آزادی اللہ تعالیٰ دی عظیم نعمت ہے، اساکوں ایں دی قدر تے حفاظت کرݨی اے: وفاقی وزیرِ مواصلات دا یومِ آزادی تے سنیھا

اسلام آباد (اے پی پی) وفاقی وزیرِ مواصلات، صدر استحکام پاکستان پارٹی عبدالعلیم خان 80ویں یومِ آزادی تے قوم کوں دلی مبارکباد پیش کریندیں ہوئیں اکھیا جو آزادی اللہ تعالیٰ دی عظیم نعمت اے، اساں کوں ایں دی قدر تے حفاظت کرݨی اے۔ وزارتِ مواصلات ولوں جاری بیان اچ وفاقی وزیر عبدالعلیم خان اکھیا جو پاکستان دا قیام برصغیر دے مسلماناں دی عظیم جدوجہد تے قربانیاں دا ثمر اے، اڄ دا ݙینہہ اساں کوں اتحاد، ایمان تے نظم و ضبط دے اصولاں تے کاربند رہوݨ دا درس ݙیندے۔ انہاں اکھیا جو ملکی ترقی، خوشحالی تے استحکام کیتے پوری قوم کوں متحد تھی تے کردار ادا کرݨا پوسی، ملکی سرحداں دی حفاظت افواجِ پاکستان دی لازوال قربانیاں دی مرہونِ منت اے۔ عبدالعلیم خان آپݨے سنیھے اچ یومِ آزادی تے شہدا تے غازییاں تے انہاں دے عظیم خانداناں کوں خراجِ عقیدت پیش کریندیں ہوئیں اکھیا جو پاکستان مضبوط ہتھاں اچ اے، قوم کوں آپݨے مستقبل دے حوالے نال پُرامید راہوݨا چاہیدے۔ صدر استحکام پاکستان پارٹی دعا کیتی جو اللہ تعالیٰ پاکستان کوں امن، استحکام، ترقی تے خوشحالی دی راہ تے گامزن رکھے۔ عبدالعلیم خان اکھیا جو اڄ دے ݙینہہ اساں کوں پاکستان کوں قائدِ اعظمؒ دے وژن دے مطابق مضبوط تے خوشحال بݨاوݨ دا عہد کرݨا پوسی۔