کانگو دے اعلیٰ سطح دفاعی وفد دیاں فیلڈ مارشل سید عاصم منیر، ایڈمرل نوید اشرف اتے ائیر چیف مارشل ظہیر احمد بابر سدھو نال ملاقاتاں

راولپنڈی۔21 اگست(اے پی پی)جمہوریہ کانگو دے ہک اعلیٰ سطح دفاعی وفد چیف آف آرمی سٹاف اتے چیف آف ڈیفنس فورسز فیلڈ مارشل سید عاصم منیر، پاک بحریہ دے سربراہ ایڈمرل نوید اشرف اتے پاک فضائیہ دے سربراہ ائیر چیف مارشل ظہیر احمد بابر سدھو نال ملاقاتاں کیتن۔ انہاں ݙوہاں ملکاں وچال دفاعی اتے سکیورٹی تعاون ٻیا تکڑا ٻݨاوݨ سانگے مفاہمت دی ہک یادداشت تے وی دستخط کیتن۔

پاک فوج دے شعبہ تعلقات عامہ (آئی ایس پی آر) توں جاری بیان دے مطابق جمہوریہ کانگو دے ہک اعلیٰ سطح دفاعی وفد، کانگو دی مسلح افواج دے چیف آف ڈیفنس لیفٹیننٹ جنرل بانزا مویلامبے جولز دی سربراہی اچ، چیف آف آرمی سٹاف تے چیف آف ڈیفنس فورسز فیلڈ مارشل سید عاصم منیر (نشانِ امتیاز ملٹری، ہلالِ جرأت) نال جنرل ہیڈکوارٹرز (جی ایچ کیو) اچ ملاقات کیتی۔ جی ایچ کیو آوݨ تے مہمان کوں تریئے مسلح افواج دے چاق و چوبند دستے گارڈ آف آنر پیش کیتا۔ ملاقات اچ باہمی دلچسپی دے امور، علاقائی سلامتی دی صورتحال اتے دفاع و سلامتی دے شعبیاں اچ ݙو طرفہ تعاون ٻیا ودھاوݨ دے طریقیاں تے ڳالھ کیتی ڳئی۔ ݙوہائیں معزز شخصیتاں پاکستان اتے کانگو وچال دیرینہ دوستانہ تعلقات تے اطمینان کیتے۔ ایں موقع تے ݙوہائیں ملکاں وچال دفاعی اتے سکیورٹی تعاون کوں وسیع اتے مضبوط بݨاوݨ سانگے مفاہمت دی ہک یادداشت تے وی دستخط کیتے ڳئن۔ ایں توں پہلے لیفٹیننٹ جنرل بانزا مویلامبے جولز، چیف آف نیول سٹاف ایڈمرل نوید اشرف (نشانِ امتیاز، نشانِ امتیاز ملٹری، تمغۂ بسالت) اتے چیف آف ایئر سٹاف ایئر چیف مارشل ظہیر احمد بابر سدھو (نشانِ امتیاز ملٹری، ہلالِ جرأت) نال وی ملاقات کیتی۔ مہمان خطے اچ امن اتے استحکام سانگے پاک افواج دی پیشہ وارانہ مہارت، آپریشنل صلاحیتاں اتے غیر متزلزل عزم کوں سراہیا۔ انہاں دفاعی شعبے اچ خود انحصاری اتے مقامی سطح تے صلاحیتاں دے ودھارے حاصل تھیوݨ آلیاں اڳونہیاں کوں وی منیا۔