فتنہ الہندوستان دی سفاکیت، تربت توں اغوا تھیوݨ آلے 6 غیر مقامی مزدور بیدردی نال شہید

کوئٹہ۔30جولائی (اے پی پی) بلوچستان دے علاقے کیچ، ناصر آباد اچ غیر مقامی مزدور ہک واری ول فتنہ الہندوستان دی بربریت دا شکار تھی ڳئن، تربت توں اغوا تھیوݨ آلے 6 غیر مقامی مزدور بیدردی نال شہید کر ݙتے ڳئن۔اطلاعات موجب فتنہ الہندوستان دے دہشت گرداں 27 جولائی کوں کیچ، ناصر آباد اچ غیر مقامی مزدور جاوید کوں شہید جݙاں جو 6 مزدوراں کوں اغوا کیتا ہئی۔ سفاک دہشت گرداں اڄ اغوا کیتے ڳئے سارے 6 غیر مقامی مزدوراں کوں وی بیدردی نال شہید کر ݙتے۔شہید مزدوراں اچ محمد ارشد، محمد تیمور، محمد پرویز، محمد وزیر، محمد امجد تے محمد یحییٰ شامل ہن۔ شہید کیتے ڳئے مزدوراں اچوں 4 دا تعلق پنجاب تے 2 دا تعلق خیبر پختونخوا نال ہئی۔ ایں توں علاوہ کجھ ݙینھ پہلے بلوچستان دے علاقے ماشکیل اچ وی 5 غیر مقامی مزدوراں کوں وی شہید کیتا ڳیا ہئی۔ اے سارے مزدور بلوچستان اچ ترقیاتی منصوبیں تے کم کرتے علاقے دی تعمیر تے ترقی اچ کردار ادا کریندے پئن۔ماہرین موجب دہشت گرداں مزدوراں کوں بے رحمی نال نشانہ بݨا تے نہ صرف نشوم جاناں کھس ڳھدن بلکہ بلوچستان دی ترقی تے عوام دے روزگار تے وی حملہ کیتے۔ ااے واقعہ ہک واری ول ثابت کریندے جو فتنہ الہندوستان دے دہشت گرد نہتے مزدوراں، عام شہریاں تے بلوچستان دے امن تے ترقی دے دشمن ہن۔ فتنہ الہندوستان دے دہشت گرد سکیورٹی فورسز دی بھرپور کارروائیاں توں پسپا تھی تے ہݨ نشوم نہتے شہریاں کوں نشانہ بݨیندے پئن۔