی پیدا کیتی ونڄے۔ انہاں اے ڳالھ ٻاہرلے ملک پاکستانیاں کیتے سفارتخانیں اچ سہولتاں اچ ودھارے ، دستاویزات دے تصدیقی عمل دی ڈیجیٹائیزیشن، شکایتاں دے عمل کو مزید سہل بݨاوݨ تے ٻاہرلے مک توں پاکستان اچ مختلف کماں و ادائیگیاں کیتے ڈیجیٹل نظام دے حوالے نال وزارت خارجہ دی بریفنگ دے دوران آکھی ۔ وزیراعظم دفتر دے میڈیا ونگ توں جاری بیان موجب وزیراعظم دی صدارت اچ اجلاس اچ وزارت خارجہ، مختلف ملکاں اچ پاکستان دے سفرا ، وزارت داخلہ، ایف آئی اے، وزارت آئی ٹی اتے متعلقہ اعلیٰ حکام ایں حوالے نال تصیلات دا ݙسائے۔ وزیراعظم آکھیے ٻاہرلے ملک رہݨ آلے پاکستانی ساݙا قیمتی اثاثہ ہن جنہاں کوں ہرقسم دی سہولتاں ݙیوݨ حکومت دی اولین ترجیح اے۔ وزیراعظم کوں ݙسایا ڳئے جو ٻاہرلے ملک رہݨ آلے پاکستانیاں دی سہولت کیتے پاور آف اٹارنی اتے جائیداد دی خرید و فروخت دا نظام اتے دستاویزات دے تصدیقی عمل کوں سوکھا بݨاوݨ کیتے کیو آر کوڈ متعارف کروایا ڳئے۔ وزیراعظم آکھیے جو کیو آر کوڈ دے ذریعے پاکستانیاں دی شکایتاں دے اندراج دی ڈیجیٹائیزیشن خوش آئند اے، سفارتخانیں اچ اینکوں آویزاں کرتے رسائی اچ ودھارا کیتا ونڄے، کیو آر کوڈ دے ذریعے شکایتاں دے اندراج دے حوالے نال ٻاہرلے ملک رہݨ آلے پاکستانیاں کیتے خصوصی آگاہی مہم چلائی ونڄے تاں جو ودھ توں ودھ لوک ایں ںظام دے ذریعے شکایتاں دا اندراج کروا سڳن ۔وزیراعظم کوں ݙسایا ڳئے شہریاں دی سہولت کیتے وزارت خارجہ دے دفتر اسلام آباد اچ شام دی شفٹ دا ہݨے ہی آغاز کیتےایویں دستاویزات دی تصدیق دی سہولت کوں آسان خدمت مرکز اسلام آباد اچ وی متعارف کروایا ڳئے۔ ایں توں انڄ کورئیر دے ذریعے تصدیقی عمل متعارف کرااوݨ دے نال ہائیر ایجوکیشن کمیشن، انٹر بورڈز کوآرڈینیشن کمیشن، نادرا اتے نیشنل پولیس بیورو دے ڈیٹابیس نال منسلک کیتا ڳئے جئیں توں تصدیقی عمل مزید تکھا تھئے ۔ اجلاس کوں ݙسایا ڳئے جو اپوسٹائل دے نظام دے تحت تصدیقی عمل کوں ون سٹیپ کرݙتا ڳئے، آندے مرحلے اچ ایں پورے نظام کوں مکمل طور تے ڈیجیٹائز کرݨ تے کم تکھے جاری اے۔ ایں حوالے نال این آئی ٹی بی دے تعاون نال موبائل ایپلی کیشن تیار کیتی ویندی پئی اے جئیں اچ برتھ ڈیتھ سرٹیفیکیٹ، میرج رجسٹریشن سرٹیفیکیٹ، فیملی رجسٹریشن سرٹیفیکیٹ وغیرہ جیھے دستاویز دی وی ڈیجیٹل نظام دے ذریعے تصدیق ممکن ہوسی۔ اجلاس اچ نائب وزیراعظم / وزیر خارجہ اسحاق ڈار، وفاقی وزرا احد خان چیمہ، عطاء اللہ تارڑ، چوہدری سالک حسین، شزہ فاطمہ خواجہ، وزیرمملکت عون چوہدری، معاون خصوصی طارق باجوہ اتے متعلقہ اعلی حکام شرکت کیتی۔