چیئرمین سینیٹ سید یوسف رضا گیلانی نال جمہوریہ جنوبی کوریا دے اعلیٰ سطحی وفد دی ملاقات

اسلام آباد۔30جولائی (اے پی پی) چیئرمین سینیٹ سید یوسف رضا گیلانی نال جمہوریہ جنوبی کوریا دے ہک اعلیٰ سطحی وفد پارلیمنٹ ہاؤس اچ ملاقات کیتی تے پاکستان تے جنوبی کوریا وچال بائیو ٹیکنالوجی، مصنوعی ذہانت، صحت، فارماسیوٹیکل تے آئی ٹی سودھے مختلف شعبیں اچ تعاون دے ودھارے تے ڳالھ مہاڑ کیتی ۔وفد دی قیادت کے او اے بائیو (KOA-Bio) دے چیف ایگزیکٹو افسر چو کیتی جݙاں جو جنوبی کوریا دیاں ممتاز کمپنیاں دے مختلف شعبیں نال وابستہ اعلیٰ حکام وی وفد اچ شامل ہن۔سینیٹ سیکرٹریٹ موجب ملاقات دے دوران چیئرمین سینیٹ پاکستان تے جنوبی کوریا وچال پراݨی دوستانہ شراکت داری کوں اجاگر کریندیں آکھیا جو پاکستان ݙوہیں ملکاں وچال اقتصادی تے تکنیکی تعاون کوں اہمیت ݙیندے۔ انھاں آکھیا جو پاکستان تے جنوبی کوریا وچال تجارت، سرمایہ کاری، ٹیکنالوجی تے تعلیم دے شعبیں اچ تعاون مسلسل ودھدا پئے۔سید یوسف رضا گیلانی آکھیا جو بائیو ٹیکنالوجی، فارماسیوٹیکل، صحت، مصنوعی ذہانت تے آئی ٹی دے شعبیں اچ ݙوطرفہ تعاون دے وسیع موقع موجود ہن۔ انھاں بائیو ٹیکنالوجی، جدید ادویہ سازی تے کلینیکل ریسرچ اچ طویل المدتی شراکت داری کوں ناگزیر قرار ݙیندیں آکھیا جو سانجھے منصوبیں، ٹیکنالوجی دی منتقلی تے ادارہ جاتی تعاون کوں مزید ودھاوݨا ہوسی۔چیئرمین سینیٹ آکھیا جو پاکستان اچ جامعات، طبی اداریں، تحقیقاتی مرکزاں تے ماہرین تے مشتمل ہک باصلاحیت افرادی قوت موجود اے جیڑھی جدید سائنسی تے طبی شعبیں اچ عالمی شراکت داری کیتے سازگار ماحول ݙیندی اے۔انھاں جنوبی کورین کمپنیاں کوں پاکستان اچ طبی آلات، ڈیجیٹل ہیلتھ تے بایومیڈیکل انجینئرنگ دے شعبیں اچ سرمایہ کاری دی دعوت ݙیندیں آکھیا جو پارلیمانی سفارتکاری دے ذریعے وی ݙوہیں ملکاں دے سانجھے تعلقات مزید مستحکم کیتے ونڄ سڳدن۔جنوبی کورین وفد پاکستان دی ودھدی سائنسی صلاحیتاں تے سرمایہ کار دوست پالیسیاں دی تعریف کیتی تے مختلف شعبیں اچ تعاون دے مزید امکانات ڳولݨ اچ دلچسپی دا اظہار کیتا۔