وفاقی وزیر طارق فضل چوہدری دی ہنگو اچ پولیس چیک پوسٹ تے دہشت گرد حملے دی مذمت

اسلام آباد۔30جولائی (اے پی پی) وفاقی وزیر پارلیمانی امور ڈاکٹر طارق فضل چوہدری ہنگو اچ پولیس چیک پوسٹ تے تھیوݨ آلے حملے دی شدید الفاظ اچ مذمت کریندیں شہداء دے اہل خانہ نال دلی ہمدردی تے تعزیت کیتی۔ ایکس تے اپݨے ہک مذمتی بیان اچ انھاں آکھیا جو ہنگو اچ پولیس چیک پوسٹ تے تھیوݨ آلا دہشت گرد حملہ انتہائی قابلِ مذمت تے افسوسناک اے۔ خیبر پختونخوا پولیس تے سکیورٹی فورسز دے بہادر جواناں جیں جرات، پیشہ ورانہ مہارت تے بہادری نال دہشت گرداں دے مذموم عزائم کوں ناکام بݨائے، او پوری قوم کیتے باعثِ فخر اے۔انھاں آکھیا جو دہشت گردی دے خلاف ایں جنگ اچ وطن تے اپݨی جاناں نچھاور کرݨ آلے شہداء کوں سلام پیش کریندوں، انھاں دیاں لازوال قربانیاں کݙھیں وی بھلائیاں نہ ویسن، میݙیاں دلی ہمدردیاں شہداء دے اہل خانہ دے نال ہن جݙاں جو زخمی اہلکاراں دی وقتی تے مکمل صحتیابی کیتے دعا کرینداں۔وفاقی وزیر آکھیا جو دہشت گردی دے ناسور دے مکمل خاتمے تئیں پوری قوم اپݨی بہادر پولیس، افواجِ پاکستان تے سارے سکیورٹی اداریں دے رلے کھڑی اے، انشاء اللہ دہشت گردی دے ہرفتنے کوں شکست تھیسی تے پاکستان امن تے استحکام دی منزل ضرور حاصل کریسی۔