سکیورٹی فورسز دی خیبر پختونخوا اتے بلوچستان اچ مختلف کارروائیاں، 49 خوارجی دہشتگرد ہلاک

راولپنڈی۔21 اگست(اے پی پی)سکیورٹی فورسز خیبر پختونخوا اتے بلوچستان اچ بھارتی پراکسیز، فتنہ الخوارج اتے فتنہ الہندوستان دے خلاف مختلف کارروائیاں اچ 49 خوارجی دہشت گرداں کوں ہلاک کر ݙتے۔ پاک فوج دے شعبہ تعلقات عامہ (آئی ایس پی آر) توں جاری بیان دے مطابق دہشتگردی کوں مکاوݨ اتے خوارج و دہشتگرد نیٹ ورکس دے خاتمے کیتے کڄھ ݙینہاں اچ سکیورٹی فورسز پولیس نال رل تے کئی تیکھیاں، مشترکہ اتے انٹیلی جنس کارروائیاں کیتن۔ اے کارروائیاں بھارتی پراکسیز فتنہ الخوارج اتے فتنہ الہندوستان دے خاتمے کیتے بغیر کہیں وانڄھ دے کیتی ونڄݨ آلی انسداد دہشت گردی مہم دا حصہ ہین۔ انہاں کارروائیاں اچ دہشتگرد نیٹ ورکس کوں وݙا دھچکا پچاوݨ دے نال 49 دہشت گرد/خوارجیاں کوں ہلاک کیتا گئے اتے ملک دے امن و استحکام کوں نقصان پچاوݨ دی ہر کوشش کوں موثر انداز اچ ناکام ٻݨا ݙتا گئے۔ خیبر پختونخوا اچ بنوں، شمالی وزیرستان، اورکزئی اتے خیبر اضلاع اچ انٹیلی جنس بیسڈ آپریشنز کیتن جیندے اچ بھارتی سرپرستی اچ سرگرم فتنہ الخوارج دے 12 خوارج جہنم واصل تھی گئے۔ کارروائیاں اچ ٻھاری مقدار اچ دھماکا خیز مواد، آئی ای ڈی دے ڈیٹونیٹنگ ریموٹ، اسلحہ، گولہ بارود اتے موٹر سائیکلاں برآمد کر تے تباہ کر ݙتیاں گئن۔ بلوچستان اچ مستونگ، مچھ، خضدار اتے پنجگور اضلاع اچ 10 انٹیلی جنس بیسڈ آپریشنز اچ بھارتی سرپرستی اچ سرگرم فتنہ الہندوستان دے 37 دہشت گرداں کوں موثر طور تے ہلاک کر ݙتا گئے۔ کارروائیاں اچ وݙی مقدار اچ اسلحہ، دھماکا خیز مواد نال بھرے ڈرم اتے ریموٹ ڈیٹونیشن آلات قبضے اچ ڳھن تے تباہ کر ݙتے گئے۔ پاکستان دی سکیورٹی فورسز ملکی سرحداں تے عوام دے دفاع دے اپݨے عزم تے مکمل طور تے ثابت قدم اتے پرعزم ہین۔ علاقے اچ موجود ٻئے بھارتی سرپرستی اچ سرگرم خوارج/دہشت گرداں دے خاتمے سانگے سینیٹائزیشن آپریشنز جاری ہین۔ وفاقی ایپکس کمیٹی برائے نیشنل ایکشن پلان دی منظوری نال عزم استحکام دے وژن دے تحت سکیورٹی فورسز تے قانون نافذ کرݨ والے اداریاں ولوں ملک توں غیر ملکی سرپرستی اتے حمایت یافتہ دہشت گردی دے ناسور دے مکمل خاتمے تئیں انسداد دہشتگردی دی مہم پوری رفتار نال جاری راہسی۔