اسلام آباد۔31اگست (اے پی پی) صدرِ مملکت آصف علی زرداری کرغزستان دے صدر صادر ژاپاروف تے کرغزستان دے برادر عوام کوں انھاں دے یومِ آزادی دے موقع تے دلی مبارکباد ݙتی اے۔ سنوار کوں ایوانِ صدر دے پریس ونگ توں جاری بیان دے مطابق آپݨے تہنیتی خط اچ صدرِ مملکت آکھیا جو پاکستان کرغزستان دے نال آپݨے قریبی تے دوستانہ تعلقات کوں ٻہوں اہمیت ݙیندے، جو مشترکہ تاریخ، ثقافتی قربت، …
صدرِ مملکت دی کرغز ہم منصب تے عوام کوں یومِ آزادی دے موقع تے مبارکباد
اسلام آباد۔31اگست (اے پی پی) صدرِ مملکت آصف علی زرداری کرغزستان دے صدر صادر ژاپاروف تے کرغزستان دے برادر عوام کوں انھاں دے یومِ آزادی دے موقع تے دلی مبارکباد ݙتی اے۔ سنوار کوں ایوانِ صدر دے پریس ونگ توں جاری بیان دے مطابق آپݨے تہنیتی خط اچ صدرِ مملکت آکھیا جو پاکستان کرغزستان دے نال آپݨے قریبی تے دوستانہ تعلقات کوں ٻہوں اہمیت ݙیندے، جو مشترکہ تاریخ، ثقافتی قربت، آپسی اعتماد تے قریبی تعاون تے قائم ہن۔ صدرِ مملکت آصف علی زرداری جولائی اچ آپݨے کرغزستان دے دورے دا حوالہ ݙیندیں ہوئیں ذکر کیتا جو ایں دورے نال 1995ء اچ کرغزستان دے انھاں دے پہلے دورے دی خوشگوار یاداں تازہ تھیاں اتے ݙوہائیں ملکاں دے آپسی تعلقات کوں ٻیا مضبوط بݨاوݨ دا ہک ٻیا قیمتی موقع ملیا۔ انہاں صدر صادر ژاپاروف دے دسمبر 2025ء اچ پاکستان دے دورے دے خوشگوار لمحات کوں وی یاد کیتا۔ صدرِ مملکت اکھیا جو ݙوہائیں موقعیاں تے تھیوݨ آلی مفید ڳالھ مہاڑ نال آپسی دلچسپی دے شعبیاں اچ تعاون ودھاوݨ کیتے پاکستان تے کرغزستان دے مشترکہ عزم دی ہک وار ٻیا توثیق تھئی۔ صدرِ مملکت ایں خواہش دا اظہار کیتا جو او صدر صادر ژاپاروف دے نال مل تے ݙوہائیں ملکاں دے آپسی مفاد اچ تعاون کوں ٻیا مضبوط بݨاوݨ کیتے قریبی رابطے جاری رکھیسن۔ صدرِ مملکت صدر صادر ژاپاروف دی صحت تے خوشحالی دے نال کرغزستان دے برادر عوام کیتے امن، ترقی تے خوشحالی دے تسلسل دے حوالے نال نیک خواہشات دا وی اظہار کیتا۔
