بلوچستان کوں ترقی اتے خوشحالی دی دروک اچ رلائے بغیر پاکستان ترقی نئیں کر سڳدا، وزیراعظم شہباز شریف دا بلوچستان نیشنل ورکشاپ نال خطاب

اسلام آباد۔21 اگست(اے پی پی)وزیراعظم محمد شہباز شریف بلوچستان دے مسائل تے گرینڈ ڈائیلاگ دی دعوت ݙیندے آکھیے جو ماضی اچ جو تھیوݨا ہا تھی ڳئے، بندوق چاوݨ مسلے دا حل نئیں، جیڑھے راہ راست تے آوݨ چاہندن انہاں کوں خوش آمدید آکھݨا چاہیدے، بلوچستان کوں ترقی اتے خوشحالی دی دروک اچ رلائے بغیر پاکستان ترقی نئیں کر سڳدا، مسائل دے حل دا بہترین طریقہ مشاورت اتے وسائل دی منصفانہ تقسیم اے، ساریاں جائز شکایتاں دور کریسوں۔ انہاں اے ڳالھ بلوچستان نیشنل ورکشاپ نال خطاب کریندے اچ آکھی جیندے اچ وزیر اعلیٰ بلوچستان میر سرفراز بگٹی، وفاقی وزراء، ارکان اسمبلی، بلوچستان دیاں مختلف سیاسی جماعتاں دے اڳواݨاں اتے عمائدین شرکت کیتی۔ وزیراعظم ورکشاپ دے شرکاء کوں حکومت ولوں خوش آمدید آکھیا۔ انہاں آکھیا جو بلوچستان پاکستان دا او علاقہ اے جیڑھا بلوچ اتے پشتون قوماں تے مشتمل اے جنہاں دی تاریخ دلیری، مہمان نوازی، رواداری اتے عظیم روایتاں نال عبارت اے۔ وزیراعظم آکھیا جو ڈائیلاگ دا مقصد صرف حکومت دی ڳالھ منواوݨ نئیں، ٻھل شرکاء اتے بلوچ عوام دی ڳالھ سُݨݨ اے۔ انہاں یاد ݙوایا جو پاکستان ٻݨدے ہی بلوچستان دے مختلف حصیاں پاکستان دے نال الحاق کیتا، قاضی محمد عیسیٰ، میر جعفر خان جمالی، اکبر بگٹی سودھا بلوچ عمائدین اتے عوام سوچ سمجھ تے پاکستان نال الحاق کیتا ہئی، ایں توں بعد جیڑھے واقعات اتے حالات تھئن او تاریخ دا حصہ ہین، بلوچستان دے معاملیاں کوں ڈائیلاگ نال حل کرݨا چاہیدا ہئی۔ 1970ء اچ بلوچستان کوں چوتھے صوبے دا درجہ ملیا، بلوچستان معدنیات سودھا ٻئے وسائل نال مالامال ہووݨ پاروں امیر ترین صوبہ اے ٻھل اے وسائل سمندر اتے پہاڑاں اچ مدفون ہین، انہاں توں فائدہ چاوݨ سانگے سرمائے اتے مہارت دی ضرورت اے، وفاق اتے صوبہ مل تے ہی ایں سانگے اقدامات کر سڳدن۔ انہاں بلوچستان دے مسائل کوں جائز قرار ݙیندے آکھیا جو جغرافیے دے لحاظ نال وݙا صوبہ ہووݨ پاروں تعلیم اتے صحت دیاں سہولتاں اتے شاہراہواں دی تعمیر اچ مشکلاں ہن، انہاں مسائل دے حل سانگے باہمی مشاورت اتے وسائل دی منصفانہ تقسیم دی لوڑھ اے، مسائل دی اݙ اچ بندوق چاوݨ دا کوئی جواز نئیں، کوئی محب وطن ایویں نئیں کر سڳدا، بلوچستان اچ مزدوری کرݨ والیاں کوں یا سنڄاݨ دی بنیاد تے لوکاں کوں قتل کرݨا جائز نئیں، باہمی گفت و شنید نال مسئلہ حل کیتا ونڄݨا چاہیدے۔ انہاں واضح کیتا جو بلوچستان اتے خیبرپختونخوا اچ دہشتگردی دے پچھو گھس بیٹھیے، فتنۃ الخوارج اتے دشمن ملکاں توں وسائل حاصل کرݨ والے ہن جیڑھے بے گناہواں کوں شہید کریندے پئن، افواج پاکستان اتے قانون نافذ کرݨ والے ادارے انہاں نال نبرد آزما ہین اتے قربانیاں ݙے تے عوام کوں محفوظ ٻݨیندے پئن۔ وزیراعظم آکھیا جو فیلڈ مارشل سیّد عاصم منیر نال مل تے کراچی توں چمن این 25 شاہراہ ٻݨیندے پئن، 415 ارب روپے دا منصوبہ وفاق ݙتے، اے چاریں صوبیاں دے عوام دا پیسہ ہئی جیڑھا بلوچستان تے لیندے پئے ہیں، اے بلوچستان دے عوام سانگے اے۔ وزیراعظم افسوس کیتا جو بدقسمتی نال شاہراہ تے کم کرݨ والے مزدوراں کوں شہید کر ݙتا ویندے۔ انہاں آکھیا جو معرکہ حق دے دوران پوری قوم یک جان دو قالب ہئی، اڄ ساکوں مذکرات تے آوݨا ہوسی ایندے نال ہی نویں راہ نکلسی۔ انہاں آکھیا جو گوادر پورٹ خطے دی اہم ترین اتے شاندار بندرگاہ اے، گوادر پورٹ تے ہک لکھ ٹن دا مال بردار جہاز لنگرانداز تھی سڳدے، گوادر دا ہوائی اݙا عظیم دوست چین تحفے اچ ݙتے۔ وزیراعلیٰ بلوچستان دے مطالبے تے 22 ہزار زرعی ٹیوب ویلاں کوں شمسی توانائی تے منتقل کیتا ڳیا، 70 ارب روپے دے شمسی منصوبے اچ 40 ارب روپے وفاق خرچ کیتے۔ این ایف سی ایوارڈ دے اعلان دے موقع تے وفاق فنڈنگ اچ 100 فیصد اضافہ کیتا، پنجاب 11 ارب روپے سالانہ بلوچستان کوں فراہم کیتے۔ میں اوں ویلھے وزیر اعلیٰ ہا، ہک ݙینھ سانگے وی دل اچ خیال نئیں آیا جو کیوں؟ کیونکہ ریاست دیاں چاریں اکائیاں ترقی دے عمل اچ برابر دیاں شریک ہن، ڄیکر روٹی ہک ہووے تاں چارے بھراواں کوں ونݙݨی ہوسی۔ ایں موقع تے ورکشاپ دے شرکاء دے نال سوال و جواب دی نشست اچ وزیراعظم آکھیا جو وفاق ولوں بلوچستان دے 9 اضلاع اچ دانش سکول ٻݨائے ویندے پئن، جنہاں اچ ایچی سن دے معیار دی تعلیم ݙتی ویندی اے کیوں جو بلوچستان دے پسماندہ علاقیاں دے ٻال وی معیاری تعلیم دے حقدار ہین۔ وزیراعظم آکھیا جو کوئٹہ چمن شاہراہ سانگے مزید سو یا ݙو سو ارب وی ݙیوݨ کوں تیار ہیں ٻھل دہشت گرداں کوں نہ روکیا ڳیا تاں صوبے اچ ترقی دا عمل رکݨ دا خدشہ اے۔ ہک سوال دے جواب اچ وزیراعظم آکھیا جو آئی ٹی برآمدات اچ 21 فیصد اضافہ تھیا، ایںدے اچ ٻیا اضافہ متوقع اے، چاول دے کاشتکاراں کوں برآمدات اچ کمی پاروں 11 ارب روپے دی سبسڈی ݙتی ڳئی تاں جو او ٻئے ملکاں دا مقابلہ کر سڳن اتے ملک اچ ڈالر آون، صرف ہک آئٹم دی سمگلنگ روکݨ نال 125 ارب روپے قومی خزانے اچ آئے، عوامی مفاد اچ مل تے کم کروں تاں ترقی اتے خوشحالی دا انقلاب آ سڳدے۔