پمز ہسپتال اچ ٻھاہ لڳݨ نال 14 ٻال سڑ ڳئے

اسلام آباد۔26اگست (اے پی پی) پمز ہسپتال اچ ٻھاہ لڳݨ نال 14 ٻال سڑ ڳئے۔ اتھاں جاری بیان دے مطابق ٻھاہ پمز ہسپتال دی ایم سی ایچ وارڈ دی تریجھی منزل تے لڳی، ٻھاہ بھڑکݨ دی اطلاع ملدے ای ریسکیو ٹیمیں فی الفور موقع تے پڄ ڳئیاں۔ امدادی سرگرمیاں دے عمل اچ 6 فائر بریگیڈ دی گاݙیاں اتے 4 ایمبولینسز حصہ گھدا۔ ریسکیو حکام دے مطابق ٻھاہ تے فی الفور قابو پیندیں ہوئیں ٻالاں کوں فوری طور تے آئی سی یو اچ شفٹ کیتا ڳیا۔ حادثے اچ مجموعی طور تے 14 ٻال مکمل طور تے سڑ ڳئے۔ واقعے دی انکوائری کیتے ایڈیشنل ڈپٹی کمشنر جنرل دی سربراہی اچ کمیٹی بݨا ݙتی ڳئی اے۔ انکوائری کمیٹی ٻھاہ لڳݨ دی وجوہات دا تعین کریسی۔ آئی جی اسلام آباد تے ضلعی انتظامیہ دے اعلیٰ حکام وی موقع تے پڄ ڳئے۔